ސަރުކާރަށް ބޭރުގެ ހިލޭ އެހީ ނުލިބޭކަމަށް ބުނެ އިދިކޮޅު މީހުން ދައްކަމުން އަންނަނީ ދޮގު ވާހަކަތަކެއް ކަމަށާއި، މިހާތަނަށް މި ސަރުކާރަށް 206 މިލިޔަން ޑިލަރުގެ ހިލޭ އެހީ ލިބިފައިވާ ކަމަށް ފިނޭންސް މިނިސްޓަރު އަހުމަދު މުނައްވަރު ވިދާޅުވެއްޖެއެވެ.
މިނިސްޓަރު އެހެން ވިދާޅުވީ، ގްރޭޓާ މާލެ ވޭސްޓް މެނޭޖުމަންޓް ޕްރޮޖެކްޓުގެ މަސައްކަތްތަކަށް އޭޑީބީން ދިން 33.07 މިލިޔަން ޑޮލަރުގެ ހިލޭ އެހީގެ އެއްބަސްވުމުގައި ސޮއިކުރުމަށް ފިނޭންސް މިނިސްޓްރީގައި މިއަދު ބޭއްވި ރަސްމިއްޔާތުގައެވެ.
އޭނާ ވިދާޅުވީ، މި ސަރުކާރަށް ލިބުނު ހިލޭ އެހީއަކީ މީގެ ކުރިން އެހެން އެއްވެސް ސަރުކާރަކަށް ލިބިފައި ނުވާވަރުގެ ބޮޑެތި ހިލޭ އެހީތައް ކަމަށެވެ. އަދި ކުރިއަށް އޮތް ތަނުގައި އިތުރު ހިލޭ އެހީތައް ލިބޭނެ ކަމަށް ވެސް މިނިސްޓަރު ވިދާޅުވިއެވެ.
މުނައްވަރު ވިދާޅުވީ ކުރީގެ ސަރުކާރުތަކަށް ލިބިފައި ހުރީ ގާތްގަނޑަކަށް 130 މިލިޔަން ޑޮލަރުގެ ހިލޭ އެހީ ކަމަށެވެ.
ހިލޭ އެހީގެ އިތުރުން، ކޮންސެޝަނަލް ފައިނޭންސިން ނުވަތަ އިންޓަރެސްޓް ކުޑަކޮށް ބޭރުން ލިބިފައި ހުރި ލޯނުތައްވެސް ކުރީގެ ސަރުކާރުތަކާ އަޅާ ބަލާއިރު ވަރަށް ބޮޑަށް އިތުރުވެފައިވާ ކަމަށް އޭނާ ވިދާޅުވިއެވެ. އެގޮތުން ކޮންސެޝަނަލް ފައިނޭންސިންގެ ގޮތުގައި މި ސަރުކާރަށް 978 މިލިޔަން ޑޮލަރު މިހާތަނަށް ލިބިފައިވާ ކަމަށް މިނިސްޓަރު ވިދާޅުވިއެވެ.
އޭނާ ވިދާޅުވީ، މި ސަރުކާރަކީ ޕްރޮޖެކްޓްތަކަށް ފައިސާ ހޯދައިގެން ކަންކަން ކުރާނެ ސަރުކާރެއް ކަމަށެވެ. އެގޮތުން ވިލިމާލެ-2 ޕްރޮޖެކްޓަކީ "ނަނާ ހުވަފެނެއް" ނޫން ކަމަށާއި، ސަރުކާރުން އެ ޕްރޮޖެކްޓުވެސް ކާމިޔާބުކަމާ އެކު ނިންމާލާނެ ކަމަށް މުނައްވަރު ވިދާޅުވިއެވެ.