ގްރޫޕް ސްޓޭޖު ނިމި، ކުއާޓާ ފައިނަލްގެ ޓީމުތައް ޔަގީން ވެއްޖެ!

ދިރާގު އެމްއެންޔޫއެސްޔޫ ފުޓްސަލް ފިއެސްޓާގެ އަންހެން އަދި ފިރިހެން ޑިވިޝަންގެ ވެސް ކުއާޓާ ފައިނަލަށް ދަތުރުކުރި ޓީމުތައް ޔަގީން ވެއްޖެ އެވެ.

މި އަހަރުގެ މުބާރާތުގައި އަންހެން ޑިވިޝަންގެ 13 ޓީމު އަދި ފިރިހެން ޑިވިޝަންގެ 17 ޓީމު ވާދަކުރެ އެވެ. ކޮންމެ ޑިވިޝަނެއްގައި ވެސް އެމްއެންޔޫ ހިމެނޭނީ ހަތް ފެކަލްޓީއެއްގެ ޓީމުތައް ވާދަކުރާ އިރު، ދެން ހިމެނޭނީ އެހެނިހެން ކޮލެޖްތަކަށް ދައުވަތު ދީގެން ބައިވެރިވާ ޓީމުތަކެވެ.

މުބާރާތުގެ ދެ ޑިވިޝަންގެ ވެސް ގްރޫޕް ސްޓޭޖުގެ ކުޅުން ނިމިފައިވާ އިރު، ހުރިހާ މެޗެއް ވެސް ކުރިއަށް ގެންގޮސްފައި ވަނީ މާފަންނު މިނީ ގްރައުންޑުގަ އެވެ.

ފިރިހެން ޑިވިޝަންގެ މެޗުތައް ހަތަރު ގްރޫޕަކަށް ބަހާލައިގެން ކުރިއަށް ގެންގޮސްފައިވާ އިރު، ގްރޫޕް އޭގެ އެއްވަނަ ޓީމުގެ ގޮތުގައި ކުއާޓާއަށް ދަތުރުކުރީ އެމްއެންޔޫ ބިޒްނަސް ސްކޫލެވެ. އެޓީމު ވަނީ ގްރޫޕް ސްޓޭޖުގައި ކުޅުނު ހަތަރު މެޗުގެ ތެރެއިން ތިން މެޗުން މޮޅުވެ، އަނެއް މެޗު އެއްވަރުކޮށް، ޖުމްލަ 10 ޕޮއިންޓް ހޯދައިފަ އެވެ. އެ ގްރޫޕްގެ ދެވަނައަށް ދިޔައީ ހަތަރު މެޗުން ނުވަ ޕޮއިންޓް ހޯދި ސައިރެކްސް ކޮލެޖެވެ.

ގްރޫޕް ބީގެ އެއް ވަނަ އެފްއެޗްޓީއެސް އިން ހޯދީ ތިން މެޗުގެ ތެރެއިން ދެ މެޗު ކާމިޔާބުކޮށް، ހަ ޕޮއިންޓް ހޯދައިގެންނެވެ. އެ ގްރޫޕްގެ ދެވަނަ ލިބުނު މެޕްސް ކޮލެޖާއި ވިލާ ކޮލެޖަށް ވެސް ހަމަ އެ އަދަދަށް ޕޮއިންޓް ލިބިފައިވާ އިރު، މެޕްސް ކުއާޓާއަށް ދިޔައީ ފައިދާ ގޯލްގެ ތަފާތުންނެވެ.

ގްރޫޕް ސީގެ އެއްވަނަ ފެސްޓަށް ލިބުނު އިރު، ދެވަނަ ލިބިގެން ކުއާޓާއަށް ދިޔައީ އައިޔޫއެމް އެވެ. އެ ގްރޫޕްގެ އެއްވަނަ ޓީމާއި ދެވަނަ ޓީމުގެ އިތުރުން ތިންވަނައަށް ދިޔަ އެވިޑް ކޮލެޖަށް ވެސް ކުޅުނު ތިން މެޗުން ލިބުނީ ހަ ޕޮއިންޓެވެ. ފައިދާ ގޯލަށް ބަލާ އެންމެ ކުރި ލިބުނީ ފެސްޓާއި އައިޔޫއެމްއަށެވެ.

ގްރޫޕް ޑީގެ އެއްވަނަ އެފްއެޗްއެސްއިން ހޯދީ ކުޅުނު ތިން މެޗުން ވެސް މޮޅުވެގެންނެވެ. އެ ގްރޫޕްގެ ދެވަނަ ހޯދީ ތިން މެޗުން ހަ ޕޮއިންޓް ލިބުނު އެމްއައި ކޮލެޖަށެވެ.

ފިރިހެން ޑިވިޝަންގެ ކުއާޓާ ފައިނަލްގެ މެޗުތައް މިއަދު ހަވީރު ފަށާނެ އެވެ. ފުރަތަމަ މެޗުގައި ގްރޫޕް ޑީގެ އެއްވަނަ އެފްއެޗްއެސްއާއި ގްރޫޕް ބީގެ ރަނަރަޕް މެޕްސް ކޮލެޖު ވާދަކުރާ އިރު، އަނެއް މެޗުގައި ވާދަކުރާނީ ގްރޫޕް ބީގެ އެއްވަނަ އެފްއެޗްޓީއެސްއާއި ގްރޫޕް ޑީގެ ރަނަރަޕް އެމްއައި ކޮލެޖެވެ.

މިރޭ އޮންނަ ފިރިހެން ޑިވިޝަންގެ ކުއާޓާގެ ދެ މެޗުގެ ތެރެއިން ފުރަތަމަ މެޗުގައި ވާދަކުރާނީ ގްރޫޕް ސީގެ އެއްވަނަ ފެސްޓާއި ގްރޫޕް އޭގެ ރަނަރަޕް ސައިރެކްސް ކޮލެޖެވެ. އަނެއް މެޗުގައި ވާދަކުރާނީ ގްރޫޕް އޭގެ އެއްވަނަ އެމްއެންޔޫ ބިޒްނަސް ސްކޫލާއި ގްރޫޕް ސީގެ ރަނަރަޕް އައިޔޫއެމް އެވެ.

މުބާރާތުގެ އަންހެން ޑިވިޝަންގެ ގްރޫޕް ސްޓޭޖު ކުޅުން ވެސް ނިމިފައިވާ އިރު، ގްރޫޕް އޭގެ އެއްވަނަ ހޯދީ ވިލާ ކޮލެޖެވެ. ވިލާ ކޮލެޖު ވަނީ ގްރޫޕް ސްޓޭޖުގައި ކުޅުނު ހުރިހާ މެޗެއް ވެސް ކާމިޔާބުކޮށްފަ އެވެ. ސައިރެކްސް ކޮލެޖަށް ގްރޫޕްގެ ދެވަނަ ލިބުނު އިރު، އެ ޓީމު ވަނީ ކުޅުނު ތިން މެޗުން ދެ މެޗު ކާމިޔާބުކޮށް، ހަ ޕޮއިންޓް ހޯދާފަ އެވެ.

ގްރޫޕް ބީން މެޕްސް ކޮލެޖާއި އެފްއެޗްއެސް ކުއާޓާއަށް ދިޔަ އިރު، ދެ ޓީމަށް ވެސް ލިބިފައި ވަނީ ހަ ޕޮއިންޓެވެ. އެ ގްރޫޕްގެ އެއްވަނަ މެޕްސްއަށް ލިބެނީ ފައިދާ ގޯލުންނެވެ.

އަންހެން ޑިވިޝަންގެ އެންމެ ފޯރިގަދަ އެއް ގްރޫޕަކީ ގްރޫޕް ސީއެވެ. ތިން ޓީމަށް ވެސް ހަމަހަމައަށް ޕޮއިންޓް ލިބިފައިވާ އިރު، އެއްވަނަ ލިބުނީ އެމްއެންޔޫ ބިޒްނަސް ސްކޫލަށެވެ. ދެވަނަ ފްލިސްއަށް ލިބުނު އިރު، ގްރޫޕްގެ ވަނަތައް ކަނޑައެޅުނީ ފައިދާ ގޯލްގެ ތަފާތުންނެވެ.

ގްރޫޕް ޑީގައި ކުޅުނު ދެ މެޗުން ވެސް މޮޅުވެ ކްލިކް ކޮލެޖުން ކުއާޓާ ޔަގީން ކޮށްފައިވާ އިރު، އެ ގްރޫޕްގެ ދެވަނަ ލިބުނީ އެވިޑް ކޮލެޖަށެވެ.

އަންހެން ޑިވިޝަންގެ ކުއާޓާގެ ދެ މެޗު މިއަދު ހަވީރު އޮންނާނެ އެވެ. ފުރަތަމަ މެޗުގައި ގްރޫޕް ޑީގެ އެއް ވަނަ ކްލިކް ކޮލެޖާއި ގްރޫޕް ބީގެ ރަނަރަޕް އެފްއެޗްއެސް ވާދަކުރާ އިރު، އަނެއް މެޗުގައި ވާދަކުރާނީ ގްރޫޕް ބީގެ އެއްވަނަ މެޕްސް ކޮލެޖާއި ގްރޫޕް ޑީގެ ރަނަރަޕް އެވިޑް ކޮލެޖެވެ.

މިރޭ އޮންނަ ދެ މެޗުގެ ތެރެއިން ފުރަތަމަ މެޗުގައި ވާދަކުރާނީ ގްރޫޕް ސީގައި އެންއެންޔޫ ބިޒްނަސް ސްކޫލާއި ގްރޫޕް އޭގެ ރަނަރަޕް ސައިރެކްސް ކޮލެޖެވެ. އަނެއް މެޗުގައި ވާދަކުރާނީ ގްރޫޕް އޭގެ އެއްވަނަ ވިލާ ކޮލެޖާއި ގްރޫޕް ސީގެ ރަނަރަޕް ފްލިސް އެވެ.