މޯލްޑިވްސް އެސޯސިއޭޝަން އޮފް ހިއުމަން ރިސޯސް ޕްރޮފެޝަނަލްސް (މާޕް)އިން، މަޝްހޫރު ކަސްޓަމާ ސާވިސް ކޮންސަލްޓަންޓް ރޮން ކައުފްމަން ރާއްޖެ ގެނެސްގެން ބޭއްވި ޓްރެއިނިންއަށް ބޮޑު ތަރުހީބެއް ލިބިއްޖެއެވެ.
ކަސްޓަމާ ސާވިސްގެ ދާއިރާގައި ކުރިއަށް ދިއުމުގެ ސިއްރުތަކުގެ ނަމުގައި، މިދިޔަ ހޮނިހިރު ދުވަހު ބޭއްވި ޓްރެއިނިންގައި 87 ކުންފުންޏަކުން 357 މީހުން ބައިވެރިވި ކަމަށް މާޕުން ބުނެއެވެ.
ގައުމީ ޔުނިވާސިޓީގެ މައި އޮޑިޓޯރިއަމްގައި ކުރިއަށް ގެންދިޔަ އެއް ދުވަހުގެ ޓްރެއިނިން ޕްރޮގްރާމުގައި، އަމިއްލަ ކުންފުނިތަކުގެ އިތުރުން ސަރުކާރު ހިއްސާވާ ކުންފުނިތަކުން ބައިވެރިވިއެވެ.
ކައުފްމަން ރާއްޖެ އަށް ގެނެސްގެން ބޭއްވި ޓްރެއިނިންގެ ތެރެއިން.-- ފޮޓޯ: މާޕް
ރާއްޖޭގެ އެންމެ ބޮޑު ޓެލެކޮމް ކުންފުނި، ދިރާގުން މެއިން ސްޕޮންސަރުގެ ގޮތުގައި ބައިވެރިވި މި ޓްރެއިނިން ޕްރޮގްރާމުގައި ވަނީ ކަސްޓަމަރުންނަށްދޭ ހިދުމަތަކީ ކޮލިޓީ، މޮޅު އަދި ފުރިހަމަ ހިދުމަތަކަށް ހެދުމަށް ކުރެވިދާނެ ކަންތައްތައް ބައިވެރިންނަށް ކިޔައިދެއްވިއެވެ.
ވާދަވެރިކަން ބޮޑެތި ދާއިރާތަކުގައި ހަރަކާތްތެރިވާ ކުންފުނިތަކުން، އެ ކުންފުނިތަކުގެ ހިދުމަތް ފޯރުކޮށްދިނުމާއި، މުދާ ވިއްކުން ފަދަ ކަންކަމުގައި ގެންގުޅެވިދާނެ މުހިންމު އުކުޅުތަކާއި ގުޅޭގޮތުން ކޯފްމަން ވާހަކަ ދެއްކެވިއެވެ.
ކައުފްމަންއަކީ އެޗްޕީ، އެމެރިކަން އެކްސްޕްރެސް، ނޮކިއާ، ސިންގަޕޯ އެއާލައިންސް އަދި ޗަންގީ އިންޓަނޭޝަނަލް އެއާޕޯޓު ފަދަ ދުނިޔޭގެ މަޝްހޫރު ބޮޑެތި ކުންފުނިތަކުގައި ކަސްޓަމާ ސާވިސްއާ ގުޅޭ ތަމްރީނުތައް ހިންގަމުން އަންނަ ޓްރެއިނަރެކެވެ. އަދި އޭނާ ވަނީ، މިފަދަ ތަމްރީނުތައް ދިނުމުގައި 20 އަހަރަށް ވުރެ ގިނަ ދުވަހު ހަރަކާތްތެރިވެ، ކަސްޓަމާ ސާވިސްއާ ގުޅޭ ވަރަށް މަޝްހޫރު ފޮތްތައް ލިޔުއްވާފައެވެ.