މި އަހަރު ރާއްޖޭގައި ބާއްވާ ރިޔާސީ އިންތިޚާބުގެ ކަވަރޭޖު އެންމެ ތާޒާކަމާ އެކު ރައްޔިތުންނާ ހަމައަށް ގެނެސްދިނުމަށް ސަން މީޑިއާ ގްރޫޕުގެ ހާއްސަ ކަވަރޭޖު "މޯލްޑިވްސް ޑިސައިޑްސް"ގެ ޕޭޖު ލޯންޗުކޮށްފިއެވެ.
"މޯލްޑިވްސް ޑިސައިޑްސް" ކަވަރޭޖުގެ އޮންލައިން ޕޭޖުން ރިޔާސީ އިންތިޚާބާ ގުޅޭ އެންމެ ފަހުގެ ޚަބަރުތަކާއި ރިޕޯޓުތަކާއި ފޮޓޯތައް ކިޔުންތެރިންނާ ހަމައަށް ފެންނަމުން ދާނެއެވެ.
މި ޕޭޖުގެ ޒަރިއްޔާއިން މި އަހަރުގެ ރިޔާސީ އިންތިޚާބުގައި ވާދަކުރާ ކެންޑިޑޭޓުންގެ ޕްރޮފައިލާއި ރަނިންގް މޭޓުންނާއި މެނިފެސްޓޯތަކުގައި ހިމެނޭ ކަންކަމުގެ މައުލޫމާތު ޝާއިއުކުރެވޭނެ އެވެ.
މީގެ އިތުރުން ރާއްޖޭގައި އެންމެ ފަހުން ބޭއްވި ރިޔާސީ އިންތިޚާބުގެ ނަތީޖާތަކާއި އެހެނިހެން ތަފާސް ހިސާބުތައް ވެސް މި ޕޭޖުގެ ޒަރިއްޔާ އިން ކިޔުންތެރިންނާ ހަމައަށް މިހާރު ވެސް ފެންނަމުން ދާނެ އެވެ.
ސެޕްޓެމްބަރު 23ގައި ބާއްވާ ރިޔާސީ އިންތިޚާބުގެ ކަވަރޭޖުގެ ދަށުން އެންމެ ތާޒާ، ތަފްސީލީ މައުލޫމާތާއި ޚަބަރުތައް ކިޔުންތެރިންނާ ހަމައަށް ގެނެސްދިނުމަށް ޓަކައި ސަން މީޑިއާ ގްރޫޕުގެ ކުޑައިގެ ދަށުން ހިންގާ ސަން އޮންލައިން އަދި ސަން ޓީވީގެ މުޅި ޓީމު ދަނީ ވަރަށް ބޮޑަށް ތައްޔާރުވަމުންނެވެ.
ސަން މީޑިއާ ގްރޫޕުގެ އެކްޓިންގް ސީއީއޯ އަދި ސަން އޮންލައިންގެ އެޑިޓާ އިން ޗީފް އަހްމަދު ޒާހިރު (ހިރިގާ) ވިދާޅުވީ ރިޔާސީ އިންތިހާބުގެ ކަވަރޭޖު ގެނައުމަށް ލީޑިން ނިއުސް މީޑިއާއެއްގެ ދައުރު ސަން މީޑިއާގެ އޮންލައިންނާއި ޓީވީ އިން ފުރިހަމަ އަށް އަދާކުރާނެ ކަމަށެވެ.
"ސަން މީޑިއާގެ ކުޑައިގެ ދަށުގައި ނޫނީ އިލެކްޓްރޯނިކް މީޑިއާއި ޕްރިންޓް މީޑިއާ އެއް ހަމައެއްގައި މަސައްކަތް ކުރާ ތަނެއް ރާއްޖޭގައި މަދުވާނެ. އެ އޭގެ ބޭނުން އިރާދަކުރެއްވިއްޔާ އަޅުގަނޑުމެންގެ ޓީމުން ފުރިހަމައަށް ހިފާނަން." ހިރިގާ ވިދާޅުވި އެވެ.
ދިވެހި ގައުމީ ދިދައިގައި ހިމެނޭ ކުލަތައް ބޭނުންކޮށްގެން ޚާއްސަ ތީމަކާ އެކު "މޯލްޑިވްސް ޑިސައިޑްސް" ބްރޭންޑިންގްގައި ރިޔާސީ އިންތިޚާބުގެ ކަވަރޭޖު ސަންއިން ކުރިއަށް ގެންދިއުމަށް ޓަކައި ސޯޝަލް މީޑިއާގައި ވެސް ޚާއްސަ އެކައުންޓްތަކެއް ވަނީ ލޯންޗުކޮށްފައެވެ.
އިންތިޚާބާ ގުޅޭ ގޮތުން ސަންއަށް މައުލޫމާތު ހިއްސާކުރަން ބޭނުންވާ ފަރާތްތަކަށް މި އެކައުންޓްތައް މެދުވެރިކޮށް އެ ފުރުސަތު ވަނީ ހުޅުވާލެވިފައެވެ.
ރާއްޖޭގެ އެންމެ ބޮޑު އަދި އެންމެ ދުވަސްވީ ޕްރައިވެޓް މީޑިއާގެ ހައިސިއްޔަތުން، ސަންއިން އަންނަނީ ރައްޔިތުންނަށް ބޭނުންވާ ތަފާތު މައުލޫމާތުތައް ތާޒާކަމާ އެކު ފޯރުކޮށްދިނުމަށް ގިނަ މަސައްކަތްތަކެއް ކުރަމުންނެވެ.