ނުކުޅެދުންތެރިކަން ހުންނަ ފަރާތްތަކަކީ ވެސް ކޮންމެވެސް ސިފައެއްގައި މުޖުތަމައުގައި ބޭނުން ހިފޭނެ ބައެކެވެ. ކުރިން މުޖުތަމައުގައި ނުކުޅެދުންތެރިކަން ހުންނަ ފަރާތްތަކަށް ފުރުސަތުތައް މަދު ނަމަވެސް، މިހާރު އެމީހުންނަށް ގިނަ ފުރުސަތުތަކެއް ލިބެމުންދެއެވެ.
ކްލަބު އެމްޓީސީސީއާއި އެމްޓީސީސީ ވިލިމާލޭ ޔުނިޓް ގުޅިގެން ވިލިމާލޭގައި ބޭއްވި މިއަހަރުގެ ވިލި މުއައްސަސާ ކަޕް ރޭ ނިމިގެންދިޔައެވެ. އެ މުބާރާތުގެ ފުރަތަމަ އަހަރެކޭ އެއްގޮތަށް ދެވަނަ އަހަރު ވެސް ވެގެންދިޔައީ ހާއްސަ ކަންތައްތަކެއް ފާހަގަވެގެންދިޔަ މުބާރާތަކަށެވެ. ހާއްސަކޮށް އެ މުބާރާތުން ނުކުޅެދުންތެރިކަން ހުންނަ ފަރާތްތަކުގެ ހުނަރުތައް ފެންނަމުންދާކަން ފާހަގަކޮށްލެވެއެވެ.
ވިލި މުއައްސަސާ ކަޕްގެ ގިނަ މަސައްކަތްތަކެއްގައި ބައިވެރިވި ނާޒިފް --- ފޮޓޯ/ އިމޭޖާސް އެމްވީ
މިދިޔަ އަހަރުގެ މުބާރާތުގެ ތަރިއަކަށް ވެގެންދިޔައީ މެޗު ކޮމިޝަނަރެއްގެ ގޮތުގައި ފެނިގެންދިޔަ މިރުޒާ މުނީރެވެ. އެމްޓީސީސީގައި މަސައްކަތްކުރާ މިރުޒާ ވަނީ ވަރަށް ފުރިހަމައަށް މިދިޔަ އަހަރުގެ މުބާރާތުގެ ހުރިހާ މެޗެއްގެ މެޗު ކޮމިޝަނަރުގެ ދައުރު އަދާކޮށްފައެވެ.
މިއަހަރުގެ މުބާރާތުގެ މެޗުތަކުގައި ވެސް މިރުޒާ ފެނިގެންދިޔަ އިރު، އެފަދަ އިތުރު ތަރިއެއް މިއަހަރުގެ މުބާރާތުގައި ފެނިގެންދިޔައެވެ. އެއީ ވެސް ހަމަ މިރުޒާ ފަދައިން ނުކުޅެދުންތެރިކަން ހުންނަ ފަރާތެކެވެ. އެއީ ސްޓެލްކޯގައި މަސައްކަތްކުރާ އިސްމާއިލް ނާޒިފް ސައީދެވެ. އޭނާ ފާހަގަކޮށްލެވުނީ ގިނަ ހުނަރުތަކެއް އެކުލެވޭ މީހެއްގެ ގޮތުގައެވެ. ނުކުރެވޭނެ މަސައްކަތެއް އޮވެދާނެ ކަމަކަށް އޭނާ ނުދެކެއެވެ.
ނާޒިފަށް ފުރުސަތު ލިބުނީ ކިހިނެއް؟
މިދިޔަ އަހަރުގެ ވިލި މުއައްސަސާ ކަޕްގައި ވެސް ނާޒިފް ފެނިގެންދިޔައެވެ. ނަމަވެސް އެއީ ސަޕޯޓަރެއްގެ ގޮތުގައެވެ. ކުޅިވަރަށް ހުންނަ ލޯތްބެއްގެ ސަބަބުން އޭނާ އެފަހަރުގެ މުބާރާތުގެ ވެސް ގިނަ މެޗުތަކެއް ބަލަން ދިޔައެވެ. ވިލިމާލޭ ފުޓްސަލް ދަނޑުގެ ގޭޓް ކުރިމަތީގައި މެޗުތައް ބަލަން ފުރޮޅުލީ ގޮނޑިއެއްގައި އޭރު ފެނިގެންދިޔަ މީހަކީ ނާޒިފެވެ.
ވިލި މުއައްސަސާ ކަޕްގެ މުބާރާތުގެ ކޮމިޓީއަށް ނާޒިފް ފުރަތަމަ ފެނުނީ ހާއްސަ ސަޕޯޓަރެއްގެ ގޮތުގައި މިދިޔަ އަހަރެވެ. އޭނާ ކުޅިވަރަށް ބަހައްޓާ ލޯތްބަކާއި މަސައްކަތަށް ބަހައްޓާ ޝައުގެއްގެ ސަބަބުން މުބާރާތުގެ ކޮމިޓީން އޭނާއަށް މިއަހަރުގެ މުބާރާތުން ފުރުސަތު ދޭން ނިންމިއެވެ.
"އެމްޓީސީސީން ފުރަތަމަ ގުޅާފަ ބައްދަލުވުމަކަށް އައިސްދޭން އެދުނު. އެ ބައްދަލުވުމުގައި އަޅުގަނޑު ކައިރިން އެދުނީ މުބާރާތުގެ ކޮމިޓީ މެންބަރެއްގެ ގޮތުގައި ހަރަކާތްތެރިވުމަށް. ފަހުން އަޅުގަނޑަށް މެޗު ކޮމިޝަނަރެއްގެ ދައުރު އަދާކޮށްދޭން ވެސް އެދުނު. އަޅުގަނޑު ވަރަށް އުފާވި،" ސަން ސްޕޯޓްސްއާ ވާހަކަދައްކަމުން ނާޒިފް ބުންޏެވެ.
ކޮމިޓީގެ މެންބަރެއްގެ ގޮތުގައި ހަރަކާތްތެރިވުމުގެ އިތުރުން މެޗު ކޮމިޝަނަރުގެ ދައުރު އަދާކުރަން ފުރުސަތު ލިބުމުން ނާޒިފް އެކަން ބަލައިގަތީ އުފަލާއެކުއެވެ. އާ ތަޖުރިބާއަކާ ކުރިމަތިލާން ފުރުސަތު ލިބުމުން ނާޒިފް ހުރީ އެ މަސައްކަތްތައް ކުރުމަށް ކެތްމަދުވެފައެވެ.
ނާޒިފް، ވިލި މުއައްސަސާ ކަޕްގެ މުބާރާތް ކޮމިޓީގެ މެންބަރުންނާއެކު --- ފޮޓޯ/ އިމޭޖާސް އެމްވީ
ނާޒިފަށް ލިބުނު ބޮޑު ޝަރަފު!
މުބާރާތުގެ ކޮމިޓީގެ މެންބަރެއްގެ ގޮތުގައި ހަރަކާތްތެރިވެ، މެޗު ކޮމިޝަނަރެއްގެ ދައުރު އަދާކުރަން ފުރުސަތު ލިބުމުން އުފުލުން ހުރި ނާޒިފަށް އިތުރު އުފަލެއް ލިބުނީ މުބާރާތުގެ ފައިނަލު މެޗުގެ މެޗު ކޮމިޝަނަރަކަށް ހަމަޖެއްސި ހަބަރު ލިބުމުންނެވެ.
ނާޒިފް ސިފަކުރާ ގޮތުގައި ފައިނަލް މެޗުގެ މެޗު ކޮމިޝަނަރަކަށް ހަމަޖެހިގެން ދިއުމަކީ އޭނާގެ ދިރިއުޅުމުގައި ލިބުނު ބޮޑު ޝަރަފެއްގެ ގޮތުގައެވެ. އެއީ ނާޒިފްގެ ދިރިއުޅުމުގައި ހާސިލްވި ބޮޑު ލަނޑުދަނޑިއެކެވެ. އެމްޓީސީސީއާއި އާއިލާ އަދި ރައްޓެހިންގެ ފަރާތުން ލިބުނު އެއްބާރުލުމާއެކު ހިތްހަމަޖެހޭ މަސައްކަތްތަކެއް ކުރެވުނު ކަމަށް ނާޒިފް ދެކެއެވެ.
މިއަހަރުގެ މުބާރާތުގެ ކާމިޔާބީ ނާޒިފްއާ ގުޅިފައި!
މިއަހަރުގެ މުބާރާތް ނިންމާލާފައިވަނީ ވަރަށް ކުލަގަދަކޮށެވެ. ކާމިޔާބުކަމާއެކު ނިންމާލި އެ މުބާރާތުގައި ގިނަ މަސައްކަތްތަކެއް ކުރަން ޖެހުނު އިރު، އޭގެ ތެރެއިން ގިނަ ކަންތައްތަކެއްގައި މުބާރާތް އިންތިޒާމުކުރާ ކޮމިޓީން ވަނީ ނާޒިފްގެ އެހީ ހޯދައިފައެވެ.
"މެޗު ކޮމިޝަނަރެއްގެ އިތުރުން އަޅުގަނޑުމެން ނާޒިފް ބޭނުންކުރިން އިވެންޓުގެ ޓެކްނިކަލް މަސައްކަތްތަކުގައި. އެޑްމިން މަސައްކަތްތަކާއި މުބާރާތުގެ ރިޕޯޓް ތައްޔާރު ކުރުމުގެ މަސައްކަތް ވެސް އަޅުގަނޑުމެން ހަވާލުކުރީ ނާޒިފްއާ. އެ މަސައްކަތްތައް ވަރަށް ފުރިހަމައަށް އޭނާ އަދާކުރި. އަޅުގަނޑުމެންނަށް ފާހަގަކުރެވުނީ ނާޒިފްއަކީ ވަރަށް ގަޔާވެގެން މަސައްކަތްކުރާ މީހެއްގެ ގޮތުގައި،" ވިލި މުއައްސަސާ ކަޕްގެ މުބާރާތް ކޮމިޓީގެ ޗެއާމަން އަހްމަދު ޖިނާހު (ޖިނާ) ވިދާޅުވިއެވެ.
ވިލި މުއައްސަސާ ކަޕްގެ ގިނަ މަސައްކަތްތަކެއްގައި ބައިވެރިވި ނާޒިފް --- ފޮޓޯ/ އިމޭޖާސް އެމްވީ
ނާޒިފް ފަސްޖެހޭނެ މަސައްކަތެއް ނެތް!
މޯލްޑިއަން ރެޑް ކްރެސެންޓް (ވިލިޖޯލި)ގެ ބޯޑު މެންބަރެއްގެ ގޮތުގައި ވެސް ހަރަކާތްތެރިވާ ނާޒިފް، އެންމެ ބޭނުންވާ ކަންތައްތަކުގެ ތެރޭގައި މުޖުތަމުގައި ކުރާ މަސައްކަތްތަކުގައި ބައިވެރިވުން ހިމެނެއެވެ. އެއީ އޭނާގެ ހޮބީތަކުގެ ތެރޭގައި ހިމެނޭ ކަމެކެވެ.
މަސައްކަތެއް ހަވާލުކޮށްފި ނަމަ، އެ މަސައްކަތަކާ ނާޒިފް ކުރިމަތިލަނީ ޝައުގުވެރިކަމާއެކުއެވެ. ވީހާވެސް ފުރިހަމައަށް އެ މަސައްކަތެއް ނިންމާލުމަށް އޭނާ މަސައްކަތްކުރެއެވެ.
"އަޅުގަނޑު ޖެހިލުންވާނެ މަސައްކަތެއް ނޯންނާނެ. ކޮންމެ މަސައްކަތެއް ހަވާލުކުރިޔަސް، އެ މަސައްކަތެއް ކުރެވޭތޯ އަޅުގަނޑު މަސައްކަތްކުރާނަން. މަސައްކަތްތަކާ އަޅުގަނޑު ކުރިމަތިލާނީ ވެސް ކެރިގެން،" ނާޒިފް ބުޏްނެވެ.
ނުކުޅެދުންތެރިކަން ހުންނަ މީހެއް ނަމަވެސް، މުޖުތަމައުގައި އެމީހެއްގެ ބޭނުން ހިފޭނެ ގޮތްތަކެއް ހުންނާނެއެވެ. ނާޒިފް ދެކޭގޮތުގައި ނުކުޅެދުންތެރިކަން ހުންނަ ފަރާތެކޭ ކިޔާފައި ހަތަރު ފާރުތެރޭ އެމީހުން ތިބޭކަށް ނުޖެހެއެވެ. ނުކުޅެދުންތެރިކަން ހުންނަ ފަރާތްތަކަށް ނާޒިފް ދޭން ބޭނުންވާ މެސެޖަކީ ވެސް މަސައްކަތްތަކުގައި ބައިވެރިވެ، ކަންކަން ކުރެވޭނެ ކަން ދެއްކުމަށް މަސައްކަތް ކުރުމަށެވެ. ގައުމަށް ކޮންމެވެސް ހިދުމަތެއް ކޮށްދެވޭނެ ބައެއްކަން ސާބިތު ކޮށްދިނުމަށް މަސައްކަތް ކުރުމަށެވެ.