ރާއްޖޭގެ އިސްލާމިކް ޔުނިވާސިޓީ (އައިޔޫއެމް)އިން އިންތިޒާމްކޮށްގެން ކޮންމެ އަހަރަކު ބާއްވަމުން އަންނަ އިސްލާމީ ހޭލުންތެރިކަމާ ބެހޭ ބައިނަލްއަގުވާމީ މަހާސިންތާ 12 ގައުމަކުން ހުށަހެޅި ކަރުދާސްތަކާއެކު ނިންމާލައިފިއެވެ.
މަހާސިންތާއާ ބެހޭގޮތުން މީޑިއާއަށް މައުލޫމާތު ދެއްވަމުން އައިޔޫއެމްގެ ރިސާޗް އެންޑް ޕަބްލިކޭޝަންސްގެ ޑީން ޑރ. ދީބާ މޫސާ ވިދާޅުވީ މިފަހަރުގެ މަހާސިންތާ ވަރަށް ކާމިޔާބު ކަމަށެވެ.
"12 ގައުމަކުން ކަރުދާސް ހުށަހެޅި އޭގެތެރޭގައި އިންޑިއާ ޕާކިސްތާން ޔޫކޭ ފަދަ ގައުމުތައްވެސް ހިމެނިގެން ހިނގައްޖެ. ދެން ބައިވެރިންނަށް ބަލާކަމަށްވަންޏާ 250 ޕާޓިސިޕެންޓްސް ދެން ޕާޕަރުތަކަށް ބެލިޔަސް ވަރަށް ކާމިޔާބު ކޮންފަރެންސްއެކޭ ދަންނަވާނީ،" ދީބާ ވިދާޅުވިއެވެ.
ދީބާ ވިދާޅުވީ އެ ކޮންފަރެންސްގައި ނަފްސާނީ ދުޅަހެޔޮކަމާ ބެހޭގޮތުން ވަރަށް ގިނަ ސެޝަންތަކެއް ހުށަހެޅިގެން ދިޔަ ކަމަށެވެ. އޭގެ ތެރޭގައި ނަފްސާނީ ދުޅަހެޔޮކަމާ ގުޅޭ ބަލިތަކާއި އަދި އެފަދަ އެހެން ބަލިތައް ކީރިތި ގުރުއާން ކިޔައިވައިގެން ޝިފާ ހޯދޭނެގޮތްތަކާ ބެހޭގޮތުން މަޝްވަރާކުރެވިގެން ދިޔަކަމަށްވެސް ދީބާ ވިދާޅުވިއެވެ.
އިއްޔެއާއި މިއަދު އިސްލާމިކް ޔުނިވާސިޓީގައި ކުރިއަށް ދިޔަ އެ މަހާސިންތާގެ މައުޟޫއަކީ "ސުލްހައާއި ހަމަޖެހުމާއި ތަހައްމަލު ކުރުން، ދެކުނު އޭޝިއާގައި ގާއިމުކުރުގައި އިސްލާމީ ފިކުރާއި ސަގާފަތާއި ހަޟާރަރުގެ ދައުރު" އެވެ.
އިސްލާމިކް ޔުނިވާސިޓީން ބުނީ އެ މަހާސިންތާގައި ޖުމްލަ 43 ކަރުދާހެއް ހުށަހެޅި ކަމަށެވެ. އަދި އޭގެ ތެރެއިން 37 ކަރުދާހަކީ ބޭރުގައުމުތަކުން މަހާސިންތާގައި ބައިވެރިވާ ބޭފުޅުން ހުށަހެޅި ކަރުދާސް ކަމަށް ވެސް އިސްލާމިކް ޔުނިވަސިޓީ އިން ބުންޏެވެ.
ކަރުދާސް ހުށަހެޅުމަށް އިސްލާމީ އެކިގައުމުތަކަށް ހުޅުވާލައިގެން ލިބުނު ކަރުދާސްތަކުގެ ތެރެއިން އެ ކޮންފަރެންސްއަށް ފުރުސަތުދޭނެ ކަރުދާސްތައް ހޮވުމުގައި މަސައްކަތްކުރައްވާފައި ވަނީ ޕާކިސްތާނުގެ ރިގާ ޔުނިވާސިޓީއިންނެވެ.