އިންޑޮނޭޝިއާގެ ޖަކާޓާއާއި ޕަލެންބޭންގްގައި އަންނަ އޮގަސްޓް މަހުގެ 18އިން ސެޕްޓެމްބަރު މަހުގެ ދެއަކަށް ކުރިއަށް ގެންދިއުމަށް ހަމެޖެހިފައިވާ އޭޝިއަން ގޭމްސްގެ ތައްޔާރީތަކުގެ ތެރޭގައި ހިމެނޭ "ފަން ރަން" މިއަދު މާލޭގައި ކުރިއަށް ގެންގޮސްފިއެވެ.
އޭޝިއަން ގޭމްސްގެ އެންމެ ބޮޑު ޕްރޮމޯޝަނަލް އިވެންޓްގެ ގޮތުގައި ފާހަގަވެގެންދާ "ފަން ރަން" މިފަހަރުގެ އޭޝިއަން ގޭމްސްގެ ކުރިން އޭޝިއާގެ 31 ސިޓީއެއްގައި ކުރިއަށް ގެންގޮސްފައިވާ އިރު، ރާއްޖޭގައި މިއަދު ބާއްވާފައި ވަނީ އެންމެ ފަހު ދުވުމެވެ.
މިއަދުގެ ދުވުން ހެނދުނު 7:00ގައި ރަސްފަންނުން ފަށާފައިވާ އިރު، ދެ ކިލޯމީޓަރުގެ ދުރުމިނަކަށް ދުވުން ވަނީ ކުރިއަށް ގެންގޮސްފައެވެ. ދުވުމުގައި އޮލިމްޕިކް ކޮމިޓީގެ ޖެނެރަލް ސެކްރެޓަރީ އަހުމަދު މަރުޒޫގް (މަރޭ)ވެސް ބައިވެރިވެވަޑައިގެންފައިވާ އިރު، އޭނާ ވިދާޅުވީ ދުވުން ވަރަށް ކާމިޔާބު ކަމަށެވެ.
"ވަރަށް ކާމިޔާބު ދުވުން. ހުކުރު ދުވަހުގެ ހެނދުނަށް ބަލައިފައި ވަރަށް ގިނަ ކުދިން ބައިވެރިވެފައިވޭ. ދުވުމުގެ މަގުސަދު ވަރަށް ބޮޑަށް ހާސިލްވި. ދުވުމުގެ މައިގަނޑު މަގުސަދަކީ އޭޝިއަން ގޭމްސް ޕްރޮމޯޓްކުރުމުގެ އިތުރުން، ކުދިންގެ ހިތުގައި ކުޅިވަރުގެ ލޯބި އާލާކުރުން. ދުވުމުގެ ސަބަބުން ކުދިންގެ ހިތުގައި އޭޝިއަން ގޭމަށް ލޯބި ޖެހި، އޭޝިއަން ގޭމަށް ދިއުމަށް އިންސްޕަޔާވާނެ،" މަރޭ ސަންއަށް ވިދާޅުވިއެވެ.
މިއަދު ކުރިއަށް ގެންދިޔަ ފަން ރަންގެ ތެރެއިން --- ފޮޓޯ/ މީސް މީޑިއާ
މިއަދުގެ ދުވުމުގައި ގާތް ގަނޑަކަށް 500 އަށްވުރެ ގިނަ ކުދިން ބައިވެރިވެފައިވާ އިރު، ދުވުމުގައި ބައިވެރިވި އޭޝިއަން އޮލިމްޕިކް ކައުންސިލާއި އޭޝިއަން ގޭމްސް ޑެލިގޭޓްގެ ބޭފުޅުންވެސް ވަނީ ދުވުމުގެ ކާމިޔާބުކަން ފާހަގަކޮށްފައެވެ.
"ފަން ރަން"އަކީ އިޖުތިމާއީ ކުޅިވަރު އިވެންޓެކެވެ. 2006 ވަނަ އަހަރު ގަތަރުގެ ދޯހާގައި ބޭއްވި އޭޝިއަން ގޭމްސްއިން ފެށިގެން ކޮންމެ އަހަރެއްގެ އޭޝިއަން ގޭމްސްގެ ކުރިން "ފަން ރަން" އަންނަނީ ބާއްވަމުންނެވެ.
މިފަހަރުގެ އޭޝިއަން ގޭމްސްގައި 10000 އަށްވުރެ ގިނަ އެތުލީޓުން ބައިވެރިވުމަށް ހަމަޖެހިފައިވާ އިރު، 45 ގައުމަކުން ވާދަކުރާއެވެ. ޖުމްލަ 40 ކުޅިވަރެއްގެ އިވެންޓްތައް ހިމެނޭ އިރު، 462 އިވެންޓެއް ކުރިއަށްދާނެއެވެ. މިއީ އިންޑޮނޭޝިއާގައި ހޯސްޓްކުރާ ދެވަނަ އޭޝިއަން ގޭމްސްއެވެ. މީގެކުރިން 1962 ވަނަ އަހަރުގައިވެސް އެގައުމުގައި އޭޝިއަން ގޭމްސް ހޯސްޓް ކޮށްފައިވެއެވެ.