ރެއާލް މެޑްރިޑް ދޫކޮށް، ޔުވެންޓަސްއަށް ރޮނާލްޑޯ ބަދަލުވުމަކީ މުޅި ސެރެއާ އޭއަށް ލިބުނު ހިތްވަރެއް ކަމަށް ނަޕޯލީގެ ކޯޗު ކާލޯ އެންޗެލޮޓީ ބުނެފިއެވެ.
ރޮނާލްޑޯއާއެކު 2013-14 ވަނަ އަހަރުގެ ސީޒަންގައި ރެއާލްގެ ކޯޗުކަމުގައި މަސައްކަތްކުރި އެންޗެލޮޓީ ވަނީ އެ ސީޒަންގައި ޗެމްޕިއަން ލީގު އުފުލާލައިފައެވެ. އޭގެ ފަހުން ބަޔާންގެ ކޯޗުކަން ކުރި އެންޗެލޮޓީ މިދިޔަ ސީޒަންގައި ބަޔާންއިން ފޮނުވާލައިފައިވާ އިރު، މި ސީޒަންގައި އޭނާ ނުކުންނާނީ އިޓަލީގެ ނަޕޯލީއާއެކުގައެވެ.
ރޮނާލްޑޯއާ ދެކޮޅަށް ނުކުތުމާ ގުޅޭގޮތުން ތަޖުރިބާކާރު ކޯޗު އެންޗެލޮޓީ ބުނީ ރޮނާލްޑޯއަކީ ވަރަށް ޕްރޮފެޝަނަލް ކުޅުންތެރިއެއް ކަމަށާއި، ދުނިޔޭގެ އެންމެ މަތީ ފަންތީގެ ކުޅުންތެރިއެއް ކަމަށެވެ.
އެންޗެލޮޓީ ބުނީ ރޮނާލްޑޯ ސެރެއާ އޭއާ ގުޅުމަކީ މުޅި އިޓަލީގެ ފުޓުބޯޅައަށް ލިބޭނެ ކުރިއެރުމެއް ކަމަށާއި، ރޮނާލްޑޯގެ ސަބަބުން އެހެން ޓީމުތަކަށް ބުރަކޮށް މަސައްކަތް ކުރަން ހިތްވަރު ލިބޭނެ ކަމަށެވެ. ހާއްސަކޮށް ރޮނާލްޑޯ ހިފެހެއްޓުމަކީ ސެރެއާ އޭގެ ޓީމުތަކަށް ކުރިމަތިވާނެ ޗެލެންޖެއް ކަމަށް އެންޗެލޮޓީ ބުންޏެވެ.
މީގެ ކުރިން ޔުވެންޓަސްގެ ކޯޗުގެ މަގާމުވެސް އަދާކޮށްފައިވާ އެންޗެލޮޓީ ބުނެފައި ވަނީ ސެރެއާ އޭގެ އެންމެ ގަދަ ބާރަކީ ޔުވެންޓަސް ނަމަވެސް، އެހެން ބައެއް ޓީމުތަކަށްވެސް ސަމާލުވާން ޖެހޭ ކަމަށެވެ.
އުމުރުން 33 އަހަރުގެ ޕޯޗުގަލް ތަރި ރޮނާލްޑޯ، ރެއާލް ދޫކޮށް ޔުވެންޓަސްއާ ގުޅުނީ 100 މިލިއަން ޔޫރޯގެ އަގަކަށެވެ. އިތުރު ފީތަކުގެ ގޮތުގައި ޔުވެންޓަސްއިން 12 މިލިއަން ޔޫރޯ ހަރަދުކުރިއެވެ. ޔުވެންޓަސްއާއެކު ހަތަރު އަހަރުގެ އެއްބަސްވުމެއްގައި ސޮއިކުރި ރޮނާލްޑޯއަށް ކޮންމެ ސީޒަނެއްގައި 30 މިލިއަން ޔޫރޯ ލިބޭނެއެވެ.