މިސްރުގެ ހާލަތާ މެދު އިސްރާއީލުން ކަންބޮޑުވުން ފާޅުކޮށްފި

ޤާހިރާ : (ސެޕްޓެމްބަރ 11) : މިސްރުން މިހާރު ފެންނަމުންދަނީ ކޭންޕްޑޭވިޑްގެ ސުލްޙައިގެ ރޫޙާ ޚިލާފް ޢަމަލުތަކެއް ކަމަށާ އެމުޢާހަދާގެ މުސްތަޤްބަލް ނޭންގުމެއްގެ ތެރެއަށް ވެއްޓެމުންދާ ކަމަށްބުނެ އެކަމާމެދު ދެރަވާކަން އިސްރާއީލުން ހާމަކޮށްފިއެވެ. އިސްރާއީލުގެ ބޮޑުވަޒީރު ބެންޖަމިން ނަތަނިޔާހޫ ވިދާޅުވީ އިސްރާއީލުން އަދިވެސްއޮތީ ކޭންޕްޑޭވިޑް އެއްބަސްވުމަށް އިޙްތިރާމް ކުރުމުގެ މަތީގައި ކަމަށާ މިސްރުވެސް އެގޮތުގައި ދެމިއޮންނާނެ ކަމަށް އުންމީދު ކުރައްވާ ކަމުގައެވެ. މިސްރުގައި ހުންނަ އިސްރާއީލުގެ އެންބަސީގެ ޢިމާރާތަަށް މިސްރުގެ ރައްޔިތުން އަރައިގަތް ޙާދިޘާއަށްފަހު އިސްރާއީލުގެ އިސް މަސްއޫލުވެރިއަކު ދެއްވި ފުރަތަމަ ބަޔާނެވެ.

ޤާހިރާގެ ޖީޒާގައި ހުންނަ އިސްރާއީލުގެ އެންބަސީގެ ޢިމާރާތަަށް މިސްރުގެ ރައްޔިތުން އަރައިގަތީ އިއްޔެރޭގެ ވަގުތެއްގައެވެ. އެ ޙާދިޘާގައި ތިންމީހުން މަރުވެ އެއްހާސް ނުވަދިހަ ތިން މީހުން ޒަޚަމްވި ކަމަށް ޚަބަރު ލިބެއެވެ. ތިންމީހުން މަރުވެ ހާހަކަށްވުރެ ގިނަ މީހުން ޒަޚަމްވީ އިސްރާއީލު އެންބަސީއަށް އަރައިގަތުމުގައި އިސްކޮށް ހަރަކާތްތެރިވި މިސްރުގެ ޒުވާނުންނާއި މިސްރުގެ ސަލާމަތީ ބާރުތަކާދެމެދު މިދިޔަ ހުކުރު ދުވަހުގެރެއިން ފެށިގެން ރޭ އިރާކޮޅާ ހަމައަށް ހިނގައިދިޔަ ކުރިމަތިލުންތަކުގައެވެ.

އިސްރާއީލުގެ އެންބަސީހުރި ޓަވަރުގެ ޢިމާރާތުގެ ވަށައިގެން ހިނގަމުންދިޔަ މިކުރިމަތިލުންތައް ރޭއިރާކޮޅާ ހަމައަށްއައިއިރު މައިތިރިވެފައިވާ ކަމަށް ޤާހިރާގައި ހުންނަވާ އަލްޖަޒީރާގެ މުރާސިލު ބުނެއެވެ. މިކުރިމަތިލުންތަކުގައި މަރުވި މީހުންގެ ތެރޭގައި މިސްރުގެ ޢަސްކަރީ ފުލުހުންގެ އޮފްސަރަކުވެސް ހިމެނެއެވެ. އޭނާ މަރުވީ ކުރިމަތިލުންތަކުގައި ޕްރެޝަރ ބޮޑުވެގެން ކުރިމަތިވި ހާޓްއެޓޭކެއްގައި ކަމަށާއި ޒަޚަމްވީ މީހުންގެ ތެރޭގައިވެސް މިސްރުގެ ސަލާމަތީ ބާރުތަކުގެ 300 މީހުން ހިމެނޭކަމަށް ޚަބަރު ލިބެއެވެ.

ފަލަސްތީނުގެ ބިންތައް ގަދަބާރުން ހިފައިގެން އޮތުމުގެ އިތުރުން ފަލަސްތީނުގެ ރައްޔިތުންނާމެދު އިސްރާއީލުން ހިންގާ އިންސާނިއްޔަތާ ޚިލާފު އަނިޔާވެރި ޢަމަލުތަކުގެ ސަބަބުންނާއި އިސްރާއީލު ސިފައިން މިދިޔަމަހު މިސްރުގެ ސައިނާއަށްވަދެ މިސްރު ފުލުހުންގެ 5 މީހަކު މަރާލި މައްސަލާގައި ރުޅިއައިސްފައިވާ މިސްރު ރައްޔިތުންގެ އެތަށް ހާސްބަޔަކު އިސްރާއީލުގެ އެންބަސީއަށް އިއްޔެރޭ އަރައިގަތީ އެއެންބަސީގެ ކުރިމަތީގައި އިސްރާއީލުން ބިނާކޮށްފައިވާ ކޮންކްރީޓް ފާރާއި އިލެކްޓްރޯނިކް ސެކިއުރިޓީ ގޭޓްފަދަ ސަލާމަތީ ހުރިހާ ވަސީލަތްތަކެއް ފުނޑުފުނޑު ކޮށްލުމަށްފަހުގައެވެ.

މިސްރުގެ ހުށިޔާރު ޒުވާނަކު މިދިޔަ މަހު އިސްރާއީލުގެ އެންބަސީއަށް އަރައި އެތާނގައި ހުރި ޔަހޫދީ ދިދަ ތިރިކޮށް އެދިދައިގެ ބަަލުގައި މިސްރުގެ ދިދަނެގުމުން މިސްރުގައި އޭނާ ޤައުމީ ބަތަލަކަށް ވެފައިވެއެވެ. ރޭގެ ކުރިމަތިލުންތަކުގައިވެސް މިސްރުގެ ޒުވާނުންތަކެއްވަނީ ދެވަނަ ފަހަރަށް އިސްރާއީލުގެ އެންބަސީގައި މިސްރުގެ ދިދަނަގައި އިސްރާއީލުގެ ދިދައަންދައި އިސްރާއީލެވެކިޔާ ދައުލަތަށް އިހާނާތްކުރުމުގެ ޢަމަލުތަކެއް ތަކްބީރާއި ތަހްލީލާއެކު ދީނީ އަދި ޤައުމީ ރޫހެއްގައި ކުރިޔަށް ގެންގޮސްފައެވެ.

ރިޕޯޓްތައް ބުނާގޮތުން ރުޅިއައިސްފައިވާ މިސްރުގެ ޒުވާނުން އަރައިގަތީ ސީދާ އިސްރާއީލުގެ އެންބަސީއަކަށް ނޫނެވެ. އިސްރާއީލުގެ އެންބަސީހުރި ޢިމާރާތުގައިވާ އިސްރާއީލުގެ ޑިޕްލޮމެޓިކް ލިޔެކިޔުންތައް ރައްކާކޮށް ފައިވާ އަރުޝީފް ޑިޕާޓްމެންޓަށެވެ. އެޑިޕާޓްމަންޓަށް ގަދަކަމުން ވަދެގަތް ޒުވާނުން އެތާނގައިހުރި އިސްރާއީލުގެ ޑިޕްލޮމެޓިކް ލިޔުންތަކުގެ ތެރެއިން އެތަށް ހާސް ލިޔެކިޔުންތަކެއް އެޢިމާރާތުގެ ކުޑަދޮރުތަކުންނާއި ބެލްކަނީތަކުން ބޭރަށްއުކާލައި އިތުރު ލިޔެކިޔުންތަކުގައި ހުޅުޖަހައި އަންދާލިއެވެ. އަދި މިސްރުގެ ބައެއް އެކްޓިވިސްޓުން ސީދާ އިސްރާއީލުގެ އެންބަސީއަށްވެސް ޙަމަލާދީފައިވާ ކަމަށް ރިޕޯޓްތައް ބުނެއެވެ.

އިސްރާއީލުގެ އެންބަސީގެ ޢިމާރާތަަށް މިސްރުގެ ރައްޔިތުން އަރައިގަތް ޙާދިޘާއާ ގުޅިގެން އިސްރާއީލުންވަނީ މިސްރުގައި ހުންނަވާ ޔަހޫދީ ސަފީރު އިސްޙާޤް ލިވަނޯންއާއި އެހެން ޑިޕްލޮމޭޓުން މިސްރުގައި ދެންބައިތިއްބައިފިނަމަ އެމީހުންގެ ފުރާނައަށް ނުރައްކާވެދާނ ކަމަށްބުނެ ޚާއްސަ މަތިންދާބޯޓެއް ބޭނުންކޮށްގެން ކުއްލި ޙާލަތުގައި އެމީހުން އިސްރާއީލަށް ގެންގޮސްފައެވެ. މިހާރު ދެތިން މުވައްޒަފުންނާއެކު ޤާހިރާގައި ހުންނެވީ އިސްރާއީލުގެ ކޮންސަލް އެއް ކަމަށް އިސްރާއީލުގެ ޚާރިޖިއްޔާއިން ބުނެއެވެ.

އެމެރިކާއާއި އިސްރާއީލުގެ ތާއީދު ލިބިފައިވާ މިސްރުގެ ކުރީގެ ޑިކްޓޭޓަރ ޙުސްނީ މުބާރަކްގެ ވެރިކަން ރައްޔިތުންގެ އިންޤިލާބެއްގައި ވައްޓާލުމަށްފަހު މިސްރު ރައްޔިތުން ގެންދަނީ އެމެރިކާގެ ނުފޫޒުން މިސްރު މިނިވަން ކުރުމަށާއި އެމެރިކާގެ ފިއްތުންތަކާ ގުޅިގެން މިސްރުން އިސްރާއީލާއެކު ބޭއްވާ ގުޅުންތައް ކަނޑާލައި އިސްރާއީލުގެ ސަފީރާއި ޑިޕްލޮމޭޓުން މިސްރުން ބޭރުކޮށްލުމަށް ގޮވާލައި މުޒާހަރާތައް ކުރަމުންނެވެ.

އިސްރާއީލުގެ އެންބަސީއާ ދެކޮޅަށް މިސްރުގެ ރައްޔިތުން މިޢަމަލުތައް ހިންގީ އިސްރާއީލަށް ބިރު ދެއްކުމަށާއި އިސްރާއީލުގެ ޙިމާޔަތުގައިވާ އެމެރިކާއަށް މެސެޖްތަކެއް ދިނުމުގެ ގޮތުންނާއި އިސްރާއީލާ ގުޅުންތައް ކަނޑާލުމަށް މިސްރުގެ އައު ވެރިންނަށާއި ސިޔާސީ ފަރާތްތަކަށް ފިއްތުންތައް ކުރިމަތިކުރުމުގެ ގޮތުން ކަމަށް މިސްރުގެ އެކްޓިވިސްޓުން ބުނެއެވެ.

މުބާރަކްގެ ނިޒާމު ވެއްޓުމާއެކު މިސްރު ރައްޔިތުންނަށް ލިބިގެންދިޔަ މިނިވަންކަމާއި ވެރިކަމުގެ ބާރުތައް ފުރިހަމަވާނީ އިސްރާއީލާއެކު މިސްރުން ސޮއިކޮށްފައިވާ ކޭންޕްޑޭވިޑް ސުލްހައިގެ އެއްބަސްވުން އުވާލައި އިސްރާއީލުގެ ސަފީރު މިސްރުން ބޭރުކޮށް މިސްރަށް ނުފޫޒު ހިންގުމުގެ ދޮރުތައް އެމެރިކާގެ ކުރިމަތީގައި ބަންދުކުރެވިގެން ކަމަށްވެސް މިކަމުގައި ހަރަކާތްތެރިވާ މިސްރުގެ ޒުވާން އެކްޓިވިސްޓުން ބުނެއެވެ.

މިސްރަށް އަންނަމުންދާ މިބަދަލުތަކާ ގުޅިގެންނާއި މިސްރުގެ ރައްޔިތުންނަށް ވެރިކަމުގެ ބާރާއި މިނިވަންކަން ލިބުމުން އެމެރިކާއާއި އިސްރާއީލުންވަނީ ކަންބޮޑުވާކަން ހާމަކޮށްފައެވެ. މިސްރުން މިހާރު ފެންނަމުންދަނީ ކޭންޕްޑޭވިޑްގެ ސުލްޙައިގެ ރޫޙާ ޚިލާފް ޢަމަލުތަކެއް ކަމަށްބުނެ އިސްރާއީލުންވަނީ އެކަމާމެދު ދެރަވާކަން ހާމަކޮށްފައެވެ.

އިއްޔެގެ ޙާދިޘާއާ ގުޅިގެން އިސްރާއީލުންވަނީ އެޤައުމުގެ އެންބަސީއާއި ޑިޕްލޮމޭޓުން ޙިމާޔަތް ކުރުމަށް މިސްރަށް ބާރުއަޅައި ދިނުމަށް އެމެރިކާއަށްވެސް އިލްތިމާސްކޮށްފައެވެ. މިއިލްތިމާސްއާ ގުޅިގެން އެމެރިކާގެ ރައީސް ބަރަކް އޮމާބާ، ޔަހޫދީ އެންބަސީއާއި ޑިޕްލޮމޭޓުން ޙިމާޔަތް ކޮށްދިނުމަށް މިސްރުގެ ސަރުކާރަށް ގޮވާލައްވާފައިވެ އެވެ. (އަލްޖަޒީރާ+ރޮއިޓާސް)