ރަމަޟާން ވެޓެރަންސް ކަޕްގެ ދެވަނަ ބުރުގެ ފަހު މެޗުގައި މާޒިޔާ ސްޕޯޓްސް ކްލަބުން ދިވެހި ސިފައިން ކްލަބު ބަލިކުރުމުން މުބާރާތުގެ ސެމީ ފައިނަލް (ޕްލޭ އޯފް)އަށް ނިއު ރޭޑިއަންޓް ސްޕޯޓްސް ކްލަބާއި މާޒިޔާ ދަތުރުކޮށްފިއެވެ.
އިއްޔެ ހަވީރު އެއް ނަންބަރު ޓާފް ދަނޑުގައި ކުޅުނު މެޗުން މާޒިޔާ މޮޅުވީ 1-0ގެ ނަތީޖާއަކުންނެވެ. މާޒިޔާއިން މެޗުގައި ކާމިޔާބުކުރި ހަމައެކަނި ގޯލަކީ ދިވެހި ސިފައިންގެ ކްލަބުގެ އަހުމަދު ޒިޔާމް އަތުން ބައިކޮޅަށް ވަން ގޯލެކެވެ.
އިއްޔެގެ މެޗުގެ މޮޅު ކުޅުންތެރިއަކަށް މާޒިޔާގެ އަބްދުލް ވާހިދު މުހައްމަދު ހޮވުނު އިރު، 45 އަހަރުން މަތީގެ އެންމެ މޮޅު ކުޅުންތެރިއަކަށް ހޮވުނީ މާޒިޔާގެ މުހައްމަދު ނާޒިމެވެ.
އުމުރުން 35 އަހަރުން މަތީގެ ކުޅުންތެރިންނަށް އަމާޒުކޮށްގެން މޯލްޑިވްސް ސޮކާ މޭޓްސް (އެމްއެސްއެމް) އިން ކުރިއަށްގެންދާ ވެޓެރަންސް ކަޕުން ރާއްޖޭގެ ކުރީގެ ގިނަ ތަރިންތަކެއް ފެނިގެންދާ އިރު، މިއަހަރުގެ މުބާރާތުގައި ހަތް ޓީމަކުން ވާދަކުރެއެވެ. އޭގެ ތެރެއިން ދެވަނަ ބުރަށް ގޮސްފައި ވަނީ ފަސް ޓީމެކެވެ.
މުބާރާތުގެ ދެވަނަ ބުރުގެ އެއްވަނަ ހޯދައި ކްލަބު ވެލެންސިއާއިން ފައިނަލްގެ އޮޓޮމެޓިކް ޖާގަ ހޯދައިފައިވާ އިރު، ދެން ފައިނަލްގައި ކުޅޭނީ ސެމީ ފައިނަލް މެޗުގައި ނިއުއާއި މާޒިޔާ ވާދަކޮށް، މޮޅުވާ ޓީމެވެ.
އިއްޔެގެ ނަތީޖާއާއެކު މާޒިޔާއަށް ދެވަނަ ބުރުގެ ތާވަލުގެ ދެވަނަ ލިބޭ އިރު، ތިން ވަނަ ލިބެނީ ނިއުއަށެވެ. ވެޓެރަންސް ކަޕްގެ ސެމީ ފައިނަލްގައި ނިއުއާއި މާޒިޔާ ވާދަކުރާ މެޗު އޮންނާނީ މާދަމާ ހަވީރު 4:30 ގައެވެ.