އެސްޓީއޯ މާލޭ ލީގުގެ ދެވަނަ ބުރުގައި މިރޭ ކުޅުނު މެޗުގައި ކޯނެލިއަސް ސްޓެވާޓް ޖެހި ގޯލާއެކު މާޒިޔާ ސްޕޯޓްސް އެންޑް ރެކްރިއޭޝަން ކްލަބުން ވިކްޓަރީ ސްޕޯޓްސް ކްލަބު ބަލިކޮށްފިއެވެ.
ގައުމީ ފުޓުބޯޅަ ދަނޑުގައި ކުޅުނު މެޗު މާޒިޔާއިން 1-0ގެ ނަތީޖާއަކުން ކާމިޔާބުކުރި އިރު، މެޗުގެ ހަމައެކަނި ގޯލް އެޓީމުގެ ވިންސެންޓް ފޯވަޑް، ކޯނެލިއަސް ކާމިޔާބުކުރީ މެޗު ނިމެން ދަނިކޮށެވެ.
މިރޭގެ މެޗަށް ނުކުތް އިރު، ދެޓީމަށްވެސް ދިވެހި ޕްރިމިއާ ލީގު ޔަގީންވެ، ލީގު ޗެމްޕިއަންކަން ނިއު ރޭޑިއަންޓް ސްޕޯޓްސް ކްލަބަށް ޔަގީން ވެފައި އޮތް ނަމަވެސް މެޗު ފެނިގެން ދިޔައީ ފޯރިގަދަ ކޮށެވެ. ހާއްސަކޮށް ދެޓީމުގެ ފަރާތުންވެސް ގިނަ ހަމަލާތަކެއް ފެނިގެން ގޮސްފައިވެއެވެ.
މާލޭ ލީގުގެ ދެވަނަ ބުރުގައި މާޒިޔާއި ވިކްޓަރީ ވާދަކުރި މެޗުގެ ތެރެއިން: އެ މެޗު 1-0ގެ ނަތީޖާއަކުން ކާމިޔާބުކުރީ މާޒިޔާ --- ފޮޓޯ/ އެފްއޭއެމް
މެޗުގައި ފުރަތަމަ ފަހަރަށް ނުރައްކަތެރި ހަމަލާއެއް ފެނިގެން ދިޔައީ 20 ވަނަ މިނެޓުގައެވެ. ވިކްޓަރީގެ ފުލް ބެކަށް ކުޅެމުން އަންނަ އާދަމް އިޝާމް (ސަން) ހުރަސް ކުރި ބޯޅަ މާޒިޔާ ގޯލްގެ އަރިމަތީ ދަނޑީގައި ޖެހުނު އިރު، ދަނޑީގައި ޖެހިފައި ނުކުތް ބޯޅަ ހުހަށް އޮވެ ގޯލަށް ފޮނުވާލަން ވިކްޓަރީގެ ހުސެއިން ނިހާނަށް ލިބުނެވެ. އޭނާ ބޮލުން ފޮނުވާލި ބޯޅަ ދިޔައީ ދަނޑި ކައިރިން ބޭރަށެވެ.
އޭގެ ފަހުން މާޒިޔާގެ ދެ ހަމަލާއެއް ފެނިގެން ދިޔައެވެ. މާޒިޔާގެ ދެ ހަމަލާވެސް ފެނިގެން ދިޔައީ ޔަސްފާދު ހަބީބު (މުލަކޭ)ގެ ފަރާތުންނެވެ. ރީތި ކުޅުމަކާއެކު މާޒިޔާއިން މެޗުގެ 22 ވަނަ މިނެޓުގައި ތަނަވަސްކުރި ފުރުސަތު މުލަކޭ ވަރަށް ބާރަށް ފޮނުވާލި ނަމަވެސް ހުރަހަކަށްވީ ވިކްޓަރީގެ ކީޕަރު މުހައްމަދު އިމްރާނެވެ. އޭގެ ތިން މިނެޓް ފަހުން މުލަކޭގެ އިތުރު ހަމަލާއެއް ފެނިގެން ދިޔަ އިރު، އެ ހަމަލާ ދިޔައީ ގޯލާ އަމާޒުނުވެ މަތިންނެވެ.
ހާފް ނިމުމުގެ ކުރިން ވިކްޓަރީގެ އަހުމަދު ނާޝިދު (ނާއްޓޭ)އަށްވެސް ވަނީ ގޯލް ހުޅުވާލަން ރަނގަޅު ފުރުސަތެއް ލިބިފައެވެ. މެދުތެރެއިން ދިން ތުރޫ ބޯޅައަށް ހުސްކޮށް، މާޒިޔާގެ އޭރިއާ ތެރެއަށް ވަދެ އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެ ބޭރަށެވެ.
މާލޭ ލީގުގެ ދެވަނަ ބުރުގައި މާޒިޔާއި ވިކްޓަރީ ވާދަކުރި މެޗުގެ ތެރެއިން: އެ މެޗު 1-0ގެ ނަތީޖާއަކުން ކާމިޔާބުކުރީ މާޒިޔާ --- ފޮޓޯ/ އެފްއޭއެމް
މެޗުގެ ދެވަނަ ހާފްގައި ރަނގަޅު ހަމަލާތަކެއް ލިބުނީ މާޒިޔާއަށެވެ. އެގޮތުން ނާއިޒް ހަސަން (ދާދު)ގެ ބާރު ހަމަލާއެއް ފެނިގެން ދިޔަ އިރު، ކެޕްޓަން އަސަދުﷲ އަބްދުﷲ (އަސައްކޮ)ގެ ހުރަހަކުން ކޯނެލިއަސްއަށް ލިބުނު ހަމަލާވެސް ފާހަގަކޮށްލެވުނެވެ.
މެޗުގެ 83 ވަނަ މިނެޓުގައި އަސައްކޮ ރީތި ޝޮޓެއްވެސް ގޯލާ އަމާޒުނުވެ މަތިން ދިޔަ އިރު، ކޯނެލިއަސް މާޒިޔާއަށް ލީޑު ނަގައިދިނީ މެޗުގެ 86 ވަނަ މިނެޓުގައެވެ. ބަދަލު ކުޅުންތެރިއެއް ގޮތުގައި ކުޅެން ނުކުތް އާދަމް ނާސިހު (އާދަންނާ)ގެ ކޯނަރަކުން ސްޓެވާޓް ގޯލަށް ވައްދާލީ ބޮލުންނެވެ.
މިރޭގެ މެޗަށް ވިކްޓަރީން ނުކުތީ އެންމެ ބިދޭސީ ކުޅުންތެރިއަކާ އެކުގައެވެ. އާއްމުކޮށް އެޓީމުގެ ފުރަތަމަ 11އިން ފެންނަ އެންހާލް ކަރެސްކޯ މުނޯޒާއި ޕެޑްރޯ ހެންރިކޭ އަދި ޑިފެންޑަރު ޖޯކުއިން ކާލޯސްވެސް މިރޭ ސްކޮޑުގައި ނުހިމެނެއެވެ. އޭގެ ތެރެއިން ޑިފެންޑަރު ޖޯކުއިން ހުރީ ސަސްޕެންޝަނުގައެވެ.
މާލޭ ލީގުގެ ދެވަނަ ބުރުގައި މާޒިޔާއި ވިކްޓަރީ ވާދަކުރި މެޗުގެ ތެރެއިން: އެ މެޗު 1-0ގެ ނަތީޖާއަކުން ކާމިޔާބުކުރީ މާޒިޔާ --- ފޮޓޯ/ އެފްއޭއެމް
މެޗުން މޮޅުވެ މާޒިޔާއަށް 13 މެޗުން 24 ޕޮއިންޓް ލިބޭ އިރު، އެޓީމު އޮތީ ތާވަލުގެ ދެވަނައިގައެވެ. މާލޭ ލީގުގައި ބާކީ އެއް މެޗު އެޓީމަށް އޮތް އިރު، އެއް ވަނައިގައި އޮތް ނިއުއާ 10 ޕޮއިންޓްގެ ފަރަގެއް އެބައޮތެވެ. މިރޭގެ މެޗުން ބަލިވި ވިކްޓަރީ ފަސް ވަނައިގައި އޮތީ 13 މެޗުން 19 ޕޮއިންޓާއެކުގައެވެ.
މާލޭ ލީގުގެ މެޗެއް މާދަމާ ރޭވެސް އޮންނާނެއެވެ. މާދަމާ ރޭ 10:00ގައި އޮންނަ މެޗުގައި ވާދަކުރާނީ ކްލަބު އީގަލްސްއާ ޔުނައިޓެޑް ވިކްޓަރީއެވެ.