މެޑްރިޑް (ޖޫން 1): ސްޕެއިންގެ ބޮޑުވަޒީރު މަރިއާނޯ ރަހޯއިގެ އިތުބާރު ނެތްކަމަށް އެގައުމުގެ ގާނޫނު ހަދާ މަޖިލީހުން މިއަދު ފާސްކޮށް، އޭނާ މަގާމުން ދުރުކޮށްފިއެވެ.
މީގެ ހަތް އަހަރު ކުރިން ބޮޑުވަޒީރުކަމަށް ވަޑައިގެންނެވި ރަހޯއިގެ އިތުބާރު ނެތް ކަމަށް މިއަދު މަޖިލީހުގެ 180 މެމްބަރުން ވޯޓު ދެއްވި އިރު އެއާ ދެކޮޅަށް ވޯޓު ދެއްވީ 169 މެމްބަރުންނެވެ. އެހެންކަމުން އޭނާއަކީ 1977 ވަނަ އަހަރު ސްޕެއިން ޑިމޮކްރަސީއަކަށް ބަދަލުވި ފަހުން އިތުބާރު ނެތް ކަމުގެ ވޯޓަކުން ދުރުކުރި ފުރަތަމަ ބޮޑުވަޒީރެވެ.
އެ ވޯޓަށްފަހު ވާހަކަ ދައްކަވަމުން ރަހޯއި ވަނީ ސްޕެއިންގެ ބޮޑުވަޒީރުކަން ކުރެއްވުމަކީ އޭނާއަށް ލިބިވަޑައިގަތް ޝަރަފެއް ކަމަށް ވިދާޅުވެފައެވެ. އަދި އޭނާ ވެރިކަމަށް ވަޑައިގެންނެވި އިރާ އަޅާ ބަލާއިރު ސްޕެއިންގެ ހާލަތު ރަނގަޅު ކަމަށާއި، ދެން އަންނަ ބޮޑުވަޒީރަކު މަގާމުން ވަކިވާ އިރު އެފަދައިން ވިދާޅުވެވޭނެ ކަމަށް އުއްމީދު ކުރައްވާ ކަމަށް ވިދާޅުވެފައެވެ.
ރަހޯއިއާ ދެކޮޅަށް އިތުބާރު ނެތްކަމުގެ ވޯޓެއް ނަގަން އިދިކޮޅު ސޯޝަލިސްޓް ވޯކާސް ޕާޓީން ނިންމީ އޭނާގެ ޕީޕަލްސް ޕާޓީން ކޮރަޕްޝަނުގެ ސްކީމެއް ކުރިއަށް ގެންދިޔަކަން ސްޕެއިންގެ ހައި ކޯޓުގައި ސާބިތުވެ، ޕާޓީ ޖޫރިމަނާ ކުރި ފަހުންނެވެ. ދިހަ އަހަރު ވަންދެން ކުރިއަށް ގެންދިޔަ އެސްކީމުގައި ޕީޕަލްސް ޕާޓީން ވަނީ ސަރުކާރުގެ ކޮންޓްރެކްޓުތަކެއް ދިނުމުގައި ރިޝްވަތު ނަގާފައިކަން ކޯޓުގައި ވަނީ ސާބިތުވެފައެވެ.
އެ މައްސަލައިގައި ޕީޕަލްސް ޕާޓީގެ ކުރީގެ ހަޒާންދާރުގެ މައްޗަށް ވަނީ 33 އަހަރުގެ ޖަލު ހުކުމެއް މިދިޔަ މަހުކޮށްފައެވެ.
ސްޕެއިންގެ ގާނޫނު އަސާސީގައިވާ ގޮތުން އިތުބާރު ނެތްކަމުގެ ވޯޓު ކާމިޔާބުވެއްޖެ ނަމަ، ދެން ވެރިކަން ކުރަން ޖެހޭނީ ވޯޓު ނަގަން ހުށަހެޅި ޕާޓީންނެވެ. އެހެންކަމުން އެގައުމުގެ ބޮޑުވަޒީރުކަމަށް ދެން ވަޑައިގަންނަވާނީ ސޯޝަލިސް ވޯކާސް ޕާޓީގެ ލީޑަރު ޕެޑްރޯ ސަންޗޭޒްއެވެ.
(ބީބީސީ)