މަނާގުއާ (މޭ 30): ނިކަރާގުއާގެ ރައީސާ ދެކޮޅަށް އެގައުމުގައި ކުރަމުންދާ މުޒާހަރާތައް ހުއްޓުވުމަށް ސަރުކާރުން ހަތިޔާރު އެޅި ޖަމާއަތްތަކާ ގުޅިގެން މަސައްކަތް ކުރި ކަމަށް އެމްނެސްޓީ އިންޓަނޭޝަނަލްއިން ބުނެފިއެވެ.
ނިކަރާގުއާގައި މިދިޔަ އޭޕްރިލް މަހު މުޒާހަރާތައް ފެށުނީ ޕެންޝަން ކުޑަކުރުން ފަދަ އިސްލާހުތަކެއް އެގައުމުގެ ވެލްފެއާ ސިސްޓަމަށް ގެނައުމާ ގުޅިގެންނެވެ.
ނަމަވެސް ފަހުން އެމުޒާހަރާތައް ވަނީ ފުޅާވެ، ރައީސް ޑެނިއެލް އޯޓޭގާއާއި އޭނާގެ އަނބިކަނބަލުން އަދި ނައިބު ރައީސް، ރޮޒާރިއޯ މުރީލޯގެ އިސްތިއުފާއަށް ގޮވާލާ މުޒާހަރާތަކަށް ބަދަލުވެފައެވެ. އެމުޒާހަރާތަކުގައި މަރުވި މީހުންގެ އަދަދު 83އަށް އަރާ ކަމަށް އެމްނެސްޓީން ބުންޏެވެ.
އެޖަމިއްޔާއިން އިއްޔެ ނެރުނު ރިޕޯޓެއްގައިވާ ގޮތުން ނިކަރާގުއާގެ ސަރުކާރުން ވަނީ ގައުމުގެ ރައްޔިތުންގެ ހައްގުތަކަށް އަރައިގަނެފައެވެ. އަދި މުޒާހަރާތަކުގައި ހާލަތާ ނުބައްދަލު ބާރުގެ ބޭނުންކޮށް، ސަރުކާރަށް ތާއީދުކުރާ ހަތިޔާރު އެޅި ޖަމާއަތްތަކާ ގުޅިގެން ގާނޫނާ ހިލާފަށް މީހުން މަރާފައިވުމަކީ އެކަށީގެންވާ ކަމެއް ކަމަށް ބުނެފައެވެ.
މީގެ އިތުރުން އެގުރޫޕުތަކުން މުޒާހަރާގެ ބައިވެރިންނަށް ބަޑިން ހަމަލާދީފައިވާ ކަމަށާއި އެހަމަލާތައް ދެނީ ސަލާމަތީ ފައުޖުތަކުގެ ރުހުމާ އެއްކޮށް ކަމަށް ބެލެވޭ ކަމަށް އެމްނެސްޓީގެ ރިޕޯޓުގައި ވެއެވެ.
އޭގެ ސަބަބުން އެޖަމިއްޔާއިން ވަނީ ނިކަރާގުއާގެ މުޒާހަރާތަކުގައި ހިނގަމުންދާ ހަމަނުޖެހުންތަކުގެ މިނިވަން ތަހުގީގެއް ކުރުމަށް ހުއްދަ ދިނުމަށް ސަރުކާރަށް ގޮވާލާފައެވެ.
މީގެ ކުރިން އިންޓަ އެމެރިކަން ކޮމިޝަން އޮން ހިއުމަން ރައިޓްސްއިން ވަނީ ނިކަރާގުއާއަށް ގޮސް އެގައުމުގެ މުޒާހަރާތަކުގައި ސަރުކާރުން އަމަލު ކުރާ ގޮތް ބަލާފައެވެ. އަދި އެޖަމިއްޔާއިން ވަނި މުޒާހަރާތަކުގައި ގައުމުގެ ސަލާމަތީ ފައުޖުތަކުންނާއި ހަތިޔާރު އެޅި ޖަމާއަތްތަކުން ހާލަތާ ނުބައްދަލު ބާރުގެ ބޭނުންކޮށްފައި ވާކަމަށް ބުނެފައެވެ.
އޭގެ ސަބަބުން ނިކަރާގުއާގެ ގާނޫނު ހަދާ މަޖިލީހުން ވަނީ މުޒާހަރާގައި ގިނަ އަދަދެއްގެ މީހުން މަރުވި މަައްސަލަ ތަހުގީގުކުރަން ކޮމިޝަނެއް އެކުލަވާލާފައެވެ. އަދި އެކޮމިޝަނުން މަސައްކަތް ކުރާނީ މިނިވަންކޮށް ކަމަށް ބުނެފައެވެ.
(ބީބީސީ)