އިނގިރޭސިވިލާތުގެ މެންޗެސްޓާ ޔުނައިޓެޑަށް ކުޅެމުން އަންނަ ފޯވަޑް އެންތޮނީ މާޝިއަލްއާއި އާސެނަލްގެ ފޯވަޑް އެލެކްޒެންޑްރާ ލަކަޒެޓް ނުލައި ފްރާންސްގެ ވޯލްޑް ކަޕް ސްކޮޑު އިއުލާން ކޮށްފިއެވެ.
ފްރާންސްއިން އިއްޔެ އިއުލާންކުރި 23 ކުޅުންތެރިންގެ ސްކޮޑުގައި މާޝިއަލް ހިމެނިފައިނުވާ އިރު، ބާސެލޯނާގެ އޮސްމާން ޑެމްބޭލޭއަށް ވަނީ ފުރުސަތު ދީފައެވެ. މީގެ އިތުރުންވެސް ރެއާލް މެޑްރިޑްގެ ފޯވަޑް ކަރިމް ބެންޒެމާއަށް މިފަހަރުވެސް ފުރުސަތު ދީފައެއް ނުވެއެވެ.
މާޝިއަލް ވަނީ މި ސީޒަންގައި ޔުނައިޓެޑަށް މޮޅު ކުޅުމެއް ދައްކައިފައެވެ. ސީޒަންގައި ކުރީ ކޮޅުގައި ޔުނައިޓެޑްގެ ފުރަތަމަ 11އިން ޖާގަ ހޯދި ނަމަވެސް އޭނާ އަށް ސީޒަންގެ ފަހު ކޮޅުގައި ފުރަތަމަ 11އިން ޖާގަ ލިބިފައެއް ނުވެއެވެ. މާޝިއަލް ވަނީ ފްރާންސްގެ ގައުމީ ޓީމަށް 18 މެޗު ކުޅެދީފައެވެ. އަދި އެންމެފަހުން މާޗް މަސް ތެރޭގައި ރަޝިޔާއާ ދެކޮޅަށް ފްރާންސް ކުޅުނު އެކުވެރިކަމުގެ މެޗުގައިވެސް މާޝިއަލް ފެނިގެން ގޮސްްފައިވެއެވެ.
މި ސީޒަންގައި އާސެނަލަށް ބަދަލުވި ލަކަޒެޓް ވަނީ މިހާތަނަށް ގައުމީ ޓީމަށް 16 މެޗު ކުޅެދީފައެވެ. އޭނާ އެންމެފަހުން ގައުމީ ޓީމަށް މެޗެއް ކުޅެދީފައި ވަނީ މިދިޔަ އަހަރު ނޮވެންބަރު މަހުގައެވެ. މާޝިއަލްއާއި ލަކަޒެޓްވެސް ފްރާންސްގެ ސްޓޭންޑްބައި 11 ކުޅުންތެރިންގެ ތެރޭގައި ހިމެނެއެވެ. އެ ލިސްޓްގައި ކްރިސްޓަލް ޕެލެސްގެ މަމަޑޫ ސަކޯއާއި ޗެލްސީގެ ކޯޓު ޒޫމާ އަދި ޓޮޓެންހަމްގެ މޫސާ ސިސޯކޯވެސް ހިމެނެއެވެ.
ބުދަ ދުވަހުގެ ރޭ ކުޅުނު ޔޫރޮޕާ ލީގުގެ ފައިނަލްގައި އަނިޔާވި މާސޭގެ މިޑްފީލްޑަރު ޑިމިޓްރީ ޕަޔެޓަށްވެސް ފްރާންސް ސްކޮޑުން ޖާގަ ގެއްލިފައިވާ އިރު، މެންޗެސްޓާ ސިޓީއަށް ކުޅޭ ޑިފެންޑަރު ބެންޖަމިން މެންޑީއާއި ޗެލްސީގެ ދެ ކުޅުންތެރިން ކަމަށްވާ އެންގޯލޯ ކަންޓޭއާއި އޮލިވިއާ ޖިރޫއަށްވެސް ފްރާންސް ސްކޮޑުން ޖާގަ ލިބިފައިވެއެވެ.
ސެވިއްޔާގެ މިޑްފީލްޑަރު ސްޓީވް އެންޒޮންޒީއާއި މާސޭގެ ފޯވަޑް ފްލޮރިން ތައުވީންވެސް ފްރާންސްގެ ސްކޮޑުގައި ހިމެނިފައިވެއެވެ.
ފްރާންސްގެ ސްކޮޑުގައި ހިމެނުނު 23 ކުޅުންތެރިން:
ގޯލް ކީޕަރުން - ހޫގޯ ލޮރީސް (ޓޮޓެންހަން)، ސްޓީވް މަންޑަންޑާ (މާސޭ)، އަލްފޯންސޭ އަރެއޯލާ (ޕީއެސްޖީ)
ޑިފެންޑަރުން - ލޫކަސް ހެނާންޑޭޒް (އެތުލެޓިކޯ މެޑްރިޑް)، ރެސްނެލް ކިމްޕެންބޭ (ޕީއެސްޖީ)، ބެންޖަމިން މެންޑީ (މެންޗެސްޓާ ސިޓީ)، ބެންޖަމިން ޕަވާޑް (ސްޓަޓްގާޑް)، އެޑިލް ރާމީ (މާސޭ)، ޑެބްރިލް ސިޑިބޭ (މޮނާކޯ)، ސަމިއުލް އުމިޓީޓީ (ބާސެލޯނާ)، ރަފޭލް ވަރާން (ރެއާލް މެޑްރިޑް)
މިޑްފީލްޑަރުން - އެންގޯލޯ ކަންޓޭ (ކަންޓޭ)، ބްލައިސް މަޓުއީޑީ (ޔުވެންޓަސް)، ސްޓީވް އެންޒޯންޒީ (ސެވިއްޔާ)، ޕައުލް ޕޮގްބާ (މެންޗެސްޓާ ޔުނައިޓެޑް)، ކޮރެންޓިން ޓޮލީސޯ (ބަޔާން މިއުނިކް)
ފޯވަޑުން- އޮސްމާން ޑެމްބޭލޭ (ބާސެލޯނާ)، ނާބިލް ފަކީރް (ލިޔޯން)، އޮލިވިއާ ޖީރޫ (ޗެލްސީ)، އެންޓޮއިން ގްރީޒްމަން (އެތުލެޓިކޯ މެޑްރިޑް)، ތޯމަސް ލެމާ (މޮނާކޯ)، ކިލިއަން އެމްބާޕޭ (ޕީއެސްޖީ)، ފްލޮރިން ތައުވީން (މާސޭ)