(ކްރާބީ، ތައިލެންޑުން):
ތައިލެންޑްގެ މަޝްހޫރު ބައިނަލްއަގުވާމީ ހޮޓެލް ޗެއިން ސިންހަ އެސްޓޭޓުން އެގައުމުގައި ހިންގާ ރިސޯޓެއްގައި ކަނޑުގެ ދިރުންތަކާ ބެހޭ މައުލޫމާތު ފޯރުކޮށްދޭ ޚާއްސަ މަރުކަޒެއް ހުޅުވައިފި އެވެ.
ސިންހަ އެސްޓޭޓަކީ ރާއްޖޭގެ އެނބޫދޫ ފަޅުގައި 800 މިލިޔަން ޑޮލަރުގެ ބޮޑު އިންވެސްޓްމެންޓަކާ އެކު ރިސޯޓުތަކެއް ތަރައްގީކުރަމުން ދާ ކުންފުންޏެވެ.
ކްރާބީ ޕްރޮވިންސްގެ ޖަޒީރާއެއް ކަމުގައިވާ "ކޮ ޕީ ޕީ ޑޮން"ގައި ސިންހަ އެސްޓޭޓުން ހިންގާ "ޕީ ޕީ އައިލެންޑް ވިލެޖު"ގައި މެރިން ޑިސްކަވަރީ ސެންޓަރު ހުޅުވީ ކޮ ޕީ ޕީ ޑޮންގައި ދިރިއުޅޭ ސްކޫލު ދަރިވަރުންނާ އެކު އިއްޔެ ބޭއްވި ރަސްމިއްޔާތަކާ އެކުގަ އެވެ.
އެ ސެންޓަރު އިއްޔެ ރަސްމީކޮށް ހުޅުވި އިރު، ސިންހަ އެސްޓޭޓުން ދަނީ އެތަނަށް ވުރެ މަތީ ފެންވަރުގެ، އަދި ސައިޒުން ބޮޑު މެރިން ޑީސްކަވަރީ ސެންޓަރެއް އެނބޫދޫ ފަޅުގައި ތަރައްގީކޮށް، ހުޅުވުމަށް ތައްޔާރުވަމުންނެވެ.
އެނބޫދޫ ފަޅުގައި ސިންހަ އެސްޓޭޓުގެ "ކްރޮސްރޯޑްސް މޯލްޑިވްސް" މަޝްރޫއުގެ ދަށުން ފުރަތަމަ ފިޔަވަހީގެ ދަށުން ދެ ރިސޯޓެއް މި އަހަރުގެ ހަތަރު ވަނަ ކުއާޓަރުގެ ތެރޭގައި ހުޅުވާ އިރު، އެކުންފުނީގެ ޗީފް ހޮސްޕިޓަލިޓީ އޮފިސަރު ޑާކް ޑެ ކުއިޕާ ވިދާޅުވީ ފުރަތަމަ ފިޔަވައްސާ އެކު މެރިން ޑިސްކަވަރީ ސެންޓަރު ވެސް ހުޅުވާނެ ކަމަށެވެ.
"ރާއްޖެއަކީ މިވަގުތު އެންމެ މުހިންމު އެއް ތަން. މާލެ ކައިރީގައި މި ބޮޑު މަޝްރޫއު ހިންގަމުން ދަނީ. މިވަގުތު ވެސް އަޅުގަނޑުމެންގެ މެރިން ބަޔޮލޮޖިސްޓުންގެ ބޮޑު ޓީމެއް ރާއްޖޭގައި ހަރަކާތްތެރިވެ، ތައްޔާރީތައް ވަމުން ދަނީ،" އޭނާ ވިދާޅުވި އެވެ.
ޑާކް ވިދާޅުވި ގޮތުގައި މެރިން ޑިސްކަވަރީ ސެންޓަރެއް ހުޅުވުމުގެ މަގްސަދަކީ ތިމާވެށި ހިމާޔަތްކުރުމާއި ތިމާވެށީގެ މުހިންމުކަމާ ބެހޭ މައުލޫމާތު އާންމު ރައްޔިތުންނަށް ދިނުމަށް ޕްރައިވެޓް ސެކްޓަރުން ވެސް ޒިންމާދާރުވުމެވެ.
"އަޅުގަނޑުމެން ވަރަށް މުހިންމު އަހަންމިއްޔަތުކަމެއް ދޭން ބޭނުންވޭ އާންމު ރައްޔިތުން ވެސް ކަންކަމުގައި ބައިވެރިކޮށް، މައުލޫމާތު މުއްސަނދި ކޮށްދޭން.
"މި ރަށުގައި މި ކޮންސެޕްޓް ރަނގަޅަށް އެބަ ހިނގާ. މި ރަށުގެ ސްކޫލުތަކުގެ ދަރިވަރުން ވަރަށް ޝައުގުވެރިވޭ މިތަނަށް އައިސް ކަނޑު އަޑީގެ ދިރުންތަކާ ބެހޭ މައުލޫމާތު ހޯދަން. މި ބަލަނީ ރާއްޖޭގައި ވެސް މި ކޮންސެޕްޓް ހިންގުން،" ޑާކް ވިދާޅުވި އެވެ.
ތައިލެންޑްގެ ދެކުނުގެ ކްރާބީ ޕްރޮވިންސްގެ ބައެއް ކަމުގައިވާ "ޕީ ޕީ އައިލެންޑްސް"ގެ ޖަޒީރާތަކުގައި 2،500 އެއްހާ ރައްޔިތުން ދިރިއުޅޭ އިރު، އޭގެ ތެރޭގައި ގިނައީ މުސްލިމުންނެވެ. ޕީ ޕީ އައިލެންޑްސް ހިމެނެނީ ތައިލެންޑްގެ "ހަޓް ނޯޕަރަޓް ތަރާ" ކިޔާ މެރިން ނެޝަނަލް ޕާކެއްގެ ތެރޭގަ އެވެ. މި ސަރަހައްދަށް އަހަރަކު ހަތް މިލިޔަން ފަތުރުވެރިން ޒިޔާރަތްކުރެ އެވެ.