ސުނާމީ ބިނާއާ އެކު، ތަފާތު ބޮޑެތި ބަދަލުތަކެއް ގެނެސް "ސުނާމީ ބިނާ މައިޒާން"ގެ ނަމުގައި 2016 ވަނަ އަހަރު ހުޅުވި ތިން ރުއް ޕާކު ސަރަހައްދު ކުއްޔަންދޭން ނިންމައިފިއެވެ.
ސަރުކާރުގެ ގެޒެޓްގައި ހައުސިން މިނިސްޓްރީން މިއަދު އާންމުކުރި އިއުލާންގައި އެ މިނިސްޓްރީން ކަނޑައަޅާ މައިޒާންތަކާއި، ޕާކުތަކާއި، ބީޗު ފަދަ ތަންތަނުގައި އެކިއެކި ހަރަކާތްތަށް ބޭއްވުމަށް ކުއްޔަށްދިނުމާއިބެހޭ އުސޫލުގައި ސުނާމީ ބިނާ މައިޒާން ކުއްޔަށް ދޫކުރަން ނިންމައިފައިވާކަން އިއުލާންކޮށް ކުއްޔަށް ދޫކުރާނެ ގަޑިތައް ވަނީ އާންމުކޮށްފައެވެ.
އެގޮތުން އަމިއްލަ ފަރުދުންނަށާއި ކުންފުނިތަކަށާއި ސްކޫލްތަކަށާއި ދަޢުލަތުގެ އެކި މުޢައްސަސާތަށާއި ޖަމިޢިއްޔާ ޖަމާޢަތްތަކަށް ގަޑިއަކަށް ކުއްޔަށްދޫކުރުމަށް ހަމަޖައްސައިފައިވަނީ 250 ރުފިޔާގެ މަގުންނެވެ.
އަދި ކުޑަކުދިންގެ ހަރަކާތްތަކަށް އަމިއްލަ ފަރުދުންނަށާއި ކުންފުނިތަކަށާއި ސްކޫލްތަކަށާއި ދަޢުލަތުގެ އެކި މުޢައްސަސާތަށާއި ޖަމިޢިއްޔާ ޖަމާޢަތްތަކަށް ގަޑިއަކަށް ކުއްޔަށް ދޫކުރުމަށް ހަމަޖައްސައިފައިވަނީ 100 ރުފިޔާގެ މަގުންނެވެ.
ތިން މިލިއަން ރުފިޔާއަށްވުރެ ކުޑަ ބަޖެޓަކުން ހައުސިން މިނިސްޓްރީން ތަރައްގީ ކުރި އެ މައިޒާނަކީ ދުންފަތުގެ އިސްތިއުމާލު ކުރުން މަނާ، އަދި ވެހިކަލް ވަނުން މަނާ ސަރަހައްދެކެވެ. ދިވެހިވަންތަ ސަގާފަތް ދައްކުވައިދޭ އެ މައިޒާނަކީ ހުރިހާ އުމުރު ފުރާއަކަށް ހާއްސަކޮށްގެން ތަފާތު ކުޅިވަރު ކުޅެވޭ ގޮތަށް ތައްޔާރުކޮށްފައިވާ މައިޒާނެކެވެ.