ކްލަބު މޯލްޑިވްސް ކަޕް 18/30 ވިމެންސް ފުޓްސަލް ފިއެސްޓާގެ ދެވަނަ ބުރުގައި އުރީދޫ އަތުން ކަސްޓަމްސް ރެކްރިއޭޝަން ކްލަބު މޮޅުވި އިރު، އެމްޕީއެލްއާއި ވެމްކޯ ބައްދަލުކުރި މެޗު އެއްވަރުވެގެން ނިމިއްޖެއެވެ.
މާފަންނު ސްޓޭޑިއަމް މިނީ ދަނޑުގައި ކުރިއަށްދާ އެ މުބާރާތުގެ ދެވަނަ ބުރު ކުރިއަށްދަނީ ދެ ގްރޫޕަކަށް ބަހާލައިގެންނެވެ. ފުރަތަމަ ބުރު ތިން ގްރޫޕަކަށް ބަހާލައިގެން ކުރިއަށްދިޔަ އިރު، ދެވަނަ ބުރަށް ދަތުރުކުރީ ކޮންމެ ގްރޫޕެއްގެ އެންމެ ކުރީގައި އޮތް ދެ ޓީމެވެ.
ރޭ ކުޅުނު ދެވަނަ ބުރުގެ ގްރޫޕް އެކެއްގެ މެޗުގައި އުރީދޫ އަތުން ކަސްޓަމްސް މޮޅުވީ 2-1ގެ ނަތީޖާއަކުންނެވެ. އެ މެޗުގައި ކަސްޓަމްސްގެ ލަނޑުތައް ކާމިޔާބުކޮށްދިނީ ޔާސްމިން އަބްދުﷲއާއި، އާމިނަތު ނަޒްރާއެވެ. އުރީދޫގެ ހަމައެކަނި ލަނޑު، އެޓީމަށް ކާމިޔާބުކޮށްދިނީ ޖޮސެފިން ބޯޖާ ލުޓޯއެވެ.
ގްރޫޕް ދޭއްގައި ރޭ އެމްޕީއެލްއާއި ވެމްކޯ ބައްދަލުކުރި މެޗު ނިމިގެންދިޔައީ 1-1ގެ ނަތީޖާއަކުން ދެ ޓީމު އެއްވަރުވެގެންނެވެ. އެ މެޗުގައި ވެމްކޯގެ ލަނޑު ފާތިމަތު އަފްޒާ ކާމިޔާބުކޮށްދިން އިރު، އެމްޕީއެލްގެ ލަނޑު ކާމިޔާބުކޮށްދިނީ ފާތިމަތު ސާލިޔާއެވެ.
ދެވަނަ ބުރުގެ ގްރޫޕް އެކެއްގެ އެންމެ ކުރީގައި އޮތް ޕޮލިސް ކްލަބާއި ކަސްޓަމްސްއަށް ވެސް އެއް މެޗުން ލިބިފައިވަނީ ތިން ޕޮއިންޓެވެ. އެ ގްރޫޕުގައި އުރީދޫ ކުޅުނު ދެ މެޗުންވެސް އެޓީމު ވަނީ ބަލިވެފައެވެ. ގްރޫޕް ދޭއްގެ އެންމެ ކުރީގައި އޮތް ޓީމް ފެނަކައަށް އެއް މެޗުން ތިން ޕޮއިންޓް ލިބިފައިވާ އިރު، އެއް މެޗު ކުޅުނު އެމްޕީއެލް އަދި ދެ މެޗު ކުޅެފައިވާ ވެމްކޯއަށް ލިބިފައިވަނީ އެއް ޕޮއިންޓެވެ.
ވިމެންސް ފުޓްސަލް ފިއެސްޓާގެ ދެވަނަ ބުރުގެ ފަހު މެޗުތައް ކުޅުމަށް ހަމަޖެހިފައިވަނީ އަންނަ ހޮނިހިރު ދުވަހުގެ ހަވީރު 4:00 ގައެވެ. ގްރޫޕް އެކެއްގައި ޕޮލިސް ކްލަބާ ދެކޮޅަށް ކަސްޓަމްސް ނުކުންނަ އިރު، ގްރޫޕް ދޭއްގައި ކުޅޭ މެޗުގައި ބައްދަލުކުރާނީ ފެނަކައާއި އެމްޕީއެލްއެވެ.