ޒިމްބާބުވޭގެ އަަސްކަރިއްޔާއިން އެގައުމަށް ގެނައި "ބަޣާވާތް" ނިމުމަކަށްގެނެސް، ކުރީގެ ވެރިކަން އަލުން އިއާދަކުރަންޖެހޭ ކަމަށް އެގައުމުގެ ކުރީގެ ލީޑަރު ރޮބަޓް މުގާބޭ ވިދާޅުވެއްޖެއެވެ.
މުގާބޭ ވެރިކަމުން ދުރުކުރިފަހުން ފުރަތަމަ ފަހަރަށް ޓިވީއަށް ދެއްވި އިންޓަވިއުއެއްގައި ވިދާޅުވީ ބަޔަކު ގަބޫލުކުރަން ބޭނުންނުވިޔަސް ޒިމްބާބުވޭއަށް ގެނައީ ބަޣާވާތެއް ކަމަށެވެ.
"މިއީ އަޅުގަނޑުމެން އަމިއްލައަށް ކުރި ލަދުވެތިކަމެއް. ކުރީގެ ވެރިކަމަށް އަލުން އިއާދަވާން ޖެހޭ،" މުގާބޭ ވިދާޅުވިއެވެ.
ޒިމްބާބުވޭގެ މިހާރުގެ ރައީސް އެމާސަން ނަންގަވާއާ އެއްވެސް ރުޅިވެރިކަމެއް ނެތް ކަމަށާއި އެހެންނަމަވެސް ނަންގަވާގެ ވެރިކަން ގާނޫނާ ޚިލާފުކަމަށްވެސް މުގާބޭ ވިދާޅުވިއެވެ.
މުގާބޭ ވިދާޅުވީ ދެން ނަންގަވާއާ އެކީ މަސައްކަތް ނުކުރައްވާނެ ކަމަށެވެ. އަދި ވިދާޅުވީ ވެރިކަމަށް އަންނަން ޖެހޭނީ ވަކި އުސޫލަކުން ކަމަށާއި އަދި އެކަމުގައި ފުރިހަމައަށް އެހީތެރިވެދިނުމަށް ތައްޔާރަށް ހުންނެވި ކަމަށެވެ.
މަގާމުން ދުރުކުރި ފަހުން މުގާބޭ އަނެއްކާވެސް ވެރިކަމަށް ވަޑައިގަތުމަށް މަސައްކަތްކުރާތަން ދަނީ ފެންނަމުންނެވެ. އެގޮތުން ދާދިފަހުން ޒިމްބާބުވޭގައި އުފެއްދި ނެޝެނަލް ޕެޓްރިއޯޓިކް ފްރަންޓް (އެންޕީއެފް) ޕާޓީއަކީ މުގާބޭ އަޑީގައި ހުންނަވައިގެން އުފެއްދި ޕާޓީއެއް ކަމަށް ވަނީ ވަރަށް ބޮޑަށް އަޑުފެތުރިފައެވެ.
ދޮންމީހުންގެ އަތްދަށުން ޒިމްބާބުވޭ މިނިވަންކުރުމަށް މަސައްކަތްކުރެއްވި އަމްބްރޯސް މުތިންހިރީ އަކީ އެންޕީއެފް ޕާޓީގެ ލީޑަރެވެ. އޭނާ ވަނީ ޒިމްބާބުވޭގެ ވެރިކަން ކުރާ ޕާޓީން މުގާބޭއާ ދޭތެރޭ އަމަލުކުރިގޮތާާ ދޭތެރޭ ހިތްހަމަނުޖެހިގެން އެ ޕާޓީންވެސް ވަކިވެވަޑައިގެންފައެވެ.
ޒިމްބާބޫވޭގެ ރިޔާސީ އިންތިހާބު އަންނަ އޮގަސްޓުމަހު ވަނީ ބޭއްވުމަށް ހަމަޖެހިފައެވެ.