އދ. ގެ އިންސާނީ ހައްގުތަކާ ބެހޭ ޖަމްއިއްޔާގެ 40 ގައުމު ގުޅިގެން ރާއްޖޭގެ ހާލަތާމެދު ކަންބޮޑުވުން ފާޅުކޮށް، ކުއްލި ނުރައްކަލުގެ ހާލަތު އުވާލުމަށް ގޮވާލައި ނެރުނު ބަޔާނަށް ރާއްޖެއިން ރައްދު ދީފިއެވެ.
އެ ބަޔާން ނެރުނީ މިހާރު ޖެނީވާގައި ކުރިއަށްދާ އިންސާނީ ހައްގުތަކާބެހޭ މަޖިލީހުގެ 37 ވަނަ ޖަލްސާގައެވެ. ބަޔާނަށް ރައްދު ދެއްވައި ރާއްޖެއިން ޖެނީވާގައި ހުންނަ އ.ދ.ގެ އޮފީހަށް ކަނޑައަޅާފައި ހުންނަވާ ދާއިމީ މަންދޫބު ޑރ. ހާލާ ޙަމީދު ދެއްވި ބަޔާނުގައި ވިދާޅުވީ ގުޅިފައިވާ ބަޔާނަކީ ހަގީގަތާ ޚިލާފު، އެއްވެސް އިޚްލާސްތެރިކަމެއް ނެތް ބަޔާނެއް ކަމަށެވެ.
ރާއްޖޭގެ ސުޕްރީމް ކޯޓުގައި ކޮރަޕްޝަންގެ ނުފޫޒު އޮތް ކަމަށް ގަބޫލު ކުރައްވާ ކަމަށާއި 1 ފެބްރުއަރީގެ އަމުރަކީ ފަނޑިޔާރުންގެ ބެންޗުގެ ފަރާތުން ފެނުނު ގާނޫނު އަސާސީއާ ތައާރުޒުވުންތަކެއް ހިމެނޭ އަމުރެއްކަމަށް ދިވެހި ސަރުކާރުން ދެކޭކަމަށް ހާލާގެ ބަޔާނުގައި ވިދާޅުވިއެވެ.
ރާއްޖެއިން އދ.ގެ ހިއުމަން ރައިޓްސް ކައުންސިލްގެ ސްޕެޝަލް މެކޭނިޒަމްސްއަށް ނުވަ ކޮމިއުނިކޭޝަނެއް މި ވޭތުވެދިޔަ ތިން އަހަރުތެރޭ ފޮނުވާފައިވާ ކަމަށާއި އަދި ހަތް ސްޕެޝަލް ރެޕަޓަރ ރާއްޖެއަށް ދަތުރުކުރެއްވި ކަމާއި، އަދި އިތުރު ދެ ސްޕެޝަލް ރެޕަޓަރއެއްގެ ދަތުރެއްގެ މަޝްވަރާ ކުރެވެމުން އަންނަކަން ހާލާ ފާހަގަކުރެއްވިއެވެ.
ހާލާގެ ބަޔާނުގައި އިތުރަށް ވިދާޅުވީ ރާއްޖެފަދަ ތަރައްގީވަމުން އަންނަ ކުޑަ ޖަޒީރާ ޤައުމެއްގެ އެންމެހާ މުއައްސަސާތައް ހަރުދަނާކޮށް އިންސާނީ ހައްޤުތަކަށް ހުރުމަތް ކުރާ ސަގާފަތެއް ގާއިމް ކުރުމަށް އިތުރު ގިނަ މަސައްކަތްތަކެއް ކުރަންޖެހޭކަން ފުރިހަމައަށް ޤަބޫލުކުރައްވާ ކަމަށެވެ.
"ނަމަވެސް އިނގިރޭސިވިލާތް އަދި ޔޫރަޕްގެ ޤައުމުތަކާ އެއްހަމައެއްގައި ރާއްޖޭގެ މުއައްސަސާތައް ހުންނާނެކަމަށް ޤަބޫލުކުރުމަކީ ހިތާމަކުރައްވާކަމެއް" ކަމަށްވެސް ހާލާގެ ބަޔާނުގައި ވިދާޅުވެފައިވެއެވެ.
ރާއްޖެއިން އދ.ގެ އޮފީހާއެކު ގުޅިގެން މައުނަވީ ހަރުދަނާ މަސައްކަތްތަކެއް އިޚްލާޞްތެރިކަމާއެކު ކުރާނެ ކަމަށާއި ދިވެހި ސަރުކާރުން މީގެ ކުރިންވެސް އެކަމަށް ފުރިހަމަ އެއްބާރުލުން ދެމުންގެންދިޔަފަދައިން ކުރިއަށް އޮތްތާނގައިވެސް އެއްބާރުލުން ދިނުމަށް ސަރުކާރުން ތައްޔާރަށް އޮތް ކަމަށްވެސް ބަޔާނުގައި ވިދާޅުވެފައިވެއެވެ.