ރާއްޖޭގެ މަސައްކަތްތެރި އަދި މަސައްކަތެއް ފަށަން ބޭނުންވާ ކަނބަލުންނަށް ޚާއްސަކޮށްގެން އިކޮނަމިކް މިނިސްޓްރީން ހުޅުވާލި ލޯން ލޯން ސުކީމަށް ހުށައެޅުމުގެ މުއްދަތު އިތުރުކޮށްފިއެވެ.
އެ ލޯނަށް އެދި ހުށައެޅުމުގެ ފުރުސަތު އިތުރުކޮށްފައިވަނި މި މަހުގެ 15 ވަނަ ދުވަހުގެ ނިޔަލަށެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި އިކޮނަމިކް މިނިސްޓްރީގެ ޑެޕިއުޓީ މިނިސްޓަރު އާދަމް ތައުފީގް ވިދާޅުވީ، ކަނބަލުންނަށް ހާއްސަ ލޯން ސްކީމަށް އެދި ހުށައެޅުމުގެ މުއްދަތު އިތުރު ކުރީ ވީހާވެސް ގިނަބަޔަކަށް އެ ފުރުސަތު ދިނުމުގެ ގޮތުން ކަމަށެވެ. އަދި މިހާތަނަށް 150 އަށްވުރެ ގިނަ މީހަކު އެ ލޯން ސްކީމަށް އެދި ހުށަހަޅާފައިވާ ކަމަށްވެސް އޭނާ ވިދާޅުވިއެވެ.
ކުރިން ހަމަޖައްސާފައި ވަނީ 50،000 ރުފިޔާ އާއި 100،000 ރުފިޔާއާ ދެމެދުގެއަދަދަށް ލޯނު ދޫކުރުމަށެވެ. އަލަށް މުއްދަތު އިތުރުކުރީ 200،000 ރުފިޔާ އާ ހަމައަށްވެސް ލޯން ނެގުމުގެ ފުރުސަތާއެކުއެވެ.
ތައުފީގު ވިދާޅުވީ ކުރިން ލޯނަށް އެދި ހުށަހަޅާފައިވާ މީހުންނަށް ލޯނުގެ އަދަދު އިތުރު ކުރުމުގެ ފުރުސަތު ލިބޭނެ ކަމަށެވެ.
ލޯނުގެ އަދަދު 50،000 ރުފިޔާއަށް ނާރާނަމަ ރަހުނެއް ބަހައްޓަން ނުޖެހުނު ނަމަވެސް 50،000 ރުފިޔާ އާއި 200،000 ރުފިޔާ އާ ދެމެދުގެ ލޯނެއް ނަގާނަމަ، ނަގާ އަދަދުގެ 130 ޕަސެންޓްގެ، ބޭންކުން ގަބޫލު ކުރާ ރަހުނެއް ބަހައްޓަށް ޖެހޭނެ ކަމަށް އިކޮނަމިކް މިނިސްޓްރީން ބުންޏެވެ.
ލޯންގެ އިންޓްރެސްޓް ރޭޓްގެ ގޮތުގައި ހަމަޖައްސާފައި ވަނީ ނުވަ ޕަސެންޓެވެ. އަދި ގިނަވެގެން އަށް އަހަރު ދުވަހުގެ ތެރޭގައި ލޯނު ދައްކައި ޚަލާސްކުރަން ޖެހޭނެ ކަމަށް އެ މިނިސްޓްރީން ބުންޏެވެ.
އިކޮނޮމިކް މިނިސްޓްރީން ބުނީ، އެ މިނިސްޓްރީގެ އިތުރުން އަތޮޅުތެރޭގެ ހަ ސަރަހައްދެއްގައި ގާއިމްކޮށްފައިވާ ބިޒްނަސް ސެންޓަރުތަކަށް ވެސް ލޯނަށް އެދި ހުށަހެޅޭނެ ކަމަށެވެ. އަދި އޮންލައިންކޮށް ވެސް ލޯނަށް އެދުމުގެ ފުރުސަތު އޮންނާނެ ކަމަށް އެ މިނިސްޓްރީން ބުންޏެވެ.
ލޯން ދޫކުރަން ހަމަޖެހިފައި ވަނީ ޕްރޮޕޯސަލް ހުށަހަޅާ މީހުން އިވެލުއޭޓް ކުރުމަށްފަހުގައި ކަމަށް އެ މިނިސްޓްރީން ބުންޏެވެ.
އެ މިނިސްޓްރީން ބުނީ، މިއަހަރު 190 މިލިއަން ރުފިޔާގެ ލޯނު ޕްރޮގްރާމްތައް ކުރިއަށްގެންދާނެ ކަމަށެވެ. އޭގެ ތެރޭގައި ގެޓްސެޓްލޯން، އެސްއެމްއީ ލޯން ވެސް ދޫކުރަން ހަމަޖެހިފައިވާ ކަމަށް އެ މިނިސްޓްރީން ބުންޏެވެ.