ސަރުކާރުން އިދިކޮޅު ޕާޓީތަކާއެކު މަޝްވަރާ ކުރުމަށް ހުށަހެޅި ފުރުސަތުގައި އިދިކޮޅު އެމްޑީޕީން އެ ޕާޓީގެ އަމިއްލަ މަސްލަހަތު އޮންނަ ބައެއް ވިޔަފާރިތަކާ ގުޅޭ ކަންކަންވެސް ހުށަހަޅާފައިވާ ކަމަށް ސިޔާސީ ޕާޓީތަކާ ބެހޭ މަޝްވަރާ މަޖިލީހުގެ ޗެއާމަން ޑރ. މުހައްމަދު ޝައިނީ ވިދާޅުވެއްޖެއެވެ.
ޕީއެސްއެމްއިން ގެނެސްދިން "އެންމެ ފުރަތަމަ ގައުމު" ޕްރޮގްރާމްގައި ވާހަކަފުޅު ދައްކަވަމުން ޝައިނީ ވިދާޅުވީ މީގެ ކުރިން 10 ފަހަރެއްގެ މަތިން އިދިކޮޅު ފަރާތްތަކަށް މަޝްވަރާގެ ދައުވަތު ދެވިފައިވާ ކަމަށެވެ. ނަމަވެސް އަބަދުވެސް ކޮންމެވެސް ބަހާނާއެއް ދެއްކެވުމަށް ފަހު މަޝްވަރާއަށް އައުމަށް އެ ފަރާތްތަކުން ދެކޮޅު ހަދާކަމަށް ވިދާޅުވިއެވެ.
ޝައިނީ ވިދާޅުވީ ހަނގުރާމައިގެ މާހައުލު އޮންނަ ގައުމުތަކުގައިވެސް "މަޝްވަރާގެ މަތިވެރި އުސޫލުގެ ބޭނުން ހިފައި" ކަމަށާއި، ނަމަވެސް ރާއްޖޭގައި އެ ފުރުސަތު ނެތް ކަމަށެވެ. ސަބަބެއް ކަމަށް ޝައިނީ ވިދާޅުވީ އިދިކޮޅުން ހުށަހަޅާ ޝަރުތުތައް ކަމަށެވެ.
"މަޝްވަރާއަށް ހުޅުވާލުމުން މި ހުށަހަޅަނީ ބައިވަރު ޝަރުތުތަކެއް. އޭގެ ތެރޭގައި އެމްޑީޕީން އެބައޮތް މީގެ ކުރިން އެ ޕާޓީގެ ވަކިވަކި މެމްބަރުންގެ މަސްލަހަތު އޮންނަ ވިޔަފާރިތަކާ ގުޅޭ ޝަރުތުތައްވެސް ހުށަހަޅާފައި،" ފިޝަރީޒް މިނިސްޓަރުކަންވެސް ކުރައްވަމުން ގެންދަވާ ޝައިނީ ވިދާޅުވިއެވެ.
ޝައިނީ ވިދާޅުވީ އިދިކޮޅު ފަރާތްތަކާ އަދިވެސް މަޝްވަރާކުރަން ބޭނުންވާ ކަމަށާއި، ސަރުކާރުން އޮތީ މަޝްވަރާގެ ތެރެއިން ކަންކަން ހައްލުކުރަން އެއްބާރުލުން ދޭ ގޮތަށް ކަމަށެވެ.
ރިޔާސީ އިންތިހާބުގެ މިނިވަން ކަމާމެދު އިދިކޮޅު ފަރާތްތަކުން ސުވާލު އުފައްދާ މައްސަލާގައި ޝައިނީ ވިދާޅުވީ "މިއަހަރު ރާއްޖޭގައި ބާއްވާ އިންތިހާބަކީ މިނިވަން އިންތިހާބަކަށް ވެގެންދާނެ" ކަމަށެވެ. އަދި ވިދާޅުވީ ސަރުުކާރުން ބޭނުންވަނީ އިންތިހާބެއްގެ ތެރެއިން ކުރިއަށްއޮތް ފަސް އަހަރަށް ރައީސް ޔާމީން ވެރިކަމަށް އައުން ކަމަށާއި، އެ މަގު ރައްޔިތުން ތަނަވަސް ކޮށްދޭނެ ކަމާމެދު ޝައްކެއްނެތް ކަމަށެވެ.
ޝައިނީ ވިދާޅުވީ ސަރުކާރުން އިންތިހާބެއް ބޭނުންވިޔަސް ހަގީގަތަކީ "އިދިކޮޅުގެ ވިސްނުމުގައި މިނިވަން އިންތިހާބެއް ބާއްވައިގެން ވެރިއަކު ހޮވުމުގެ އެއްވެސް ވިސްނުމެއް" ނެތް ކަމަށެވެ.