މޯލްޑިވްސް ރޯޑް ޑިވެލޮޕްމެންޓް ކޯޕަރޭޝަން (އެމްއާރްޑީސީ) އިން ކުރި ބައެއް މަސައްކަތްތައް ހައުސިން މިނިސްޓްރީގެ ދަށަށް ބަދަލުކޮށްފި އެވެ.
ސަން އަށް އެނގިފައިވާ ގޮތުގައި އެމްއާރްޑީސީގެ ޕްރޮޖެކްޓްސް ޑިޕާޓްމެންޓުގައި މަސައްކަތްކުރި ބައެއް މުވައްޒަފުން މިހާރު މަސައްކަތް ކުރަނީ ހައުސިން މިނިސްޓްރީގެ ޕަބްލިކް ވޯކްސް ޑިޕާޓުމެންޓުގަ އެވެ. އެ މުވައްޒަފުން ޕަބްލިކް ވޯކްސް އަށް ބަދަލުކޮށް، ކޮންޓްރެކްޓުގައި ސޮއިކުރީ މިދިޔަ މަހުގެ ތެރޭގައި ކަމަށް ވެސް އެނގިފައިވެ އެވެ.
އެމްއާރްޑީސީ ރީ ސްޓްރަކްޗާ ކުރަން އުޅޭ ކަމަށް ވެސް ދާދިފަހުން ވަނީ ވާހަކަ ދެކެވިފަ އެވެ. އެ ކުންފުނީގައި މަސައްކަތްކުރި ބައެއް މުވައްޒަފުން ހައުސިންގެ ޕަބްލިކް ވޯކްސް އަށް ބަދަލުކުރީ ރީ ސްޓްރަކްޗާ ކުރަން ކުރާ މަސައްކަތުގެ ދަށުން ކަމަށް އެނގިފައިވެ އެވެ.
ރާއްޖޭގެ މަގުތައް މަރާމާތުކޮށް ހެދުމަށް އުފެއްދި އެމްއާރްޑީސީގެ ދަށުން ބައެއް ރަށްރަށުގެ މަގުހެދުމާއި ފުޓްސެލް ދަނޑު ހެދުމުގެ މަސައްކަތްތައް ކުރިއަށް އެބަދެ އެވެ.