އެއްވެސް ޝަރުތެއް ކުރިމަތި ނުކޮށް މަޝްވަރާގެ މޭޒުގައި އިށީނުމަށް ސަރުކާރުން އަނެއްކާވެސް ސިޔާސީ ޕާޓީތަކަށް ގޮވާލައިފިއެވެ.
ފެބުރުއަރީ އެކެއްގައި ސިޔާސީ ކުށްވެރިން ދޫކޮށްލަން ބުނެ ސުޕްރީމް ކޯޓުން އަމުރު ނެރުމަށް ފަހު ހިނގައި ދިޔަ ކަންކަމުގެ ތެރޭގައި ސަރުކާރުން ވަނީ ދެ ފަހަރަކަށް ޕާޓީތަކަށް މަޝްވަރާތަކަށް ދައުވަތު ދީފައެވެ.
ޕާޓީތަކުން ބުނެފައިވަނީ ސަރުކާރާ އެކު ސީދާ ގޮތުން ކުރާނެ މަޝްވަރާއެއް ނޯންނާނެ ކަމަށާއި މެދުވެރިއަކަށް އދ. ބައިވެރިވެގެން މަޝްވަރާ ކުރެވިދާނެ ކަމަށެވެ.
މަޝްވަރާގެ ކަންކަމުގައި ސަރުކާރުގެ ފަރާތުން އެންމެ އިސްކޮށް ހަރަކާތްތެރިވާ، ފިޝަރީޒް މިނިސްޓަރު ޑރ މުހައްމަދު ޝައިނީ މިއަދު ކުރެއްވި ޓްވީޓެއްގައި ވިދާޅުވީ އެއްވެސް ޝަރުތަކާ ނުލައި ޕާޓީ މަޝްވަރާތަކުގައި ބައިވެރިވާން ސަރުކާރުން ގޮވަލާ ކަމަށެވެ.
އަދި ޔޫރަޕިއަން ޔޫނިއަން (އީޔޫ) ނިންމުމުގައި މަޝްވަރާތަކުގެ މުހިންމު ކަމަށް ބާރު އަޅާފައިވާކަން ޝާއިނީ ވަނީ ފާހަގަ ކުރައްވާފައެވެ.
ޝައިނީ އެހެން ވިދާޅުވެފައި ވާއިރު ރާއްޖޭގެ ސިޔާސީ މަސްރަހުގައި ހިނގަމުންދާ ބައެއް ކަންކަމާ މެދު ކަންބޮޑުވުން ފާޅުކޮށް ޔޫރަޕިއަން ކައުންސިލްގެ ފޮރިން އެފެއާޒް ކައުންސިލުން ވަނީ ގަރާރެއް ފާސްކޮށްފައެވެ.
އެގޮތުން އެ ގަރާރުގައި، ރާއްޖޭގައި މިމަހުގެ ފަސް ވަނަ ދުވަހުން ފެށިގެން އިއުލާން ކޮށްފައިވާ ކުއްލި ނުރައްކަލުގެ ހާލަތު އުވާލައި މިނިވަން އިންސާފުވެރި އަދި އެންމެންނަށް ބައިވެރިވެވޭނެ ފަދަ ރިޔާސީ އިންތިހާބެއް ބޭއްވުމަށް މަގުފަހިކުރުމަށްޓަކައި، އިދިކޮޅު ސިޔާސީ ފަރާތްތަކާއެކު މަޝްވަރާ ކުރުމަށް ގޮވާލައިފައިވެއެވެ. އަދި ކޯޓުތަކަށް ނުފޫޒު ފޯރުވަމުންދާ ކަމަށް ބުނެ އެކަން ވަނީ ކުށްވެރިކޮށްފައެވެ.
އަދި ރާއްޖޭގެ ހާލަތު ރަގަނޅު ނުވާނަމަ، ރާއްޖެއާމެދު "ޓާގެޓެޑް މެޝާޒް" އަޅާނެ ކަމަށް ގަރާރުގައި ބުނެފައިވެ އެވެ. ނަމަވެސް އެއީ ކޮން ފިޔަވަޅުތަކެއް ކަމެއް ބުނެފައެއް ނުވެއެވެ.
މީގެ ކުރިންވެސް ޕާޓީތަކުން ވަނީ މަޝްވަރާގެ މޭޒުގައި އިށީނުމުގެ ކުރިން ގިނަ ޝަރުތުތަކެއް ހުށަހަޅައިފައެވެ.
އިދިކޮޅު ސިޔާސީ ޕާޓީތަކުން ބުނެފައި ވަނީ މިހާރު އިދިކޮޅުން ރައީސް ޔާމީނާ އެކު ކުރާނެ މަޝްވަރާއެއް ނެތް ކަމަށެވެ. އެހެން ނަމަވެސް މަޝްވަރާއަށް ދާ ނަމަވެސް މިހާރު ސްޓޭޓް އޮފް އިމަޖެންސީއާ ގުޅިގެން ހައްޔަރު ކުރި ހުރިހާ ހައްޔަރީން ދޫކޮށް ނުލަނީސް މަޝްވަރާއަށް ނުދާނެ ކަމަށް ހިންނަވަރު ދާއިރާގެ މެމްބަރު އިބްރާހީމް މުހައްމަދު ސޯލިހު (އިބޫ) ވިދާޅުވި އެވެ.
އިދިކޮޅުން ހުށަހެޅި ޝަރުތުތައް
- މަޝްވަރާތަކުގައި އދ. މީޑިއޭޓަރެއްގެ ބައި އަދާކުރުން.
- މަޝްވަރާ ފެށުމުގެ ކުރިން ގާނޫނު އަސާސީގެ ތެރެއަށް ސަރުކާރު ވަންނަން ޖެހޭ.
- ސުޕްރީމް ކޯޓުން އެކެއް ފެބުރުއަރީގައި ކުރި ހުކުމް ވަގުތުން ތަންފީޒު ކުރުން.
- ސުޕްރީމް ކޯޓުގެ ދެ ފަނޑިޔާރުން ދޫކޮށްލައި އުއްތަމަ ފަނޑިޔާރު ހިމެނޭ ގޮތަށް ސުޕްރީމް ކޯޓު ހިންގަން ފެށުން.
- ސްޓޭޓް އޮފް އިމަޖެންސީގައި ހައްޔަރު ކުރި މީހުން ވަގުތުން ދޫކޮށްލުން.
"މި ސަރުކާރާ ސީދާ ވާހަކަ ދައްކައިގެން ނުކުންނާނެ ނަތީޖާއެއް އޮތް ކަމަށް ގަބޫލެއް ނުކުރަން. ރައީސް ޔާމީނަކީ އިތުބާރު ކުރެވޭ މީހެއް ނޫން." އިބޫ ވިދާޅުވި އެވެ.