ރާއްޖޭގައި މިވަގުތު ކަންކަން ހިނގަމުންދަނީ ޑިމޮކްރަސީގެ ހަމަތަކާ އެއްގޮތަށް، އަދި ދައުލަތުގެ ބާރުތައް ވަކިވެގެން ނޫން ކަމަށާއި، ކަންކަން އިސްލާހު ނުކޮށްފިނަމަ ރާއްޖެއާ މެދު ފިޔަވަޅުތަކެއް އަޅަން ޖެހިދާނެ ކަމަށް ވިލާތުގެ އިއްތިހާދު (އީޔޫ)އިން ބުނެފި އެވެ.
އީޔޫއިން މިހެން ބުނީ މިމަހުގެ 21 ވަނަ ދުވަހު ހުށަހެޅި ދެލިކޮޕީއެއްގެ މައްޗަށް މިއަދު ފާސްކުރި ގަރާރުގައެވެ. ގަރާރު ފާސްކުރީ މިހާރު ކުރިއަށްދާ އީޔޫ ކައުންސިލްގެ ބައްދަލުވުމުގައެވެ.
އިޔޫއިިން މިއަދު ނެރުނު ބަޔާނުގައި ބުނެފައި ވަނީ ރައްޔިތުންގެ މަޖިލީހާއި ރާއްޖޭގެ ޖުޑީޝަރީގެ ހިންގުން، ގާނޫނު އަސާސީއާ އެއްގޮތަށް ކުރިޔަށް ގެންދިއުމުގެ ފުރުސަތު ދޭންޖެހޭ ހަމަށެވެ.
އީޔޫ ކައުންސިލުން ބުނީ ރާއްޖެއިން އިއުލާނުކޮށްފައިވާ ކުއްލި ނުރައްކަލުގެ ހާލަތު އުވާލާނެ ކަމަށް އުންމީދުކުރާ ކަމަށެވެ. އަދި ރައްޔިތުންނަށް ލިބިފައިވާ ހައްގުތައް އަނބުރާ ދިނުމަށާއި، ސިޔާސީ ސަބަބުތަކަށްޓަކައި ހައްޔަރުކޮށްފައިވާ މީހުން ދޫކޮށްލުމަށް އީޔޫއިން ގޮވާލާފައިވެއެވެ.
"ސުޕްރީމް ކޯޓުގެ މަސައްކަތަށް ނުފޫޒު ފޯރުވައި، ފަނޑިޔާރުގެއާއި ފަނޑިޔާރުންނާ ދެކޮޅަށް އަޅާފައިވާ ފިޔަވަޅުތައް މި ކައުންސިލުން ކުށްވެރިކުރަން،" ބަޔާނުގައި ވެއެވެ.
އީޔޫއިން ވަނީ، ރާއްޖެއިން ޑިމޮކްރަސީގެ އުސޫލުން ދައުލަތުގެ ބާރުތައް ވަކިކޮށް، މިހާރު އޮތް ހާލަތު ރަނގަޅު ނުކޮށްފި ނަމަ "ޓާގެޓެޑް މެޝާޒް" ނުވަތަ ވަކިވަކި ފަރާތްތަކާ މެދު ފިޔަވަޅުތަކެއް އަޅަން ޖެހިދާނެ ކަމުގެ އިންޒާރު ދީފައެވެ.
ރާއްޖޭގެ ސިޔާސީ ހާލަތު ބެލުމަށް އީޔޫގެ ގައުމުތަކުގެ ސަފީރުން ހިމެނޭ ވަފުދެއް ދެ ފަހަރު މަތިން ވަނީ ރާއްޖެ ވަޑައިގެންފައެވެ.