އަމާނަތަކަފުލްގެ މޮޓޯ އިންޝުއަރެންސް ނަގާ ފަރާތްތަކަށް އެއްލައްކަ ރުފިޔާއާ ހަމައަށް އެހީ ލިބިގެންދާ ޕެކޭޖެއް "100ކޭ ޝީލްޑް" ގެ ނަމުގައި ތައާރަފް ކޮށްފިއެވެ.
މިއަދު އަމާނާ ތަކާފުލްގެ އޮފީހުގައި ބޭއްވި ރަސްމިއްޔާތުގައި އެ ޕެކޭޖު ތައާރަފު ކޮށްދެއްވީ އެ ކުންފުނީގެ ޖެނެރަލް މެނޭޖަރު އިބްރާހިމް ރިޔާޒެވެ.
އަމާނަތަކަފުލްއިން މިއަދު އަލަށް ތައާރަފްކޮށް މައުލޫމާތުދެނީ -- ސަން ފޮޓޯ/ފަޔާޒު މޫސާ
ޕެކޭޖު ތައާރަފް ކުރުމަށްފަހު ރިޔާޒް ވިދާޅުވީ، އެއްގަމު އުޅަނދު ދުއްވާ ފަރާތްތަކަށް ހާއްސަކޮށްގެން އަމާނާ ތަކާފުލްއިން ތައާރަފްކުރި އެ ޕެކޭޖް، އޭޕްރިލް މަހުގެ ނިޔަލަށް މޮޓޯ އިންޝުއަރަންސް ނަގާ ފަރާތްތަކަށް ހިލޭ ލިބިގެންދާނެ ކަމަށެވެ.
"މި ހާއްސަ ޕެކޭޖްގެ ދަށުން އެއްގަމު އުޅަނދު ދުއްވަން އިންނަ ފަރާތާއި ފަހަތުގައި އިންނަ ފަރާތަށް އެކްސިޑެންޓްގެ ސަބަބުން ދިމާވާ ދާއިމީ ނުކުޅެދުންތެރިކަމާއި، ފުރާނައަށް ގެއްލުންވާ ފަދަ ކަންކަމުގައި އެހީ ފޯރުކޮށްދެވޭނެ،" ރިޔާޒް ވިދާޅުވިއެވެ.
ރިޔާޒް ވިދާޅުވީ، އެ ޕެކޭޖް ނަގާ ފަރާތަކަށް، ނަގާ ދުވަހުން ފެށިގެން އެއް އަހަރު ދުވަހުގެ މުއްދަތައް ކަވަރޭޖު ލިބިގެންދާނެ ކަމަށެވެ. އިންޝުއަރަންސް ދޫކުރާ ގަރާޖުތަކުންނާއި އަމާނާ ތަކާފުލް ސާވިސް ސެންޓަރުން އެ ޕެކޭޖު ލިބިގެންދާނެ ކަމަށްވެސް ރިޔާޒު ވިދާޅުވިއެވެ.
އަމާނަތަކަފުލް އިންޝުއަރެންސްގެ އެޖެންޓުންނަށް އެ މީހުންގެ އަގު ވަޒަންކޮށްވަނީ ހަނދާނީ ފިލާއެއް އަރުވަނީ --- ސަން ފޮޓޯ/ ފަޔާޒު މޫސާ
މިއަދުގެ ރަސްމިއްޔާތުގައި އަމާނާ ތަކާފުލް އިންޝުއަރަންސްގެ އޭޖެންޓުންނަށް އެ މީހުންގެ އަގު ވަޒަންކޮށް، ހަނދާނީ ފިލާއެއް އެރުވިއެވެ. އަމާނާ ތަކާފުލްގެ 12 އެޖެންޓުން މެދުވެރިކޮށް 2017 ވަނަ އަހަރު އެ ކުންފުންޏަށް ވަނީ، އޭގެ ކުރީ އަހަރާ އަޅާ ބަލާއިރު 132 ޕަސެންޓުގެ ކުރިއެރުމެއް ލިބިފައެވެ.