މެޑްރިޑް (ޖެނުއަރީ 28): ކެތަލޯނިއާގެ ކުރީގެ ރައީސް ކާލްސް ޕުޖިޑެމޮންއަށް ދެން ވެރިކަން ކުރެވޭނީ އެނބުރި ސްޕެއިންއަށް ވަޑައިގަތުމުން ކަމަށް އެގައުމުގެ ކޮންސްޓިޓިއުޝަނަލް ކޯޓުން ނިންމައިފިއެވެ.
ސްޕެއިންގެ ކޯޓަކުން ބަޣާވާތުގެ ދައުވާ ކުރުމާ ގުޅިގެން މިދިޔަ އޮކްޓޯބަރު މަހު ބެލްޖިއަމްއަށް ވަޑައިގެންނެވި ޕުޖިޑެމޮން، ކެތަލޯނިއާގެ ރައީސް ކަމަށް އިންތިހާބު ކުރުމާ ބެހޭ ގޮތުން ކެތަލޯނިއާގެ ގާނޫނު ހަދާ މަޖިލީހުގައި އަންނަ އަންގާރަ ދުވަހު ވޯޓެއް ނަގާނެއެވެ.
ކެތަލޯނިއާގެ މިނިވަން ކަމަށް ތާއިދުކުރާ ޕާޓީތަކުގެ މެޖޯރިޓީ އޮތް އެމަޖިލީހުން ރިޔާސީ ކެނޑިޑޭޓަކަށް ނޮމިނޭޓުކޮށްފައިވަނީ ހަމައެކަނި ޕުޖިޑެމޮންއެވެ. އަދި އޭނާއަށް ތާއިދުކުރާ ފަރާތްތަކުން ވަނީ ޕުޖިޑެމޮންއަށް ބެލްޖިއަމްގައި ހުންނަވައިގެންވެސް ވެރިކަން ކުރެވޭނެ ކަމަށް ބުނެފައެވެ.
ނަމަވެސް ސްޕެއިންގެ ގާނޫނު އަސާސީއާ ބެހޭ އެންމެ މަތީ ކޯޓުގެ ނިންމުމާއެކު ޕުޖިޑެމޮންއަށް ޖެހޭނީ ވެރިކަމުގެ ހުވާ ކުރައްވަން އެނބުރި ގައުމަށް ވަޑައިގަންނަވާށެވެ. އަދި އެގައުމުން ވަނީ އޭނާ ހައްޔަރުކުރަން މީގެ ކުރިން އަމުރު ނެރެފައި ކަމުން، ވެރިކަމުގެ ހުވާ ކުރުމަށް ގާނޫނު ހަދާ މަޖިލީހަށް ވަޑައިގެންނެވޭނީވެސް ފަނޑިޔާރަކު ހުއްދަ ދެއްވުމުންނެވެ.
ކޯޓުން އެފަދައިން ނިންމާފައިވަނީ "އިންސާފަށް ފިއްލަވައިގެން އުޅުއްވާ" ބޭފުޅަކަށް ވެރިކަން ނުކުރެވޭނެ ކަމަށް ބުނެ ސްޕެއިން ސަރުކާރުން ހުށަހެޅި މައްސަލައަކާ ގުޅިގެންނެވެ.
ސްޕެއިންއިން ވަކިވެ މިނިވަން ދައުލަތެއް ބިނާކުރުމާ ބެހޭ ގޮތުން ކެތަލޯނިއާގައި މިދިޔަ އޮކްޓޯބަރު މަހު ނެގި ފެންނަ ނުފެންނަ ވޯޓަށް ފަހު އެސްޓޭޓުން ވަނީ މިނިވަންކަން އިއުލާންކޮށްފައެވެ. ނަމަވެސް ސްޕެއިން ސަރުކާރުން ވަނީ އެނިންމުން ބާތިލުކޮށް، ކެތަލޯނިއާގެ ގާނޫނު ހަދާ މަޖިލިސް އުވާލައި ޕުޖިޑެމޮން ރައީސްކަމުން ދުރުކޮށްފައެވެ.
އެއަށްފަހު ސްޕެއިން ސަރުކާރުން ވަނީ އެގައުމުގެ މައި ސަރުކާރަށް ތާއިދުކުރާ ގާނޫނު ހަދާ މަޖިލީހެއް ކެތަލޯނިއާގައި އެކުލަވާލުމުގެ އުއްމީދުގައި އާ މަޖިލިސް އިންތިހާބެއް ބާއްވައިފައެވެ. ނަމަވެސް އެ އިންތިހާބުންވެސް ގިނަ ގޮނޑި ކާމިޔާބުކުރީ ކެތަލޯނިއާގެ މިނިވަން ކަމަށް ތާއިދު ކުރާ މެމްބަރުންނެވެ. (ބީބީސީ)