އަމިއްލަ ގައުމު ފްރާންސްގައި ހުނަރުވެރި ކުޅުންތެރިން ގިނަ ކަމަށާއި، ރަޝިއާގައި އޮންނަ ވޯލްޑް ކަޕުގެ ތަށި ނެގިދާނެކަން ގަބޫލުކުރާ ކަމަށް އެގައުމުގެ ލެޖެންޑް ކްރިސްޓިއަން ކްރެމްބޭ ބުނެފިއެވެ.
ކްރެމްބޭވަނީ ފްރާންސްގެ ގައުމީ ޓީމާއެކު 1998 ގެ ވޯލްޑް ކަޕު އަދި 2000 ވަނަ އަހަރުގެ ޔޫރޯ ތަށިވެސް އުފުލާލާފައެވެ. ރާއްޖެއަށް ވޯލްޑް ކަޕު ޓްރޮފީޓުއާއާއެކު ކުރި ދަތުރުގައި ކްރެމްބޭވަނީ މީޑިއާއަށް ވާހަކަ ދައްކާފައެވެ.
ވޯލްޑް ކަޕް ޓްރޮފީ ޓުއާގެ ތެރެއިން ކްރަމްބޭ ---ސަން ފޮޓޯ/މުހައްމަދު އަފްރާހް
'ސަން ސްޕޯޓްސް' އިން ކުރި ސުވާލަކަށް ޖަވާބު ދެމުން ކްރެމްބޭ ބުނެފައިވަނީ ފްރާންސްގައި ގިނަ އަދަދެއްގެ ކުޅުންތެރިން ތިބުމަކީ ލިބޭ ވަރަށް ބޮޑު ނަސީބެއް ކަމަށެވެ.
"ހުނަރުވެރި ކުޅުންތެރިން ޓީމުގައި ތިބުމަކީ ވަރަށް ބޮޑު ނަސީބެއް. އެމްބާޕޭ، ގްރިޒްމަން، ޕޮގްބާ. މީގެ އިތުރަށްވެސް ޖިރޫޑް އަދި ލަކަޒެޓްވެސް ހިމެނޭ. މި ކުޅުންތެރިންނަކީ ވަރަށް ހުނަރުވެރި ކުޅުންތެރިން" ކްރެމްބޭ ބުންޏެވެ.
ކްރެމްބޭ ބުނީ 2016 ވަނަ އަހަރުގެ ޔޫރޯއާއެކު ކުޅުންތެރިންނަށް ވަރަށް ބޮޑު ތަޖުރިބާއެއް ލިބިފައިވާ ކަމަށާއި، ކްލަބު ލެވެލްގައިވެސް ފްރާންސްގެ ކުޅުންތެރިންވަނީ މިދިޔަ އަހަރު ރަނގަޅު ކުޅުމެއް ދައްކާފަ ކަމަށެވެ.
"ޔޫރޯއާއެކު ވަރަށް ބޮޑު ތަޖުރިބާއެއް ކުރެވިއްޖެ. ކްލަބުތަކުގައި ކުޅުންތެރިން ދައްކާ ކުޅުމާއެކު ވަރަށް ބޮޑު އުންމީދު ކުރެވޭ މިއީ ފްރާންސް ނަގާނެ ވޯލްޑް ކަޕެއް ކަމަށް،" ކްރެމްބޭ ބުންޏެވެ.
ކްރެމްބޭ ބުނީ މުޅި ފްރާންސްވެސް އެގައުމުގެ ގައުމީ ޓީމަށް މިހާރު ކުރާ އުންމީދަކީ އެއީ ކަމަށާއި، އެ އުންމީދުތައް ގައުމީޓީމު ހާސިލްކޮށްދޭން އޭނާވެސް ބޭނުންވާ ކަމަށެވެ.
ވޯލްޑް ކަޕް ޓްރޮފީ ޓުއާގެ މެއިން ސްޕޮންސާ ކޮކާ ކޯލާގެ ޝީލްޑެއްގައި ކްރަމްބޭ ސޮއިކުރަނީ ---ސަން ފޮޓޯ/މުހައްމަދު އަފްރާހް
ގައުމީ ޓީމާއެކު ވޯލްޑް ކަޕު އުފުލާލެވުމަކީ ކްލަބު ލެވެލްގައި ހޯދާ ޓްރޮފީތަކަށްވުރެ ހާސްބައި ތަފާތު އިހުސާސެއް ގެނުވާ ކަމެއް ކަމަށް އޭނާ ބުންޏެވެ.
"އެއީ އެކަމަށް ކުރަން ޖެހޭ ބޮޑު އިންތިޒާރެއްގެ ސަބަބުން އަންނަ އުފާވެރިކަމެއް،" ކްރެމްބޭ ބުންޏެވެ.
ގައުމީ ޓީމާއެކު ހޯދި ކާމިޔާބީތަކުގެ އިތުރުން ކްރެމްބޭވަނީ ސްޕެއިންގެ ރެއާލް މެޑްރިޑާއެކު ދެފަހަރަށް ޗެމްޕިއަންސްލީގުވެސް އުފުލާލާފައެވެ.