ރާއްޖެއިން ދުނިޔޭގެ އެންމެ މަތީ ފަންތީގެ ކުޅުންތެރިން އުފެއްދިދާނެ ކަމަށާއި، އެ ދަތުރުގެ ބައިވެރިއަކަށްވުމަށް ކޮކާކޯލާ ތައްޔާރަށް އޮތްކަމަށް، އެ ކުންފުނީގެ ސައުތު ވެސްޓް އޭޝިއާ ރީޖަންގެ ޕަބްލިކް އެފެއާޒް އެންޑް ކޮމިއުނިކޭޝަންސް ވިޝްޔަކް އަމްޖަދު ވިދާޅުވެއްޖެއެވެ.
ކޮކާކޯލާ ވޯލްޑް ކަޕް ޓްރޮފީ ޓުއާއާއެކު ފީފާ ވޯލްޑް ކަޕުގެ ތަށި ރާއްޖެ ގެނެސްފައިވާއިރު، ކޮކާކޯލާގެ ގިނަ އޮފިޝަލުންތަކެއްވަނީ ރާއްޖެ ވަޑައިގެންފައެވެ.
ކޮކާކޯލާ ކުންފުނީގެ ފަރާތުން ނޫސްވެރިންނާ ވާހަކަ ދައްކަވަމުން ވިޝްޔަކް އަމްޖަދު ވިދާޅުވީ ފުޓުބޯޅައިގައި ކާމިޔާބު ކުޅުންތެރިން އުފެއްދުމަށް މުހިއްމީ އަދަދުގެ ގިނަކަން ނޫން ކަމަށާއި، އެކަމަށް ލޯބި ހުންނަ، ޝައުގު ހުންނަ ކުދިން ކަމަށެވެ.
"ފުޓުބޯޅައަށް ބޭނުންވަނީ އަދަދު ގިނަވުމެއް ނޫން. ފުޓުބޯޅައަށް ބޭނުންވާނީ ފުޓުބޯޅައަށް ޝައުގުހުރެ، ފުޓުބޯޅައަށް ލޯބިކުރިން. 2008 ވަނަ އަހަރު ސާފް ޗެމްޕިއަންޝިޕްގައި ރާއްޖެއިން އެކަން ސާބިތުކޮށްދީފި. ރާއްޖޭގައި ފުޓުބޯޅައަށް ލޯބިހުރި، އެކަމަށް ޝައުގުވެރިވާ ބައިވަރު ކުދިން އެބަތިބި. ރާއްޖެއިން ދުނިޔޭ ލެވެލްގެ ކުޅުންތެރިން އުފެއްދިދާނެ،" އިންޑިއާއަށް ނިސްބަތްވާ ވިޝްޔަކް އަމްޖަދު ވިދާޅުވިއެވެ.
ކޮކާކޯލާ ސައުތު ވެސްޓް އޭޝިއާ ރީޖަންގެ ޕަބްލިކް އެފެއާޒް އެންޑް ކޮމިއުނިކޭޝަންސް ވިޝްޔަކް އަމްޖަދު --- ސަން ފޮޓޯ/މުހައްމަދު އަފްރާހް
ވިޝްޔަކް އަމްޖަދު ވިދާޅުވީ އެ ފެންވަރުގެ ކުޅުންތެރިން އުފެއްދުމަކީ ދިގު އަދި އުނދަގޫ ރާސްތާއެއް ނަމަވެސް، އެކަމުގައި ރާއްޖެއާއެކު ބައިވެރިއެއްގެ ގޮތުގައި މަސައްކަތްކުރަން ކޮކާކޯލާ ތައްޔާރަށް އޮތްކަމަށެވެ.
ވޯލްޑްކަޕް ޓްރޮފީ ޓުއާގައި ކޮކާކޯލާގެ އެންމެ އިސް ފަރާތެއްގެ ގޮތުގައި ބައިވެރިވި ކޮކާކޯލާ ސައުތު ވެސްޓް ރީޖަން އޮޕަރޭޝަންސްގެ ނައިބު ރައީސް ޑެބަބްރާތާ މުކަރެޖީ ވިދާޅުވީ ރާއްޖެއިން ވޯލްޑް ކަޕް ތަށްޓަށް ކިޔީ ހޫނު މަރުހަބާއެއް ކަމަށާއި ރާއްޖެއަކީ ފުޓުބޯޅައިގެ ޖޯޝުން ފުރިފައިވާ ތަނެއްކަން އެނގިއްޖެ ކަމަށެވެ.
ޓްރޮފީގެ ބޭނުމަކީ ކުދިންގެ ހިތްތަކުގައި ވޯލްޑް ކަޕު ހޯދުމަށް އަޒުމް ކަނޑައެޅުން ކަމަށާއި، އަދި ރާއްޖެ ފަދަ ގައުމަކުން ވޯލްޑް ކަޕު ކުޅެ އެ ޓްރޮފީ ހޯދާ ދުވަހަކުން ކޮކާކޯލާ ފަހުރުވެރިވާނެ ކަމަށްވެސް ޑެބަބްރާޓާ މުކަރެޖީ ވިދާޅުވިއެވެ.
ޑެބަބްރާޓާ މުކަރެޖީ ވިދާޅުވީ އޭޝިއާގައި ފުޓުބޯޅައިގެ ލޯބި އިތުރުވަމުންދާ ކަމަށާއި، އޭނާގެ އުންމީދަކީ ރާއްޖެއަކީ އެކަމަށް މުހިއްމު ރޯލެއް ކުޅޭ ގައުމަކަށް ހެދުން ކަމަށެވެ. އަދި އާއްމުކޮށް އޭޝިއާއިން ވޯލްޑް ކަޕަށް ކޮލިފައިވާ ޓީމުތަކުގެ ބަދަލުގައި ރާއްޖެފަދަ ޓީމެއް ކޮލިފައި ވެއްޖެނަމަ ކޮކާކޯލާއަށް އެކަމުގެ ކުޑަވެސް ކްރެޑިޓެއް ލިބުމަކީ ލިބޭނެ އެންމެ ބޮޑު އުފާވެރިކަން ކަމަށްވެސް ޑެބަބްރާޓާ މުކަރެޖީ ވިދާޅުވިއެވެ.
ޑެބަބްރާޓާ މުކަރެޖީ ފެނުނީ ފުޓުބޯޅައަށް ޝައުގުވެރިވާ ފަރާތެއްގެ ގޮތުގައި ---ސަން ފޮޓޯ/މުހައްމަދު އަފްރާހް
ކޮކާކޯލާ ވޯލްޑް ކަޕް ޓްރޮފީ ޓުއާ ފެށިގެން ކުރިއަށްދާއިރު، ރާއްޖޭގެ އިތުރުން އަވައްޓެރި ސްރީލަންކާއަށްވެސް ވޯލްޑް ކަޕުގެ ތަށި ގެންދިޔައެވެ. މީގެ އިތުރުންވެސް މިފަހަރަގު ޓުއާގައި ގިނަ އަދަދަކަށް އޭޝިއާގެ ގައުމުތައް ހިމެނިފައިވެއެވެ.