ފީފާގެ އައިކޯނިކް، އެންމެ ގަދަރުވެރި، އެންމެ މަގުބޫލް އައިކަން މިއަދު މިހުރީ ދުނިޔޭގެ އެންމެ މަގުބޫލު ހަނީމޫން މަންޒިލް ދިވެހިރާއްޖޭގައި ކަމަށް ރާއްޖޭގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.
ރައީސް ޔާމީން މިހެން ވިދާޅުވީ ކޮކާކޯލާ ވޯލްޑް ކަޕު ޓްރޮފީ ޓުއާގައި ފީފާ ވޯލްޑް ކަޕުގެ ތަށި ދިވެހިރާއްޖޭގައި ރަސްމީކޮށް ދައްކާލުމަށް މިރޭ ގައުމީ ފުޓްބޯޅަ ދަނޑުގައި ބޭއްވި ކުލަގަދަ ހަފްލާގައެވެ. މި ހަފްލާގައި ފްރާންސްގެ ފުޓުބޯޅަ ލެޖެންޑް ކްރިސްޓިއަން ކްރެމްބޭއާއެކު ރައީސް ޔާމީން ވަނީ ފީފާ ވޯލްޑް ކަޕުގެ އޮރިޖިނަލް ޓްރޮފީ އުފުލައިލާފައެވެ.
ރައީސް ޔާމީންގެ ވާހަކަފުޅުގައި ވިދާޅުވީ ރާއްޖެއަކީ ރީތި ގޮނޑުދޮށްތަކާއެކު ފަތުރުވެރިންގެ މަގުބޫލުކަން ވަރަށް ބޮޑަށް ލިބިފައިވާ ގައުމެއް ކަމަށާއި، ދިވެހިރާއްޖެއަކީ ދުނިޔޭގެ އެންމެ މަގުބޫލް ހަނީމޫން މަންޒިލް ކަމަށެވެ. އަދި މިއަދު އަޅުގަނޑުމެންނަށް ފެނިގެން މިދަނީ ފީފާގެ އެންމެ ޝަރަފުވެރި އަދި ގަދަރުވެރި އައިކަން ކަމަށްވާ ވޯލްޑް ކަޕު ޓްރޮފީ، ދުނިޔޭގެ އެންމެ މަގުބޫލު ހަނީމޫން މަންޒިލްގައި ހުރިތަން ކަމަށާއި، މިކަމަށް ދިވެހިން ވެސް މަރުހަބާ ކިޔަން ޖެހޭ ކަމަށެވެ.
ފީފާ ވޯލްޑް ކަޕް ޓްރޮފީ ދައްކާލުމަށް މިރޭ ގައުމީ ފުޓްބޯޅަ ދަނޑުގައި ބޭއްވި ކުލަގަދަ ރަސްމިއްޔާތުގެ ތެރެއިން --- ސަން ފޮޓޯ/ މުހައްމަދު އަފްރާހް
"ދިވެހިރާއްޖެއަކީ ބޭރުގެ މެހެމާނުންނަށް ވަރަށް ކަމުދާ ފަރުތުރުވެރި ކަމުގެ ޑެސްޓިނޭޝަނެއް. މި ފަސްގަނޑަށް އަންނަ އެންމެންނަށް އަހަރެމެން މަރުހަބާ ކިޔަންވާނެ. ދިވެހިރާއްޖެއަކީ މަރުހަބާ ކިޔުމުގައި ލާމަސީލު ބައެއް. ލާމަސީލު ގައުމެއް. މިއަދު މި ފެންނަނީ ޓޫރިޒަމްގެ ލިޓަރަރީގައި ލިޔެވެމުން އަންނަ ދުނިޔޭގެ އެންމެ މަގުބޫލު ހަނީމޫން ޑެސްޓިނޭޝަންއަކީ ދިވެހިރާއްޖޭގެ ގޮތުގައި. މިރޭ މިފެންނަނީ އެންމެ މަގުބޫލު ހަނީމޫން ޑެސްޓިނޭޝަންގައި، އެންމެ ޝަރަފުވެރި ފީފާގެ އައިކަން، އެންމެ މަގުބޫލު ޓްރޮފީ ހުރިތަން،" ރައީސްގެ ވާހަކަފުޅުގައި ވިދާޅުވިއެވެ.
ރައީސް ޔާމީން ވިދާޅުވީ ޓްރޮފީއާއެކު އެންމެންނަށްވެސް ގެނުވީ އުފާވެރިކަމެއް ކަމަށާއި، ދިވެހި ރައްޔިތުންގެ ނަމުގައި ފީފާ ވޯލްޑް ކަޕުގެ ޓްރޮފީ އުފުލާލުމަކީ ލިބޭނެ ވަރަށް ބޮޑު ޝަރަފެއް ކަމަށެވެ.
"ދިވެހި ރައްޔިތުންގެ ފަރާތުން ޓްރޮފީ އުފުލާލުމަކީ ލިބިގެންދާ ވަރަށް ބޮޑު ފަޚުރެއް، އަދި ވަކިން ހާއްސަކޮށް ކުޅިވަރަށް ލޯބިކުރާ އެންމެންވެސް ފީފާ ޓްރޮފީއަށް މަރުހަބާ ކިޔަނީ އުފަލާއެކު، މި އަގުހުރި ޓްރޮފީއަށް ކުޑަކުދިންނާއި ހުރިހާ ދިވެހިންވެސް މަރުހަބާ ކިޔަނީ އުފަލާއެކު،" ރައީސް ޔާމީން ވިދާޅުވިއެވެ.
ޓްރޮފީ ޓުއާގައި މިއަހަރު ރާއްޖެ ހިމެނިފައިވާ އިރު، ރައީސް ޔާމީން ވަނީ އެކަންކަން ފަހިކޮށްދިން، ފީފާގެ މައި އިދާރާގެ އިސްވެރިން، ވޯލްޑް ކަޕު އޯގަނައިޒިން ކޮމިޓީގެ އިތުރުން ފުޓުބޯލް އެސޯސިއޭޝަން އޮފް މޯލްޑިވްސް އަދި ކޮކާކޯލާއަށް ވެސް ވަރަށް ބޮޑަށް ޝުކުރު އަދާކޮށް މަރުހަބާ ކިޔައިފައެވެ.
ފީފާ ވޯލްޑް ކަޕް ޓްރޮފީ ދައްކާލުމަށް މިރޭ ގައުމީ ފުޓްބޯޅަ ދަނޑުގައި ބޭއްވި ކުލަގަދަ ރަސްމިއްޔާތުގައި ރައީސް ޔާމީން ވާހަކަފުޅުދައްކަވަނީ --- ސަން ފޮޓޯ/ ފަޔާޒް މޫސާ
ރައީސް ޔާމީން އިތުރަށް ވިދާޅުވީ ވޯލްޑް ކަޕު ޓްރޮފީއަކީ ދުނިޔޭގެ ވަރުގަދަ ފުޓުބޯޅަ ލެޖެންޑުން ކަމަށްވާ ޒައިނުއްދީން ޒިދާން އަދި ޑިއޭގޯ މެރަޑޯނާ ފަދަ ކުޅުންތެރިންގެ ކެޕްޓަންކަމުގެ ދަށުން އުފުލައިލާފައިވާ ޓްރޮފީއެއް ކަމަށާއި، މި ޓްރޮފީ ރާއްޖެ އައުމާއެކު އެންމެންގެ ހިތްތަކަށް އުފާވެރިކަން ލިބިއްޖެ ކަމަށެވެ. އަދި މިއަދު ލޮލުން އަންނަނީ އުފާވެރިކަމުގެ ކަރުނަ ކަމަށް ވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ މިއީ މަދުން ނޫނީ ލިބޭނެ ފުރުސަތެއް ނޫން ކަމަށާއި، ބޭނުންފުޅު ވަނީ ރާއްޖޭގެ އެކި ކަންކޮޅުތަކުގައި މިފަދަ މެހެފިލްތައް އިތުރުވުން ކަމަށެވެ. އަދި ކުޅިވަރަކީ ރާއްޖެ އެކުވެރި ކުރުވާނެ އެއްޗެއް ކަމަށާއި، އަހަރެމެންގެ މެހެމާނުންނަށް ދިވެހިރާއްޖެއަކީ ސުލްހަވެރި މަންޒިލެއް ކަމަށް ދެއްކުމަށް މިފަދަ އިވެންޓްތަކަކީ މުހިންމު ކަންކަން ކަމަށެވެ.
ވޯލްޑް ކަޕް ޓްރޮފީގައި އަތްލުމުގެ ފުރުސަތު ލިބޭނީ ހަމައެކަނި ވޯލްޑް ކަޕް މުބާރާތެއް ކާމިޔާބުކުރި ސްކޮޑުތަކުގައި ހިމެނޭ ކުޅުންތެރިންނާއި އޮފިޝަލުންގެ އިތުރުން ގައުމުތަކުގެ އެންމެ އިސްވެރިޔާއަށެވެ. މިރޭ ވޯލްޑް ކަޕު ޓްރޮފީ އުފުލާލި ރައީސް ޔާމީން ވެފައިވަނީ ފީފާ ވޯލްޑް ކަޕުގެ ތަށި އުފުލާލި އެންމެ ފުރަތަމަ ދިވެއްސަށެވެ.