ސޯޝަލް މީޑިއާގައި މީހުން އާންމުކުރާ ފޮޓޯތަކާ ގުޅިގެން އެމީހަކަށް އެހެން މީހުންގެ ހަސަދަ ނުވަތަ އެސްފީނާގެ އަސަރު ކޮށްފާނެ ކަމަށް ދީނީ ޢިލްމުވެރިޔާ ޝައިޚް ހަސަން މޫސާ ފިކުރީ ވިދާޅުވެއްޖެއެވެ.
އިއްޔެރޭ "ސަން ޓީވީ"އިން ފޮނުވި "ސުވާލަކީ ކޮބާ؟" ޕްރޮގްރާމުގައި ވާހަކަ ދައްކަވަމުން، ޝައިޚް ފިކުރީ ވިދާޅުވީ، ފޭސްބުކް ފަދަ ތަންތަނުގައި މައިންބަފައިން ދަރީންގެ ފޮޓޯ، ނުވަތަ އެދަރީންގެ ކާމިޔާބީގެ ވާހަކަތައް އާންމުކުރާ އިރު، އެކަމުގެ ސަބަބުން އެސްފީނާ ނުވަތަ ހަސަދައިގެ އުނދަގޫ ކުރިމަތިވެދާނެ ކަމަށެވެ. އަދި އެކަމުގެ ސަބަބުން ކުދިންގެ ކުރިމަގަށްވެސް އުނދަގޫ ކޮށްފާނެކަމަށް ޝައިޚް ފިކުރީ ވިދާޅުވިއެވެ.
"]ސޯޝަލް މީޑިއާއަށް[ ދަރީންގެ ފޮޓޯއާ އެމީހުންގެ ކާމިޔާބު ފަދަ ކަންކަން ފޮޓޯ ލައިގެން ފާހަގަކުރާ ބޭފުޅުންނަށް ދަންނަވަން ބޭނުން އެއްގޮތަކަށްވެސް އެހެން ނަހަދާށޭ،" ޝައިޚް ވިދާޅުވިއެވެ.
އެސްފީނާއަކީ ހައްގުވެގެން ޖެހޭ ކަމެއް ކަމަށް ކީރިތި ރަސޫލާ ހަދީޘް ކުރައްވާފައިވާ ކަމަށް އޭނާ ވިދާޅުވިއެވެ.
"ތުއްތު ކުދިންނަށްވެސް ދިމާވޭ ނުކެވުން، ނުނިދުން އަދި ރޭގަނޑަށް ރުއިން. ހަމަ އެކަށީގެންވޭ މިއީ އެފަދަ ކަމަކުން ދިމާވާ ތުރާލެއް ކަމަށްވެސް. ސޯޝަލް މީޑިއާ ބޭނުންކުރުމުގައި ވެސް ތުއްތު މައުސޫމު ކުދިންނަށް ރައްކާތެރި ކަމެއް ނޫން ]މިއީ[. އެކުދިން ރައްކާތެރިކުރަން އެދޭނަމަ ޝެއާ ނުކުރުން ރައްކާތެރީ،" ޝެއިޚް ވިދާޅުވިއެވެ.
ޝައިޚް ފިކުރީ ވިދާޅުވީ، ދަރީންގެ އިތުރުން، ދެމަފިރިންވެސް އެކުގައި ނަގާ ފޮޓޯތައް އާންމުންނަށް ފެންނަ ގޮތަށް ޖެހުމަކީ ދެމަފިރިންގެ ގުޅުމަށްވެސް އެސްފީނާ ނުވަތަ ހަސަދައިގެ އަސަރު ކޮށްފާނެ ކަމެއް ކަމަށެވެ.
"ދެމަފިރިންގެ ގުޅުމަކީ ސޯޝަލް މީޑިއާގައި ފާޅުކުރަންޖެހޭ ގުޅުމެއް ނޫން. ދެމަފިރިން އެކަކު އަނެކަކާ ގުޅުން ހިންގާފައި މީސްތަކުންގެ މެދުގައި އެވާހަކަ ދެއްކުމަކީވެސް ނަހީ ކުރައްވާފައިވާ ކަމެއް. މިއަދު އެބަ ފެނޭ ދެމަފިރިންގެ ލޯބި ފާޅުކުރާ ތަނެއްގެ ގޮތުގައި ސޯޝަލް މީޑިއާ ]ބޭނުންކުރާތަން[. އެއީ ވެސް ދީނީ އުސޫލުން ބޭރުވެގެން ދިއުން. އެކަންކަން ވެގެން ދާނެ ކައިވެންޏަށް އަބާއްޖަވެރިކަމެއް ކަމަށް،"
މާތްﷲ ނަހީކުރެއްވި ކަންކަމަށް އަރައިގަންނަ އިރު، ޝައިތާނީ އުނދަގޫ ކުރިމަތިވާނެ ކަމަށާއި، އެކަމުގެ ސަބަބުންވެސް ދެމަފިރިންގެ ދިރިއުޅުމުގެ ބާއްޖަވެރިކަމާއި ބަރަކާތް ގެއްލިގެން ގޮސްފާނެ ކަމަށް ޝައިޚު ވިދާޅުވިއެވެ.