ވިހި އަހަރުން ދަށުގެ އެފްއޭކަޕް ފުޓްބޯޅަ މުބާރާތުގައި މިދިޔަ ބުރާސްފަތި ދުވަހުގެ ރޭ ވެލެންސިޔާއާ ދެކޮޅަށް ކުޅުނު މެޗު މާޒިޔާ އިން 1-1 އިން އެއްވަރުކޮށްފި އެވެ.
މެޗްގެ ފުރަތަމަ ލަނޑުޖަހާ ވެލެންސިޔާ އިން ލީޑް ހޯދީ 66 ވަނަ މިނިޓުގައި ކެޕްޓަން އަބްދުލް ވާހިދު އިބްރާހިމް )ވާޑް( ކާމިޔާބުކުރި ލަނޑުންނެވެ.
ރަނގަޅު ފެށުމަކާ އެކު މެޗް ކާމިޔާބު ކުރުމަށް ކެތްމަދުވެފައި ތިބި، ވެލެންސިޔާގެ އުންމީދުތައް ގެއްލުނީ މެޗްގެ ފަހު މިނިޓުގައި މާޒިޔާގެ އާއިޒް ކާމިޔާބުކުރި ލަނޑުންނެވެ.
މެޗުން އެއްވަރުވެ، ވެލެންސިޔާއާ މާޒިޔާއަށް ކޮންމެ ޓީމަކަށް ވެސް އެއް ޕޮއިންޓް ލިބުނު އިރު، ގްރޫޕް ބީގެ އެންމެ ކުރީގައި ހަތަރު ޕޮއިންޓާ އެކު އޮތީ މާޒިޔާ އެވެ. ވެލެންސިއާ އަށް އެއް ޕޮއިންޓް ލިބިފައިވާ އިރު ވީބީ ސްޕޯޓްސް އޮތީ ޕޮއިންޓެއް ނުލިބި އެވެ.
މިމުބާރާތުގެ ގްރޫޕް އޭ ފަޅިން ވާދަކުރާ ޓީމްތަކުގެ ތެރެއިން، ކޮންމެ ޓީމެއް ވެސް މިހާތަނަށް އެއް މެޗު ކުޅެފައިވާ އިރު ތާވަލްގެ ކުރީގައި ތިން ޕޮއިންޓާ އެކު އޮތީ ނިއު އެވެ. އޯލް ޔޫތު ލިންކޭޖް )އޭވައިއެލް( އާއި ވިކްޓަރީ އަށް އެއް ޕޮއިންޓް ލިބިފައިވާ އިރު އީގަލްސް އަދި އޮތީ ޕޮއިންޓެއް ނުލިބިއެވެ.
މުބާރާތުގެ ސެމީ ފައިނަލަށް ދާނީ ކޮންމެ ގްރޫޕަކުން ވެސް އެއް ވަނަ އާއި ދެ ވަނަ ޓީމެވެ. ދެ ގުރޫޕުން އެއްވަނަ ހޯދާ ދެ ޓީމުގެ މެދުގައި ކުޅޭ ފުރަތަމަ ސެމީން މޮޅުވާ ޓީމަކަށް ފައިނަލުގެ ޖާގަ ލިބޭނެ އެވެ.
ފުރަތަމަ ސެމީން ބަލިވާ ޓީމަކަށް ފައިނަލުގެ ފުރުސަތު އޮންނާނީ ތިން ވަނަ ސެމީ ފައިނަލުން މޮޅުވެގެނެވެ. ތިން ވަނަ ސެމީގައި ވާދަކުރާނީ ދެ ގުރޫޕުން ދެވަނަ އަށް ދާ ދެ ޓީމުގެ މެދުގައި ކުޅޭ ދެވަނަ ސެމީން މޮޅުވާ ޓީމެކެވެ.
މި މުބާރާތުގެ ގުރޫޕް އޭގައި މިރޭ ކުޅޭ މެޗުގައި ބައްދަލުކުރާނީ ވިކްޓަރީ އާއި ނިއު ރޭޑިއަންޓެވެ.
date_range
ހޯމަ 25 ނޮވެމްބަރ 2024