ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ހޮވި އަހަރުގެ އެންމެ އުންމީދީ ކުޅުންތެރިޔާ ނާއިޒު ހަސަން (ދާދު) ޓީސީ ދޫކޮށް މާޒިޔާއަށް ބަދަލުވެއްޖެއެވެ.
ދާދު ޓީސީ ދޫކޮށް މާޒިޔާއަށް ބަދަލުވިކަން އިއުލާންކޮށްފައިވަނީ އިއްޔެއެވެ.
ނިއުރޭޑިއަންޓް ސްޕޯޓްސް ކްލަބުން ވެސް ދާދުއަށް ފާރަލަމުން ދަނިކޮށް އޭނާ މާޒިޔާއަށް ބަދަލުވެފައިވާ އިރު، އޭނާ ބުނެފައިވަނީ އަންނަ އަހަރު މާޒިޔާއަށް އެ ކްލަބުގެ ޓާގެޓްތައް ހާސިލްކޮށްދިނުމަށް މަސައްކަތް ކުރާނެ ކަމަށާއި އެ ކުލަބާ ގުޅުމަކީ ލިބޭ ހިތްހަމަޖެހުމެއް ކަމަށެވެ.
ދާދު ސޮއިކުރި ރަސްމިއްޔާތުގައި މާޒިޔާގެ ޗެއާމަން އަހްމަދު ސާޖިދު ވިދާޅުވީ، ދާދު މާޒިޔާއާ ގުޅުމަކީ އެ ކުލަބަށް ލިބުނު އިތުރު ހިތްވަރެއް ކަމަށެވެ. އަދި އޭނާ ވިދާޅުވީ ދާދުއަކީ ހުނަރުވެރި ކުޅުންތެރިއެއް ކަމަށާއި އޭނާގެ ހުނަރު މާޒިޔާއިން ފެނިގެންދިއުމަކީ ލިބޭ އުފަލެއް ކަމަށެވެ.
ވޭތުވެދިޔަ ތިން އަހަރުވެސް ދާދު ފެނިގެންދިޔައީ ޓީސީންނެވެ. އޭނާ ވަނީ ޓީސީން މިހާތަނަށް ހޯދި ކާމިޔާބީތަކުގައި މުހިންމު ދައުރެއް އަދާކޮށްފައެވެ.