ފެހުމުގެ ދާއިރާއިން ނަޖީބާ ކުރެއްވި މަސައްކަތަކީ ކަނބަލުންނަށް ނަމޫނާއެއް

އާސިޔަތު ނަޖީބާއަކީ އަމިއްލަ ފައިމައްޗަށް ތެދުވެ ހިތްވަރާއި އެކު މަސައްކަތް ކުރުމުގެ ނަމޫނާއެކެވެ. ދިރިއުޅުމުގައި އެތައް ފަހަރަކު އަރި އަޅައިލި ނަމަވެސް ހިތްވަރާ އެކު އަލުން ތެދުވީ އިތުރު ހިތްވަރާ އަޒުމާ އެކު އެވެ. ނަޖީބާގެ ހަޔާތުގެ ކޮންމެ ސޮފުހާއަކީ ވެސް ކަނބަލުންނަށް ބޮޑެތި އިބުރަތްތަކެއް ލިބިގެންދާ އިބުރަތްތެރި ފިލާވަޅެކެވެ.

ނަޖީބާގެ ޚިދުމަތުގެ ދާސްތާނާ މުޅި ރާއްޖެއަށް އެނގިގެންދިޔައީ ކުދި އަދި މެދުފަންތީގެ ވިޔަފާރީގެ ދާއިރާއިން، ފެހުމާއި ޖަރީކުރުމުގެ ރޮނގުން މިއަހަރު ހިތްވަރު ދިނުމުގެ އިނާމު ލިބިވަޑައިގެންނެވި ހިސާބަކުން ނޫނެވެ. އޭނާގެ ނަން އެދާއިރާގައި އޭރުވެސް މިހާރުވެސް ވިދައެވެ. ރީތިކޮށް ހެދުން ފަހަން ބޭނުންވާ ކޮންމެ މީހެއްގެ ދުލަށްވެސް ނަޖީބާގެ ނަމަކީ ދަންނަ ނަމެކެވެ. ފަރިތަ ނަމަކެވެ. ފަސޭހަ ނަމެކެވެ.

ހީވާގި ކަނބަލުންގެ މައުރަޒުގައި ބައިވެރި ކުރުމަށް ނަޖީބާ ފަރުމާކޮށް ފަހާފައިވާ ހެދުންތަކެއް: މި ހެދުންތަކަށް ވަނީ ފޮތީގެ އަދި ފެހުމުގެ އުފެއްދުމުގެ ގިންތިން 1 ވަނަ، 2 ވަނަ، 3 ވަނަ ލިބިފައި ---

ނަޖީބާ ފެހުމާއި މާޖެހުމުގެ މަސައްކަތުގެ ތެރެއަށް ވެދެވަޑައިގަތީ އުމުރުން 22 އަހަރުގައެވެ. އޭނާގެ އުފަން ރަށަކީ ގދ. ތިނަދޫ ކަމަށްވިޔަސް، އުމުރުން 9 އަހަރުގައި މާލެއަށް ބަދަލުވެވަޑައިގެން، ތައުލީމް ހާސިލް ކުރެއްވީ މާލޭގައެވެ. ހެދުން ފެހުމާއި ޖަރީ ކުރުމުގެ މަސައްކަތްވެސް ފުރަތަމަ ކުރެއްވީ މާލޭގައެވެ. އެއަށް ފަހު އަވަށްޓެރި ސްރީލަންކާގައި ދަރިންނަށް ކިޔަވައިދިނުމަށް ފައިބައި ހުންނެވި އިރުވެސް އެ މަސައްކަތް ކުރިއަށް ގެންދެވިއެވެ.

"އެންމެ ފުރަތަމަ މަސައްކަތް ފެށީ މާލޭގައި. އެއަށް ފަހު ދަރިންނަށް ކިޔަވައި ދިނުމަށް ލަންކާއަށް ބަދަލުވީ. އޭގެ ފަހުން މަސައްކަތް ވަރަށް ބޮޑަށް ފުޅާވެ ލަންކާގައި ތިބޭ މީހުންނަށްވެސް ހެދުން ފަހައިދިނިން." ނަޖީބާގެ މަސައްކަތް ފުޅާވެގެން ދިޔަ ގޮތް ކިޔައިދެއްވަމުން އޭނާ ވިދާޅުވިއެވެ.

އާސިޔަތު ނަޖީބާ ފަރުމާ ކުރައްވައި ފައްސަވައިފައިވާ ހެދުން ތަކެއް ---

ލަންކާގައި މަސައްކަތް ކުރެއްވިއިރު ކުރިޔަށް ދިއުމަށް ނަޖީބާ އަށް ދަތިތަކަކާ ކުރިމަތިވިއެވެ. މަސައްކަތް ހުއްޓޭފަދަ ހުރަސްތައްވެސް ކުރިމަތިވިއެވެ. ނަމަވެސް އެ ހުރިހާ ކަމަކަށްވެސް ކެތްކުރެއްވީ މަސައްކަތަށް ހުރި ޝައުގުވެރިކަމެއްގެ ބޮޑުކަމުންނެވެ. ރޮއްޖަކަށްފަހު ރޮއްޖެއް ޖައްސަވަމުން ގެންދެވީ ކޮންމެ ހުރަހަކީ ފިލާވަޅެއް ކަމަށް ދެކިވަޑައިގެންނެވެ.

ލަންކާގައި މަސައްކަތް ކުރިއަށް ގެންދިޔައިރު ކައިރީގައި މަސައްކަތް ކުރަން ގެންގުޅުނީ ލަންކާ މީހުން. އެ މީހުނަށް ފައިސާ ދީގެން ބުރުގާގައި މާޖެހުމުގެ މަސައްކަތް ވަރަށް ފުޅާކޮށް ކުރިއަށް ގެންދިޔައިން. ނަމަވެސް ލަންކާގެ ލޭބާ މިނިސްޓްރީއަށް ބައެއް މީހުން މައްސަލަ ހުށައަޅައިގެން ހުރަސްތަކެއް ކުރިމަތިވި. ނަމަވެސް އެއްވެސް ވަރަކަށް ފަހަތަކަށް ނުޖެހެން، ދިޔައީ ކުރިއަށް. ފަހުން ހުރިހާ ކަމެއް ކުރަން ވެސް ވަރަށް ފަސޭހަވި،" ނަޖީބާ ވިދާޅުވިއެވެ.

އާސިޔަތު ނަޖީބާ އޭނާ ހިންގެވި ކޯހެއްގައި ދަރިވަރުންނަށް މަސައްކަތް ދަސްކޮށްދެއްވަނީ ---

ނަޖީބާގެ ނުގުޑާ އަޒުމާއި ހިތްވަރާ އެކު އޭނާ ލަންކާގައި ކުރައްވަމުންގެންދެވި ވިޔަފާރި ފުޅާވެ ގިނަ ބައެއްގެ އިތުބާރު ހޯއްދެވިއެވެ. ދަރީންނަށް ކިވައިދީ ނިންމާލުމަށްފަހު އަނބުރާ މާލެ ވަޑައިގަތުމަށްފަހުވެސް އެނާ ކުރިއަށް ވަޑައިގަތީ ފެހުމުގެ ދާއިރާއިންނެވެ. މިއަދު އޭނާ ގެންދަވަނީ ވަރަށްވެސް ފުޅާ ދާއިރާއެއްގައި ފެހުމާއި ޖަރީ ކުރުމުގެ މަސައްކަތް ކުރައްވަމުންނެވެ.

"ހީވާގި ކަނބަލުން" މައުރަޒުގައި ބައިވެރިކުރުމަށް ނަޖީބާ ފަރުމާ ކުރެއްވި ހެދުމެއް: މި ފަރުމާ އަށް ވަނީ އެ މައުރަޒުގައި ކަސަބުން އުފައްދާ ތަކެތީގެ ދާއިރާއިން ދެވަނަ ލިބިފައި --- ސަން ފޮޓޯ: މުހައްމަދު އަފްރާހު

އަމިއްލަ ގޭތެރޭގައި މަދު ވަސީލަތްތަކާއި އެކު ނަޖީބާ ފެށްޓެވި މަސައްކަތް ފުޅާކުރައްވައި، ޒަމާނީ ވިޔަފާރިއަކަށް މިއަދު ވަނީ ބަދަލުކުރައްވާފައެވެ. ކަނބަލުންގެ މެދުގައި މަޝްހޫރު ޕްލެޝަރ ޓެއިލަރސް އަކީ ނަޖީބާގެ ވިޔަފާރިއެކެވެ.

"ޕްލެޝަރ ޓެއިލާސް އެއީ އަޅުގަނޑު މި ވިޔަފާރި ފުޅާ ވެގެންދިޔުމުގެ އަސްލު. ގިނަ ބައެއްގެ ތަރުހީބު ލިބިގެންދިޔުމާ އެކު ފިހާރައެއް ހުޅުވީ. ކުރިން މާލޭގައި ފިހާރަ ހިންގި ނަމަވެސް ދިރިއުޅުން ހުޅުމާލެއަށް ބަދަލުވުމާއެކު މިހާރު ފިހާރަ ހިންގަމުން މިދަނީ ހުޅުމާލޭގައި،" ނަޖީބާ ވިދާޅުވިއެވެ.

ނަޖީބާ ފަރުމާކޮށް ފަހާފައިވާ ހެދުން ތަކެއް ---

ނަޖީބާގެ އެންމެ ތަފާތު ކަމަކީ އަދި އެންމެ ހާއްސަ ކަމަކީ އޭނާއަށް ލިބިފައި ހުރި ހުނަރު އެހެން މީހުންނަށް ދަސްކޮށްދެއްވުމެވެ. މީހަކު މަސައްކަތް ދަސްކުރަން އައިސްފިނަމަ ނަޖީބާގެ ބިޒީ ޝެޑިއުލުން ވަގުތު އޭނާ އެމީހަކަށް ހުސްކުރައްވައެވެ. އަމިއްލަފުޅަށް ތަފާތު ވޯކްޝޮޕްތައް ހިންގަވައެވެ. ހުނަރު ދަސްކޮށްދިނުމުގެ މަސައްކަތުގެ ތެރެއިން އެތައް ޒުވާނުންނެއް އޭނާވަނީ ތަމްރީނުކުރައްވައިފައެވެ.

ނަޖީބާ ފަރުމާކޮށް ފަހާފައިވާ ހެދުމެއް ---

"ދަސްކުރަން އަންނަ ކޮންމެ ކުއްޖަކަށްވެސް އަޅުގަނޑު ބުނެދެން. އެއްވެސް ކުއްޖަކު އެއްޗެއް އުނގެނެން އައިސްފިނަމަ ދުވަހަކުވެސް ނޫނެކޭ ނުބުނަން. އަބަދުވެސް މަސައްކަތް ކުރަނީ ވީހާވެސް ގިނަ ބަޔަކަށް މަސައްކަތް ބުނެދޭން. އެހެން މީހަކަށް އުނގަންނައިދިނުމަކީ ހިތްހަމަޖެހުން ލިބޭ ކަމެއް،"ނަޖީބާ ވިދާޅުވިއެވެ.

ފެހުމާއި ޖަރީ ކުރުމުގެ ދާއިރާއިން މީހުން ތަމްރީނުކުރުމަށް ނަޖީބާ ކުރިއަށް ގެންގޮސްފައިވާ ބައެއް ވޯކްޝޮޕްތަކަށް ބަލާއިރު ގދ. ތިނަދޫގަޔާއި، މާލޭގެ އިތުރުން ސްރީލަންކާގައިވެސް ބައެއް ޕްރޮގްރާމްތައް ވަނީ ކުރިއަށްގެންގޮސްފައެވެ. އެންމެފަހުން އޭނާ ހިންގެވި ކޯސްތަކުގެ ތެރޭގައި، މިދިޔަ އަހަރުގެ އޮގަސްޓުމަހު "ކުޑަކުދިންގެ ހެދުން ފަހަން ދަސްކުރަމާ" މިނަމުގައި ހިންގެވި ކޯސް ހިމެނެއެވެ. އަދި މިއަހަރުގެ ޖަނަވަރީމަހު "ފަހަން ދަސްކޮށްދިނުން" މިނަމުގައިވެސް އޭނާވަނީ ކޯހެއް ހިންގަވާފައެވެ. މިއީ ކުޑަކުދިންނާއި ބޮޑެތި މީހުންގެ ހެދުން ފަހަން ދަސްކޮށްދެއްވުމަށް ހިންގެވި ދެ މަސްދުވަހުގެ ކޯހެކެވެ.

މާލޭގައި ނަޖީބާ ހިންގެވި ކޯހުގެ ބައިވެރިއަކަށް ކޯސް ފުރިހަމަ ކުރިކަމުގެ ސެޓްފިކެޓް ހަވާލު ކުރަނީ ---

ނަޖީބާގެ ވިޔަފާރި މިހާރު ފުޅާވެގެން ގޮސްފައިވާ މިންވަރު ދައްކައިދޭ އެއް ހެއްކަކީ ރާއްޖޭގެ އެންމެ ބޮޑެތި ވިޔަފާރި ކުންފުނިތަކުންވެސް ފެހުމުގެ މަސައްކަތުގައި އޭނާއަށް ކުރާ އިތުބާރެވެ. ބައެއް ކުންފުނިތަކުން އެންމެ އިތުބާރު ކުރާ ފެހުންތެރިއަކަށް ނަޖީބާ ވެގެންދިޔުމަކީ މިއަދު އޭނާ ހިތްހަމަޖެހިލައިގެން މަސައްކަތާއެކު ކުރިއަށްދާ އެއް ސަބަބެވެ. ނަޖީބާ ގަބޫލުކުރައްވާ ގޮތުގައި ކުންފުނިތަކާއި ވަކިވަކި މީހުންވެސް އޭނާއަށް އިތުބާރު ކުރަނީ ގަޑިން ގަޑިއަށް މަސައްކަތް ނިންމަވައި މަސައްކަތުގެ ކޮލިޓީ ހިފަހައްޓަވާތީ އެވެ.

"އަޅުގަނޑަކީ ކުރާ ކޮންމެ ކަމެއްގައި ވެސް ކޮލިޓީ ހިފަހައްޓަން މަސައްކަތްކުރާ މީހެއް. ގަޑިޔަށް މަސައްކަތް ނުނިމިގެން އެއްވެސް މީހަކު ޝަކުވާ ކޮށްފައެއް ނުވޭ. އަބަދުވެސް މީހުން ބުނޭ އަޅުގަނޑު ގާތަށް އަންނަނީ ބުނާ ދުވަހަށް މަސައްކަތް ނިންމާތީއޭ،" ނަޖީބާ ވިދާޅުވިއެވެ.

އާސިޔަތު ނަޖީބާ ވަނީ ފެހުމާއި ޖަރީކުރުމާއި، މާޖެހުމުގެ ރޮނގުން ތަފާތު ކާމިޔާބީތައްވެސް ހޯއްދަވާފައެވެ. ފެހުމާއި ޖަރީކުރުމުގެ ދާއިރާއިން އެންމެ އުހުގައި އޭނާ ފިޔަޖަހަމުންދާއިރު މި ދާއިރާއިން އޭނާވަނީ ތަފާތު އެކި ތަމްރީނުތަކާއި ކޯސްތައް ފުރިހަމަކުރައްވާފައެވެ. ފެހުމާއި ޖަރީ ކުރުމުގެ ތެރޭގައި އޭނާ ނުދަންނަ މަސައްކަތެއް ނެތެވެ. އެ ދާއިރާއިން ކޮންމެ މަސައްކަތަކަށް ވެސް ނަޖީބާ ފަރިތައެވެ.

ނަޖީބާގެ ފަރުމާއެއް: މި ފަރުމާއަށް ކަނބަލުންގެ މައުރަޒުގައި އެމްބްރޮއިޑްރީ މަސައްކަތުގެ ދާއިރާއިން އެއް ވަނަ ވަނީ ލިބިވަޑައިގެންފައި ---

ނަޖީބާވަނީ ދާދި ފަހުން ބޭއްވި ކަނބަލުންގެ އުފެއްދުންތެރިކަމުގެ އެކްސްޕޯއިންވެސް ފާހަގަކޮށްލެވޭ ކާމިޔާބީތަކެއް ހޯއްދަވާފައެވެ. އެގޮތުން އެ މައުރަޒުން ފޮތީގެ އަދި ފެހުމުގެ އުފެއްދުމުގެ ގިންތިން 1 ވަނަ، 2 ވަނަ، 3 ވަނަ އާއި، އެމްބްރޮއިޑަރީ މަސައްކަތުގެ ގިންތިން 1 ވަނަ ހޯއްދަވާފައިވެއެވެ. އަދި ކަސަބުން އުފައްދާ ތަކެތީގެ ގިންތިންވެސް 2 ވަނަ ހޯއްދަވާފައިވެއެވެ.

އެ ކާމިޔާބީތައް އެހެން ހުރި ކަމުގައިވީ ނަމަވެސް ނަޖީބާގެ ހިތަށް ތަސައްލީއެއް ލިއްބައިދިނީ މި އަހަރުގެ ޖުމުހޫރީ ދުވަހު ލިބިވަޑައިގެންނެވި ހިތްވަރު ދިނުމުގެ ގައުމީ އިނާމުގެ ސަބަބުންނެވެ. އޭނާ ގަބޫލު ކުރައްވާ ގޮތުން ގައުމަށް ފައިދާ ހުރި މަސައްކަތެއް ކޮށްދެވުނު ކަމުގެ އިހުސާސް މިއަދު ކުރެއްވެއެވެ. ރައީސުލްޖުމްހޫރިއްޔާ އަބްދުﷲ ޔާމީން ގެ އަތްޕުޅުން މި ލިބިވަޑައިގެންނެވި ގައުމީ ޝަރަފަކީ އިތުރަށް ކުރިއަށް ވަޑައިގަތުމަށް ލިބިވަޑައިގެންނެވި ހިތްވަރެއް ކަމަށް އޭނާ ދެކިވަޑައިގަންނަވަ އެވެ.

ނަޖީބާގެ ދިރިއުޅުން ފެހުމުން ލިބުނު އާމްދަނީން ކުރިއަށް ގެންގޮސްފައިވާއިރު މިހާތަނަށް އޭނާ ވަނީ މިދާއިރާއިން މުހިންމު މަސައްކަތްތަކެއް ކުރަމުން އަންނަ އެތައް ކުދިންނެއް ޖަރީކޮށްދެއްވާފައެވެ. އެ ކުދިން ދާއިރާގެ އުހުގައި ވިދުން ގަދަ ކުރަމުންދާއިރު ނަޖީބާ އަދިވެސް ހުންނެވީ އެފަދަ ކުދިންނަށް އެހީތެރިވެވަޑައިގަތުމަށް ތައްޔާރަށެވެ.

ނަޖީބާ އޭނާގެ އާއިލާ އާއި އެކު ޖުމްހޫރީ ދުވަހުގެ ހަފްލާގެ ތެރެއިން: ލިބުނު އެވޯރޑް ނަޖީބާް ވަނީ ފިރިމީހާ އަދި ދަރީންނަށް ހަދިޔާ ކޮށްފައި ---

ނަޖީބާ ވިދާޅުވާ ގޮތުގައި މުޅި އުމުރުދުވަހު މި ބުރަ މަސައްކަތް ހުއްޓުމެއް ނެތި ކުރެއްވުމުގެ އަސްލަކީ އަދި ހިތްވަރަކީ އޭނާއަށް ލިބިވަޑައިގެންފައިވާ ހަތަރު ބޭފުޅުންނެވެ. އެ ހަތަރު ބޭފުޅުންނަށް ހެޔޮ ތަރުބިއްޔަތަކާއި ރަނގަޅު ތައުލީމެއް ދެއްވުމެވެ. އެ ހަތަރު ބޭފުޅުންނަކީ ވެސް ގައުމު ދެކެ ލޯބިވާ ގައުމަށް ޚިދުމަތްތެރި ބޭފުޅުންނަށް ހެއްދެވުމެވެ. ނަޖީބާ ވަނީ އެކަން ވެސް ހާސިލު ކުރައްވައިފަ އެވެ. އޭނާގެ ހަތަރު ބޭފުޅުންގެ ތެރެއިން ތިން ބޭފުޅުން މިއަދު ވަނީ މަތީ ތައުލީމު ހާސިލުކުރައްވައި ގައުމީ ޚިދުމަތަށް ނިކުންނަވައިފަ އެވެ. ހަތަރު ވަނަ ބޭފުޅާ ގެންދަވަނީ މަތީ ސާނަވީ ތައުލީމު ފުރިހަމަކުރައްވަމުންނެވެ.

"އަޅުގަނޑަށް މި ލިބުނު ގައުމީ އިނާމު އަޅުގަނޑު މި ހަދިޔާކުރަނީ އަޅުގަނޑުގެ ލޯބިވާ ފިރިމީހާ އަދި ހަތަރު ދަރީންނަށް. އަޅުގަނޑުގެ ހަޔާތުގައި މި ކުރެވުނު ހުރިހާ މަސައްކަތެއްގެ އަސްލަކީ އަދި ސަބަބަކީ ވެސް އެ ހަތަރު ބޭފުޅުން،" ނަޖީބާ ވިދާޅުވި އެވެ.