ނެޝަނަލް އާޓް ގެލަރީގައި މިހާރު ކުރިއަށް ގެންދާ މޯލްޑިވްސް މެޑިކަލް ހެލްތު އެކްސްޕޯ އެކްޒިބިޝަންގައި ދަރިމައިވުމުގެ ސިއްހަތުގައި ފިރިހެނުންގެ ދައުރާ ބެހޭ މުހިންމު މައުލޫމާތުތަކެއް ދިނުމަށް ހަަމަޖެހިފައިވާ ސޮސައިޓީ ފޯ ހެލްތު (ޝީ) އިން ބުނެފިއެވެ.
ކަމަށް ހެލްތު އެކްސްޕޯގައި ބައިވެރިވި ޝީގެ ޕްރޮގްރާމް ޑައިރެކްޓަރު އައިޝަތު ނާޒް ވިދާޅުވީ ޒަމާނުއްސުރެ ދިވެހިންނަށް ހީވެފައި އޮންނަނީ ރާއްޖޭގައި އާއިލާތައް ބައްޓަންކުރުމަކީ އަންހެނުންގެ ޒިންމާއެއް ކަމަށެވެ. ނަމަވެސް އާއިލާ ރޭވުމުގައި ފިރިހެނުންގެވެސް ވަރަށް ބޮޑު ދައުރެއް އޮންނަކަމަށް ނާޒް ފާހަަގަ ކުރެއްވިއެވެ.
އާޓް ގެލަރީގައި ކުރިއަށްދާ ހެލްތު އެކްސްޕޯގައި ޝީއިން މިރޭ ކުރިއަށް ގެންދާ ސެޝަނުގެ ޕޯސްޓަރެއް--ފޮޓޯ: ޝީ
މިރޭ 8:00 އިން 10:00 އަށް އާޓް ގެލެރީގައި ކުރިއަށް ގެންދާ އެ ސެޝަންގައި މައުލޫމާތު ދެއްވާނީ ޝީގެ ޓެކްނިކަލް ބޭފުޅުން ކަމަށް ނާޒް ވިދާޅުވިއެވެ.
ދަރިމައިވުމުގައި އަންހެނުންނެކޭ އެއްގޮތަށް ފިރިހެނުންނަށް ވެސް މައްސަލަތައް ދިމާވާ ކަމަށާއި އަދި އެފަދަ މައްސަލަތަކުގެ ސަބަބުން ދަރިން ލިބުމުގައި ދަތިވާ ކަމަށް ނާޒް ފާހަގަ ކުރެއްވިއެވެ. އޮގޮތުން ޓެސްޓިކިއުލާ އަދި ޕްރޮސްޓޭޓް ކެންސަރު ފަދަ ބަލިތަކުގެ އިތުރުން ޕްރިމޭޗާ އިޖެކިއުލޭޝަނާއި އިރެކްޓައިލް ޑިސްފަންކްޝަންފަދަ މައްސަލަތައް ފިރިހެނުންނަށް ވަރަށް ގިނައިން ދިމާވާ ކަމަށްވެސް ނާޒް ވިދާޅުވިއެވެ.
ޝީގެ ސްޓޯލަށް ވަންނަ ބޭފުޅުންނަށް ލޭގެ ޕްރެޝަރު ބެލުމާއި ހަކުރުބަލީގެ ޓެސްޓް ހިލޭ ހެދޭނެއެވެ.