ބާސެލޯނާގެ ތަރި ލިއޮނަލް މެސީ އޭނާގެ 600 ވަނަ މެޗު އެ ޓީމަށް ކުޅެދޭން މިރޭ ނުކުންނަ އިރު، ކޯޗު އާނެސްޓޯ ވަލްވޭޑޭ މެސީ އަށް ތައުރީފުގެ ބަސްތައް ބަންޑުން ކޮށްލައިފި އެވެ.
ސްޕެނިޝް ލީގުގައި މިރޭ ސެވިއްޔާ އާ ދެކޮޅަށް ބާސާ ކުޅޭ މެޗަށް މެސީ ނުކުންނާނީ ކުލަބުގެ ތާރީހުގައި ވެސް ތިން ވަނައަށް އެންމެ ގިނަ މެޗު ކުޅެދީފައިވާ ކުޅުންތެރިޔާގެ ގޮތުގަ އެވެ.
އުމުރުން 30 އަހަރުގެ މެސީ އެންމެ ފުރަތަމަ ބާސާއަށް މެޗެއް ކުޅެދިނީ އޮކްޓޯބަރު 2004 ގައެވެ. އޭގެ ފަހުން އޭނާ ވަނީ އެ ޓީމަށް 599 މެޗު ކުޅެދީ 523 ލަނޑު ކާމިޔާބު ކޮށްދީފަ އެވެ. މެސީއަކީ ބާސާ އަށް އެންމެ ގިނަ ލަނޑު ކާމިޔާބު ކޮށްދީފައިވާ ކުޅުންތެރިޔާ އަށް ވާއިރު، އޭނާގެ އަމާޒު ހުރީ ޒާވީގެ 767 މެޗުގެ ރެކޯޑު މުގުރާލައި އެ ޓީމަށް އެންމެ ގިނަ މެޗު ކުޅެދިން ކުޅުންތެރިޔާ އަށް ވުމަށެވެ.
ބާސާގެ ކޯޗު ވަލްވޭޑޭ ބުނީ މެސީ ކުޅެފައިވާ 599 މެޗުގައި އޭނާ ދައްކާފައިވާ މޮޅު ކުޅުމަކީ މި އަދަދު އިތުރަށް ފުރިހަމަ ކޮށްދޭ ކަމެއް ކަމަށެވެ.
"އެއް ޓީމަކަށް ލަނޑު ޖަހައި ދީ އެސިސްޓް ކޮށް ދިނުމަކީ އޭނާގެ މޮޅުކަން ދައްކުވައިދޭ ކަމެއް. އޭނާ އަށް ތައުރީފު ކުރާނެ ބަސްތައް މިވަނީ ހުސްވެފައި. އަހަރެންނަށް ނޭނގޭ މީގެ ފަހުން ވެސް މި ކުލަބަށް އޭނާގެ ފެންވަރުގެ ކުޅުންތެރިޔަކު އަންނާނެ ކަމެއް." ވަލްވޭޑޭ ބުންޏެވެ.
ސެވިއްޔާ އާ ދެކޮޅަށް މިރޭ ނުކުންނައިރު މެސީ ވަނީ މިހާތަނަށް އެ ޓީމާ ދެކޮޅަށް ކުޅުނު 20 މެޗުގައި 29 ލަނޑު ޖަހާފައެވެ. އެހެންކަމުން ސެވިއްޔާ އަކީ މެސީ އިދިކޮޅުން އެންމެ ކުޅެން ބޭނުންވާ ޓީމެވެ.