(ކޮކްސް ބާޒާރު، ބަނގުލަދޭޝް) - މިޔަންމާ ބޯޑަރާ އެންމެ ކައިރިން ބަނގްލަދޭޝްގައި އޮންނަ ކޮކްސް ބާޒާރު ނޫނީ ޕަނޯވާ (ބަންގާޅު ބުނާ ގޮތުންނަމަ ރީނދޫ މާ)ގެ އެއާ ޕޯޓުން ފެށިގެން 45 ކިލޯ މީޓަރު ދުރުގައި އޮންނަ އުހިޔާ ސްޓޭޓަކީ މިހާތަނަށް ބަންގާޅަށް އެންމެ ގިނަ އަދަކަށް ރޮހިންގާ މުސްލިމުން ވަދެ ކޭމްޕް ކޮށްގެން ތިބި ސަރަހައްދެވެ.
ސަން އިން ރޮހިންގާ ކޭޕްމް ތަކަށް ކުރާ ދަތުރުގައި މިއަދު އެ ކޭމްޕަށް ޒިޔާރަތް ކުރީމެވެ. އެތަނުގައި ތިބި ރޮހިންގާ މުސްލިމުންނާ ބައްދަލުކޮށް އެ ކޭމްޕުތަކުގެ ހާލަތު ބަލައި ރޮހިންގާ މުސްލިމުންނާ ވާހަކަ ދައްކައި ހަދާލީމެވެ.
އެއްވެސް އިންސާނީ ވަސީލަތެއް ލިބެން ނެތް އެ ކޭމްޕުތަކުގެ ވަރަށް އެތެރެއަށް ވަދެ ރޮހިންގާ އާއިލާތަކާ ބައްދަލު ކޮށްލަން ލިބުނު އެ ފުރުސަތުގައި އެތައް ސަތޭކަ ބަޔަކާ މިއަދު ވެސް ބައްދަލުވިއެވެ. ދެފަރާތުން ކޮނެ، މައި މަގާ ވަކިކޮށްފައި އޮތް ކޭމްޕަށް ދާން ޖެހުނީ ދެ ފޫޓް ހަމަނުވާ ބްރިޖެއް ފަދަ ތަނެއްގެ މަތިންނެވެ. ފުރަތަމަ ކޭމްޕަށް ވަން އިރު، މި ބުނާ ބްރިޖް ނިމޭ ހިސާބުގައި ކުޑަ ކުއްޖަކު ގޮވައިގެން އަންހެނަކު އިނެވެ. އިނީ އެތާ ހުރި ގަހެއްގައި ލެނގިލައިގެންނެވެ. މީހަކަށް އިންތިޒާރު ކުރާ ކަހަލައެވެ.
ސަންގެ ނޫސްވެރިޔާ ސަމާހު ރާބިއަހުގެ ދަރިފުޅު އުރައިގެން ހުރިއިރު، އެ މަންޒަރު ބަލަން ރާބިއަހު އާއި އޭނާގެ މަންމަ --- ސަން ފޮޓޯ/ ޙުސައިން ޙަސަން
ކޭމްޕް ތެރޭގައި ދެ ގަޑިއިރު އުޅުމަށްފަހު އެނބުރި އައި އިރުވެސް އެ އަންހެންމީހާ އެތަނުގައި އިންދާ ދުށީމެވެ. އޭނާގެ ވާހަކަ އޮޅުން ފިލުވާލުމަށް މައިކު ދިއްކޮށްލުމުން އޭނާގެ އުދާސްތައް އެއްވެސް ހިފަހެއްޓުމެއް ނެތި ކިޔައިދިނެވެ.
"މީނީ ފިރިމީހާ ފެނޭތޯ. ހަފްތާއެއްވީ އަހަރެން މިތާ މި ގޮތަށް އިންނަތާ، ފިރިމީހާގެ ޚަބަރެއް ނުވެގެން. ކާނެ ގޮތެއް ނެތް. ފެންވަރާނެ ގޮތެއް ނެތް. މި ދަރިފުޅަށް ބޭސް ކުރެވޭނެ ގޮތެއް ވެސް ނެތް. އަހަރެންގެ ދިރިހުރުމުގެ އުންމީދު ކަމަށްވާ ފިރިމީހާއެއްވެސް ނެތް،" އުމުރުން 30 އަހަރުގެ ރާބިއާއަހު ވާހަކަ ފެށީ މީހެންނެވެ.
ރާބިއާ ދިރިއުޅުނު ގައުމު ދޫކޮށް އޭނާ ބަންގާޅަށް އައިތާ މިއަދަށް ހަތް ދުވަސްވީއެވެ. އޭނާ ބަންގާޅަށް އައީ ކަނޑު މަގުން ބޯޓެއްގައެވެ. އޭނާއާ އެކު އޭނާގެ މުސްކުޅި މަންމަ އަދި ހުރި އެންމެ ދަރި ވެސް ވަނީ ބަންގާޅަށް ހިޖުރަކޮށްފައެވެ. އޭނާ ބަންގާޅާށް ހިޖުރަކުރަން ޖެހުނީ ވެސް އޭނާގެ ފިރިމީހާ ވީނުވީ ތަނެއް ނޭނގި ގެއްލުނީމައެވެ.
"ފިރިމީހާ ދިޔަތަނެއް ﷲ ދެނަވޮޑިގެންވާނީ. އުންމީދަކީ ގަދަވެ ސަލާމަތުން ހުރުން. އެކަމަކު މިހާރު ދެ ހަފްތާވަނީ ފިރިމީހާ ގެއްލުނުތާ. އަހަރަމެން މިކޮޅަށް ދަތުރު ފެށުމުގެ ތިން ދުވަސް ކުރިން ގެއްލުނީ. ދެން މިތަނަށް އައީ ގާތް މީހުން ބުނީ ފިރިމީހާ މަރާލައިފިއޭ،" ރާބިއާގެ ވާހަކަ މިހާ ހިސާބުން އިރުކޮޅަކަށް މެދު ކެނޑުނީ ކައިރީގައި އިން އޭނާގެ މުސްކުޅި މަންމަ ރޯން ފެށުމުންނެވެ.
ރާބިއާއަހު، 30: އޭނާގެ ކައިވެންޏަށް ފަސް އަހަރުވީފަހުން ހިންގި ގަތުލު އާންމުގައި ފިރިމީހާ ވަނީ ގެއްލިފައި --- ސަން ފޮޓޯ/ ހުސައިން ހަސަން
ރާބިއާ ބުނާގޮތުން އޭނާގެ ފިރިމީހާ އެ ގައުމުގައި ދާދި ފަހުން އެއްފަހަރާ މަރާލި 700 މީހުންގެ ތެރޭގައި ހިމެނިދާނެ ކަމަށް އޭނާއަށް ވުރެ ފަހުން ކޭމްޕަށް އައި މީހުން ބުނެއެވެ. ނަމަވެސް އޭނާ އެވާހަކަ ގަބޫލުކުރާކަށް ބޭނުމެއް ނުވެއެވެ.
"ކިހިނެތް ގަބޫލު ކުރާނީ. އެއީ އަހަރެން ދިރިހުރުމުގެ އުންމީދު. ކިހިނެއް މި ދަރިފުޅު ބަލާ ބޮޑުކުރާނީ އަހަރެން އެކަނި. އަދިވެސް އުންމީދު އެބައޮތް އޭނާ އަންނާނެ ކަމުގެ. ނަމަވެސް އަހަރެންގެ ދެލޮލޮން ދުށިން މިޔަންމާ ސިފައިން މީހުން މަރާތަން އެހެންވީމަ ފިރިމީހާ މަރާލީ ކަމަށްވެސް ވެދާނެ،"
ރާބިއާ ބުނީ އޭނާ ކައިވެނި ކުރީވެސް މިޔަންމާގެ ސަރުކާރުން އަންގާފައި އޮންނަ ގޮތަށް އެ ސަރުކާރަށް ހުށަހަޅައިގެން ޖަވާބެއް ލިބޭތޯ އުޅޭތާ ހަ މަހަށް ވުރެ ގިނަ ދުވަސް ވީ ފަހުން ކަމަށެވެ. އަދި ފިރިމީހާ ގެއްލުނު އިރު ކައިވެންޏަށް ފަސް އަހަރު ވެފައިވާ ކަމަށާއި ދަރިފުޅަށް ދެ އަހަރާއި ބައި ވެފައިވާ ކަމަށެވެ.
ސަންގެ ނޫސްވެރިޔާ ސަމާހު ރޮހިންގާ މީހުންނާ އިންޓަވިއު ކުރަނީ: ރެފިއުޖީންގެ ގޮތުގައި ބަނގުލަދޭޝްއަށް އެތެރެވި ރޮހިންގާ މީހުންގެ އަދަދު 400،000 އަށް ވުރެ ގިނަ --- ސަން ފޮޓޯ/ ޙުސައިން ޙަސަން
"ދަރިފުޅަށް ނުއެއް ހިނގޭ. އޭނާގެ ފައި ވަނީ ވިހެއުމުގެ ތެރޭގައި އައިބު ވެފައި. މިހުރީނު، ދެފައި ހުންނަނީ ބޭރަށް ވާގޮތަށް އެނބުރިފައި،" ރާބިއާގެ އުނގުގައި އިން ތުއްތު ކުއްޖާގެ ފައި ދައްކާލަމުން އޭނާ ބުންޏެވެ.
ރާބިއާ ބުނިގޮތުގައި އޭނާ ބަންގާޅަށް އައިތާ ހަފްތާއަކަށް ވުރެ ގިނަ ދުވަސް ވެފައިވާއިރު އުޅޭނެ ޖިފުޑިގަނޑެއްހާ މިންވަރު ވެސް ލިބިފައި ނުވެއެވެ. އަދި ބޯނެ ސާފު ފެންފޮދެއް ވެސް ނުލިބޭ ކަމަށާއި އަދި ދަރިފުޅަށް ދޭނެ ކާ އެތިކޮޅެއްގެ މިންވަރު ނުލިބޭ ކަމަށްވެސް އޭނާ ބުންޏެވެ. އޭނާ ބުނީ ފިރިމީހާއަށް އިންތިޒާރު ކުރެވެނީ އޭނާ ހުރި ނަމަ މި ތަނުގައި މިއަދު އުޅެމުންދާ ހާލަތު ބަދަލު ކުރެވިދާނެތީ ކަމަށެވެ.
"ފިރިރިއެއްގެ އެހީ ނުލިބި ކިހިނެއް އަހަރަމެން ތިން މައިން މިހެން އުޅޭނީ. ނިދަން އޮށޯތަސް ފެންނަނީ މިޔަންމާ ސިފައިންގެ އަނިޔާވެރިކަން. ނުއެއް ނިދޭ މީހުން ހަޅޭއްލަވާ އަޑު އިވޭ. ހައިހޫނުކަން މަތީ ދުވަހުގެ ބޮޑުބައި މިދަނީ. ހިތަށް އަރަނީ ފިރިމީހާ ހުރި ނަމަ މިއަށްވުރެ ރަނގަޅު ވާނެއޭ. އެހެންވެ އިންތިޒާރު ކުރެވެނީ،"