މިޔަންމާގެ ރޮހިންޔާ ދަރިކޮޅުގެ މުސްލިމުންނާ ދެކޮޅަށް އެގައުމުގައި ހިންގަމުންދާ ލާއިންސާނީ ޖަރީމާތަކުގައި އެތައް ހާސް މުސްލިމުންނެއް މިއަދު މިވަނީ ވަންނާނެ ގެދޮރެއް ނެތި، ބިކަވެފައެވެ. ކާއެއްޗެއް ނުލިބި ބަނޑަށް ޖެހިފައެވެ. އާއިލާ އާއި ދަރިން މިއަދު އެވަނީ އަނިޔާވެރިކަމުގެ ޝިކާރައަކަށްވެ ދުނިޔެ ދޫކޮށްފައެވެ.
އަނިިޔާވެރިކަމުން ސަލާމަތްވި ރޮހިންޔާ މުސްލިމުން، އެމީހުންނަށް ކުރިމަތި ލާންޖެހުނު ހިތްދަތި ވާހަކަތަކާއި އުޅޭ ދަތި ހާލުން ކަރުނަ އަޅާ ރޮވޭއިރު އެ ހާލު ދިމާވެފައިވާ މުސްލިމުންގެ ހިތަށް ކޮށްލާނެ އަސަރު އިހުސާސް ވެސް ނުކުރެވޭނެ އެވެ.
ރޮހިންޔާ މުސްލިމުންގެ މައްސަލައަށް މުޅި ދުނިޔޭގެ ސަމާލުކަން ހުއްޓިފައިވާއިރު އެ ހަމަނުޖެހުންތަކުން ސަލާމަތްވެ އަވަށްޓެރި ބަންގާޅަށް ހިޖުރަކުރި ރޮހިންޔާ މުސްލިމުންގެ އަދަދު މިވަނީ ތިން ލައްކައަށް އަރާފައެވެ. މިހާރު ވެސް ތޮއްޖެހިފައިވާ ބަނގުލަދޭޝްގެ ރެފިއުޖީ ކޭމްޕުތަކުން އެ މުސްލިމުން ހިޔާވަހިކަން ހޯދަމުންދާއިރު، މިހާރު ތަހައްމަލު ކުރަމުން އެ ދަނީ ވެސް ހިތްދަތި ދިރިއުޅުމެކެވެ.
އުޅެންޖެހެނީ ތޮއްޖެހިފައިވާ ޓެންޓުތަކެއްގައެވެ. އަންނައުނާއި ކާނާ އަދި ބޭހަށް ވަނީ ކޮންމެހެން ވެސް ބޭނުންޖެހިފައެވެ. ނަމަވެސް ބަންގާޅަށް އެތެރެވެފައިވާ ރޮހިންޔާ މީހުންގެ އަދަދު އިންތިހާއަށް އިތުރުވެފައިވާތީ، އެހީ ދޭ ޖަމިއްޔާ ޖަމާއަތްތަކުން ދަނީ އެކަމުގައި އެހީތެރިވުމަށް ދުނިޔޭގެ ގައުމުތަކަށް ގޮވާލަމުންނެވެ.
އެކަމަށް އިޖާބަދިނުމުގެ ގޮތުންނާއި އިންސާނިއްޔަތަށް ގިނަ ގައުމު ތަކަކުން އެގައުމެއްގެ ފެންވަރު ވަނީ އެހީ ފޯރުކޮށްދޭން ފަށާފައެވެ. އަދި ބައެއް ގައުމުތަކުގައި ރޮހިންޔާގެ މުސްލިމުންނަށް ކުރާ އަނިޔާތައް ހުއްޓާލައި އެމީހުންނަށް ހިމާޔަތާއި ރައްކާތެރިކަން ދިނުމަށް ގޮވާލާ މުޒާހަރާތައް ކުރަމުންދާއިރު ރޮހިންޔާ މުސްލިމުންނަށް އެހީވުމަށް ފައިސާ ހޯދުމުގެ ހަރަކާތްތަކެއް ދަނީ ހިންގަމުންނެވެ.
ރޮހިންޔާ މުސްލިމުންނަށް އެހީވުމަށް ތުރުކީގެ ހުޅަނގުއިތުރުގެ ޕްރޮވިންސެއްގައި ދިރިއުޅެމުންދާ 40 އަހަރުގެ އިރްކަން އައިހަން ވެސް ވަނީ ބައިވެރިވެފައެވެ. ސާދަ އަހަރު ވަންދެން އޭނާ އާމްދަނީ ހޯދުމަށް ކުރަމުންދިޔަ މަސައްކަތަކީ ވަށްކޮށް ހުންނަ ވައްތަރެއްގެ ބަނަހެއް ވިއްކުމެވެ. ބަނަސްކޮޅު ވިއްކައިގެން ލިބޭ އާމްދަނީން ދެކޮޅު ޖެހެނީ ކިރިޔާއެވެ.
ނަމަވެސް ރޮހިންޔާ މުސްލިމުންގެ ހައްގުގައި އޭނާ ވަނީ ބަނަސް ވިއްކައިގެން ދެ ދުވަހު ލިބުނު 147 ޓާކިސް ލިރާސް (43 ޑޮލަރު) ރޮހިންޔާއަށް އެހީވުމަށް ފައިސާ އެއްކުރަމުންދާ ތުރުކީގެ ޖަމިއްޔާއެއް ކަމަށްވާ ހިއުމެނިޓޭރިއަން ރިލީފް ފަންޑު (އައިއެޗްއެޗް) އަށް ހަދިޔާ ކޮށްފައެވެ.
"މިޔަންމާގެ ސަރުކާރުން ރަހީން ސްޓޭޓުގެ މުސްލިމު އަޚުންނާއި އުޚުތުން މަރަމުންދާއިރު، އެ މަންޒަރުތައް ފެނިފައި އަހަންނަކަށް ނުވެސް ނިދުނު. އަޟްހާ އީދުގައި އަހަންނަކަށް ކާކަށް ވެސް ނުކެރުނު،" އައިހަން ބުންޏެވެ.
އަދި އޭނާ ވަނީ ހާލުގައި ޖެހިފައިވާ ރޮހިންޔާ މުސްލިމުންނަށް ދުއާކޮށް އެހީވުމަށް ދުނިޔޭގެ ހުރިހާ މުސްލިމުންނަށް ގޮވާލާފައެވެ.