މިޔަންމާގައި މުސްލިމުން ދިރިއުޅޭ ރަހީން ސްޓޭޓުގައި އެގައުމުގެ އަސްކަރިއްޔާއިން ހިންގަމުންދާ ލާއިންސާނީ އަމަލުތަކުން ސަލާމަތްވެ ވޭތުވެދިޔަ ދެ ހަފްތާތެރޭގައި މިޔަންމާ ދޫކޮށް، ބަންގާޅަށް ހިޖުރަކުރި މުސްލިމުންގެ އަދަދު 270،000 އަށް އަރާފައިވާ ކަމަށް އދ.ގެ ރެފިއުޖީންނާ ބެހޭ ކޮމިޝަނުން ބުނެފިއެވެ.
މިޔަންމާގައި މިހާރު ހިނގަމުންދާ އަނިޔާވެރިކަަން ފެށުނީ، މިދިޔަ އަހަރުގެ އޮކްޓޫބަރު މަހުގެ 25 ވަނަ ދުވަހު ރޮހިންޔާ ދަރިކޮޅަށް ނިސްބަތްވާ ކުޑަ ގްރޫޕަކުން ''ބޯޑާ ޕޯސްޓް''ތަކަކަށް ހަމަލާދިނުމާ ގުޅިގެން ކަމަށްވެއެވެ.
އދ.ގެ ރެފިއުޖީ އޭޖެންސީގެ ތަރުޖަމާން ވިވިއަން ޓޭން ވިދާޅުވީ، ބަނގުލަދޭޝްއަށް އެތެރެވި ރޮހިންޔާ މުސްލިމުންގެ އަދަދު 164،000 އިން ކުއްލިއަކަށް ހުރެފައި މައްޗަށް އަރައިގެންދިޔައީ، ބޯޑަރު ސަރަހައްދުގައި ތިބި ބައެއް ރެފިއުޖީން ބަންގާޅަށް އެތެރެވިކަން ފާހަގަވުމުން ކަމަށެވެ.
އދ.ގެ އޮފިޝަލަކު ވިދާޅުވި ގޮތުގައި، މިޔަންމާގައި އެންމެ ފަހުން ފެށި ހަމަނުޖެހުންތަކުގައި މިހާތަަނަށް 1000 އަށްވުރެ ގިނަ މީހުން މަރުވެފައިވާ ކަމަށާއި އޭގެ ތެރޭގައި ގިނައީ ރޮހިންޔާ މުސްލިމުން ކަމަށެވެ.
"މި އަދަދުތަކަކީ ހައިރާންކުރަނިވި އަދަދުތަކެއް. މީގެން އެނގިގެންދަނީ މިޔަންމާގެ މައްސަލަތަކަށް ވީހާވެސް އަވަހަކަށް ފިޔަވަޅުތަކެއް އަޅަންޖެހޭކަން،" ޓޭން ވިދާޅުވިއެވެ.
އދ.ގެ ރެފިއުޖީ އޭޖެންސީން ބުނާ ގޮތުގައި، މިޔަންމާގެ ހަމަނުޖެހުން ފެށި، އެގައުމުގައި ދިރިއުޅޭ މުސްލިމުން ބަންގާޅަށް އެތެރެވުމުގެ ކުރިން ވެސް ދެކުނު އިރުމަތީ ބަންގާޅުގެ ދެ ރެފިއުޖީ ކޭމްޕެއްގައި ގާތްގަނޑަކަށް 34000 ރޮހިންޔާ ރެފިއުޖީން ދިޔައީ ދިރިއުޅެމުންނެވެ.
އަދި ހަމަނުޖެހުމަށްފަހު އެ އަދަދު ދެ ގުނަ އިތުރުވެފައިވާއިރު ބަންގާޅަށް އެތެރެވި އިތުރު ރޮހިންޔާ މުސްލިމުންނަށް ބިމާއި ބޯހިޔާވަހިކަން ބޭނުންވާ ކަމަށް ބުނެފައިވެއެވެ.
"ބަންގާޅަށް އެތެރެވި ރޮހިންޔާ މީހުންގެ ގިނަ އަދަދެއްގެ މީހުންނަކީ އަންހެނުން. އޭގެ ތެރޭގައި ތުއްތު ކުދިން ގޮވައިގެން އުޅޭ މަންމަ އިންނާއި ކުދިން ހިމެނޭ އާއިލާތައް ހިމެނޭ. އެމީހުން ބަންގާޅަށް އައިއިރު ތިބީ ނިކަމެތި ހާލެއްގައި، ވަރުބަލިވެ، ބަނޑުހައިވެ އަދި ބޯހިޔާވަހި ކަމަކަށް ބޭނުންވެފައި،" ޖެނީވާގައި ރިޕޯޓަރުންނަށް މައުލޫމާތުދެމުން އދ.ގެ ރެފިއުޖީ އޭޖެންސީން ބުންޏެވެ.