ރޮހިންޔާ މީހުންގެ ކައިރިއަށް ވަޑައިގެން، އެހީ ބެއްސެވުމުގައި ތުރުކީގެ ފަސްޓުލޭޑީ

ތުރުކީގެ ރައީސް ތޮއްޔިބް އުރްދުއާންގެ އަނބިކަނބަލުން އެމިން އުރުދުއާން ބަންގަލްދޭޝްއަށް ވަޑައިގެން ރޮހިންޔާ މުސްލިމު ރެފިޔުޖީންނާ ބައްދަލުކުރައްވައި އެމީހުންނަށް އެހީގެ ތަކެތި ބެއްސެވުމުގައި އަމަލީގޮތުން ބައިވެރިވެވަޑައިގަންނަވައިފި އެވެ.

"އަހަރެން އުއްމީދު ކުރަން ރޮހިންޔާ މުސްލިމުންނަށް ދިމާވެފައިވާ ހާލަތާ ދޭތެރޭ ދުނިޔެއިން ވިސްނައި އަދި ސިޔާސީ ގޮތުންނާއި އަދި އިންސާނިއްޔަތުކަމުގެ ގޮތުން އެހީތެރިވެދޭނެ ކަމަށް،" އެހީގެ ތަކެތި ބައްސަވަމުން މީޑިއާއާ ވާހަކަދައްކަވަމުން އެމިން ވިދާޅުވިއެވެ.

އދ. އިން ބުނާ ގޮތުގައި މިފަހުން ހަމަލާތައް ދޭން ފެށިފަހުން ފާއިތުވި 12 ދުވަސްތެރޭ 146000 ރޮހިންޔާ މުސްލިމުން ބަންގްލަދޭޝްއަށް ވަނީ އެތެރެވެފައެވެ. ވާލްޑް ފުޑް ޕްރޮގްރާމުން އަންދާޒާ ކުރާ ގޮތުގައި ރެފިއުޖީންގެ އަދަދު ކުރިއަށް އޮތް ދުވަސްތަކުގައި 300000 އެރުމަކީ ވެސް އެކަށީގެންވާ ކަމެކެެވެ.

އެމިންގެ އެ ދަތުރުގައި އެކަމަނާގެ ދަރިކަލުން ބިލާލް އުރުދުއާން އަދި ތުރުކީގެ ހަރިޖީ ވަޒީރު މެވްލޫތު ކަވަސޮއޮލޫ ވެސް ބައިވެރިވެވަޑައިގެންނެވިއެވެ.

"އަހަރުމެން ބޭނުންވަނީ ރޮހިންޔާ މުސްލިމުންގެ ހާލަތު މުޅި ދުނިޔެއަށް އަންގައިދޭން. އަހަރުމެން މަސައްކަތް ކުރަމުންދަނީ ރޮހިންޔާ މުސްލިމުންނަށް ދޭ ހަމަލާތައް ހުއްޓުވުމަށް. މި މައްސަލައަށް ދާއިމީ ހައްލެއް ހޯދުމަށްޓަކައި އަހަރެމެން އެމެރިކާގެ ނިއުޔޯކުގަ އަދި ކަޒަކަސްތާނުގެ އަސްތާނާގައި ބައްދަލަވުމެއް ބޭއްވުމަށް މިދަނީ ތައްޔާރުވަމުން،" ކޮވަސޮއޮލޫ މީޑިއާ އަށް މައުލޫމާތު ދެމުން ބުންޏެވެ.

ތުރުކީގެ ބޮޑުވަޒީރު ތައްޔިބު އުރުދުއާން ވަނީ މިމަހު 19 ވަނަ ދުވަހު ބާއްވާ އދ.ގެ ޖެނެރަލް އެސްމްބްލީގައި ރޮހިންޔާގެ މައްސަލަ ނަންގަވާނެ ކަމަށް ވައުދުވެވަޑައިގެންފަ އެވެ.

މިޔަންމާ އިން ލިބޭ އަނިޔާއިން ސަލާމަތްވުމަށް ބަންގުލަދޭޝްއަށް ދާ ރޮހިންޔާ މުސްލިމުންނަށް އެ ގައުމުގެ ބޯޑަރު ހުޅުވައި ދިނުމަށާއި، އެ މީހުންގެ ހުރިހާ ހަރަދެއް ބަަލައްހައްޓާނެ ކަމަށް ދާދި ފަހުން ތުރުކީން ވަނީ ބުނެފައެވެ.

އދ. އިން ނެރެފައިވާ ރިޕޯޓުގައި ވަނީ ރޮހިންޔާ މުސްލިމުންނާ ދެކޮޅަށް ދޭ ހަމަލާތައް ވަރަށް ރީއްޗަށް ބަޔާންކޮށްފަ އެވެ. އޭގެ ތެރޭގައި ރޮހިންޔާ މުސްލިމުން މެރުމާއި އިއްފަތްތެރިކަން ފޭރުމާއި، އަނިޔާ ކުރުމާއި ގެއްލުވާލުން ވެސް ހިމެނެ އެވެ. ރޮހިންޔާގެ ރެޕްރެޒެންޓޭޓިވްސް އިން އަންދާޖާ ކުރާގޮތުގައި މިޔަންމާ ސިފައިން އޮޕަރޭޝަން ފެށިފަހުން 400 މުސްލިމުން ވަނީ މަރައިލައިފަ އެވެ.