ކޮންމެ މީހަކަށްވެސް ޝަރަފުވެރިކަމާއެކު އަމިއްލަ ގެދޮރެއްގައި ދިރިއުޅެވޭނީ ގެދޮރު އިމާރާތްކުރާ ފަރާތްތަކަށް މާލީ އިދާރާތަކުން ހަރަދުކުޑަ ގޮތެއްގައި ލޯނު ލިބޭނެ މަގުފަހިވެގެންކަމަށް މަރުކަޒީ ބޭންކުގެ ގަވަރުނަރު ޑރ. އަޒީމާ އާދަމް ވިޑާޅުވެއްޖެއެވެ.
މިއަދު ހެނދުނު ވަނީ، އެމްއެމްއޭގެ އަހަރީ މައުރަޒު، މޯލްޑިވްސް ފައިނޭންޝަލް އެކްސްޕޯ ހުޅުވައިފައެވެ. މިއަދު ފެށި މޯލްޑިވްސް ފައިނޭންޝަލް އެކްސްޕޯ މައުރަޒު ހުޅުވުމުގެ ރަސްމިއްޔާތުގައި ވާހަކަ ދައްކަވަމުން އެމްއެމްއޭގެ ގަވަރުނަރު ޑރ. އަޒީމާ އާދަމް ވިދާޅުވީރާއްޖޭގެ ތަރައްގީގައި މިވަގުތު އެންމެ މުހިންމު ކުރިއެރުމެއް ހޯދަންޖެހެނީ ގެދޮރުވެރިކަން ކަމަށެވެ.
ގެދޮރުވެރިކަމާ ނުލައިވެސް ގައުމުގެ އިގްތިސާދީ ދުވެލި ބާރު މިނުގައި ކުރިޔަށް ގެންދެވިދާނެކަމާށާއި، އެހެން ނަމަވެސް ރައްޔިތުންގެ ދިރިއުޅުމުގެ ފެންވަރު މަތިކޮށް، ރައްޔިތުން ބާރުވެރިކުރެވޭނީ ކޮންމެ މީހަކަށްވެސް އަމިއްލަ ގެދޮރު ހުރެގެން ކަމަށް އެކަމަނާ ވިދާޅުވިއެވެ.
މިއަދު ދަރުބާރުގޭގައި ފެށި، އެމްއެމްއޭގެ އަހަރީ މައުރަޒު، ފައިނޭންޝަލް އެކްސްޕޯގެ ތެރޭން -- ސަން ފޮޓޯ: ފަޔާޒް މޫސާ
ގަވަރުނަރު ވިދާޅުވީ ކޮންމެ މީހަކަށްވެސް އަމިއްލަ ގޭގައި ނުވަތަ ފްލެޓެއްގައި އަބުރުވެރިކަމާއެކު އާއިލާއާއެކު ދިރިއުޅެވެން ޖެހޭނެ ކަމަށެވެ. އެހެން ނަމަވެސް އެކަން ކުރެވޭނީ ގެދޮރުވެރިކަމާ ގުޅޭ ސިޔާސަތުތައް ބައްޓަންކުރެވި، ގެދޮރު އެޅުމަށް ހިނގާ ހަރަދު ކުޑަކުރެވި، އެމަސައްކަތް ކުރާ ފަރާތްތަކަށް މާލީ އިދާރާތަކުން ޚަރަދުކުޑަ ގޮތެއްގައި ލޯނު ލިބޭނެ މަގު ފަހިވެގެން ކަމަށް އަޒީމާ ވިދާޅުވިއެވެ.
ގަވަރުނަރު ވިދާޅުވީ ހައުސިންގް ލޯނަކީ ހަމައެކަނި މުއްސަނދިންނަށް ލިބެންޖެހޭ އެއްޗެއް ނޫން ކަމަށާއި، އެންމެ އާދައިގެ ވަޒީފާ އަދާކުރާ މީހާއަށްވެސް އަމިއްލަ ގެއެއް ނުވަތަ ފްލެޓެއް އެޅުމަށް ލިބެންޖެހޭ އެއްޗެއް ކަމަށވެ.
"ހައުސިން ލޯނަކީ، އޭނާގެ ވަޒީފާއިން ލިބޭ މުސާރައިން ދެއްކޭނެ ލޯނަކަށް ވާންއެބަޖެހޭ. ހައުސިން ލޯނަކީ، ހަމައެކަނި މުއްސަނދި، ނުވަތަ ބޮޑު މުސާރަލިބޭ މީހުންނަށް އެކަނި ލިބޭ އެއްޗަކަށް ވެގެނެއްނުވާނެ” ގަވަރުނަރު ޑރ. އަޒީމާ ވިދާޅުވިއެވެ.
މިއަދުން ފެށިގެން ހޮނިހިރު ދުވަހުގެ ނިޔަލަށް ފައިނެންޝަލް އެކްސްޕޯ ދަރުބާރުގޭގައި ކުރިޔަށްދާ އިރު، މި އެކްސްޕޯ މިއަހަރު ބާއްވަނީ ހައުސިންގް ޑިވެލޮޕްމެންޓް ކޯޕަރޭޝަން (އެޗްޑީސީ)އާ ގުޅިގެންނެވެ.
މިއަދު ދަރުބާރުގޭގައި ފެށި، އެމްއެމްއޭގެ އަހަރީ މައުރަޒު، ފައިނޭންޝަލް އެކްސްޕޯގެ ތެރޭން -- ސަން ފޮޓޯ: ފަޔާޒް މޫސާ
ގެދޮރުވެރިކަމުގެ ތީމްގެ ދަށުން ކުރިޔަށް ގެންދާ މިއަހަރުގެ މައުރަޒުގައި އެޗްޑީސީގެ އިތުރުން އެޗްޑީއެފްސީ، މޯލްޑިވްސް ފައިނެންސް ލީސިންގް ކޮމްޕެނީ، ސީއެމްޑީއޭ، މޯލްޑިވްސް ސްޓޮކް އެކްސްޗޭންޖް، ޕެންޝަން އޮފީސް، އިކޮނޮމިކް މިނިސްޓްރީ އަދި މީރާގެ އިތުުރުން ރާއްޖޭގެ ދެ މުއާސަލާތީ ކުންފުނި ދިރާގާއި އުރީދޫ ބައިވެރިވެއެވެ.
މީގެ އިތުރުނވެސް ރާއްޖޭގައި މަސައްކަތްކުރާ ރިއަލް އެސްޓޭޓް ޑިވެލޮޕަރުންނާއި ކޮންޓްރެކްޓަރުންނާއި، އާކިޓެކްޓުން އަދި އިންޓީރިއަރ ޑިޒަައިނަރުން ހިމެނޭ ގޮތަށް، 30 އަށް ވުރެ ގިނަ ފަރާތުން މައުރަޒުގައި ބައިވެރިވެއެވެ.
މި ފަރާތްތަކުން ގެދޮރު ގަތުމަށާއި، އަމިއްލަ ފަރާތްތަކުގެ ބިންތައް އިމާރާތްކުރުމަށް ހުރި ފުރުސަތުތަކާއި އެފަރާތްތަކަށް ފައިނޭންސް ހޯދޭނެ ގޮތްތަކާ ބެހޭ މައުލޫމާތު، އެކްސްޕޯއިން ލިބިގެންދާނެއެވެ. މީގެ އިތުރުން އެކްސްޕޯގެ ތެރެއިން ސެމިނާތައްވެސް ކުރިޔަށް ދާ އިރު، މައުރަޒުގެ ބައެއް ބައިވެރިންގެ އާ ޚިދުމަތްތަކާއި ޕްރޮޑަކްޓްތައް ލޯންޗުކުރުންވެސް އޮންނާނެއެވެ.