ސެމްސަންގް ކުންފުނިން އެމީހުންގެ 'ފްލޯ' އެޕްސް ތަކުގެ އަޕްޑޭޓް ތަކުގައި މައިކްރޯސޮފްޓް ވިންޑޯޒްގެ 'ވިންޑޯޒް ހެލޯ' ފީޗާއަށް ސަޕޯޓު ސާވިސް އިތުރުކޮށްފިއެވެ.
މިއަޕްޑޭޓްގެ ސަބަބުން ސެމްސަންގް ގެލެކްސީ ލައިންގެ އެސް 6، އެސް 7 އަދި އެސް 8ގެ ފޯނުތަކުގެ ފިންގާޕްރިންޓް ރީޑާ މެދުވެރިކޮށް ވިންޑޯސް އަޅާފައިވާ ޕީސީތައް ހުޅުވާލެވޭނެއެވެ.
ސެމްސަންގް އިން މި ހިދުމަތް އެންމެ ފުރަތަމަ ތައާރަފް ކުރީ މިދިޔަ އަހަރު އެކުންފުނީގެ ގެލެކްސީ ޓެބް އެސް ޕްރޯއަށެވެ. މިއީ މައިކްރޯސޮފްޓް ވިންޑޯސް 10 ރަން ކުރާ ޓެބްއެކެވެ. އޭގެފަހުން އެކުންފުނިން މިވަނީ އެހިދުމަތް ވިންޑޯސް 10 ބޭނުންކުރާ ހުރިހާ ޕީސީތަކެއް ސެމްސަންގް ގެލެކްސީ އެސް 8ގެ ފިންގާޕްރިންޓް ރީޑާ މެދުވެރިކޮށް ހުޅުވާލެވޭގޮތް ހަދައިފައެވެ.
މީގެ އިތުރުން ސެމްސަންގްއިން ވަނީ ސްމާޓްފޯނުގެ ނޮޓިފިކޭޝަންތައް ޕީސީއަށް ލިބޭ ހިދުމަތްވެސް ހުރިހާ ޕީސިތަކަކަށް ދީފައެވެ. މި ހިދުމަތް ލިބޭނީ ވިންޑޯޒް 10ގެ ކްރިއޭޓާޒް އަޕްޑޭޓް އަޅާފައިވާ ޕީސީތަކަށެވެ.