އަންނަ އަންގާރަ ދުވަހު ފަރަންސޭސިވިލާތާ ދެކޮޅަށް އިނގިރޭސިވިލާތުން ރަށުން ބޭރުގައި ކުޅޭ ބައިނަލްއަގުވާމީ އެކުވެރިކަމުގެ މެޗު ބައްލަވާ ލެއްވުމަށް އެގައުމުގެ ބޮޑުވަޒީރު ތެރިސާ މޭ ވަޑައިގަންނަވާ ގޮތަށް ހަމަޖެހިއްޖެ އެވެ.
މި މެޗު ކުޅުމަށް ހަމަޖެހިފައި ވާނީ ފްރާންސްގެ ވެރިރަށް ޕެރިސްގެ "ސްޓާޑޭ ޑެ ފްރާންސް" ސްޓޭޑިއަމްގަ އެވެ.
އެ މެޗު ކުޅޭ ދުވަސް ދިމާވަނީ އިނގިރޭސިވިލާތުގެ ބޮޑުވަޒީރު ތެރިސާ މޭ ފަރަންސޭސިވިލާތުގެ ރައީސް އެމަނުއެލް މެކްރޯންއާ ބައްދަލުކުރެއްވުމަށް ވެރިރަށް ޕެރިހަށް ވަޑައިގަންނަވާ ދުވަހާ ކަމަށްވާތީ، ދެ ގައުމުގެ އެކުވެރިކަން ބަދަހި ކުރުމަށް ދެ ގައުމުގެ އިސްވެރިން އެ މެޗު ބައްލަވާލެއްވުމަށް ވަޑައިގަންނަވާ ގޮތަށް ހަމަޖެހިފައިވާ ކަމަށް ބޭރުގެ ރިޕޯޓްތައް ބުނެ އެވެ.
އެ ދެ ގައުމުގެ މެދުގައި އަންގާރަ ދުވަހު ކުޅެވޭ އެކުވެރިކަމުގެ މެޗުގެ ކުރިން މި ފަހުން އިނގިރޭސިވިލާތުގެ ވެރިރަށް ލަންޑަންއަށާއި މެންޗެސްޓާ ޔުނައިޓެޑަށް ދިން ޓެރަރިސްޓް ހަމަލާތަކުގައި ގެއްލުން ލިބުނު އާއިލާތަކުގެ ހަނދާނުގައި ހަމަހިމޭން ކަމުގެ ސުކޫތެއް ގެނައުމަށް ވަނީ ހަމަޖެހިފަ އެވެ.
އޭގެ އިތުރުން އެ މެޗުގައި ދެޓިމުގެ ކުޅުންތެރިން ވެސް ކުޅުމަށް ހަމަޖެހިފައި ވަނީ ކަޅުކުލާގެ ބޭންޑްް އަޅައިގެންނެވެ. އަދި ކުޅުންތެރިން ދަނޑަށް ނުކުންނަ ވަގުތު ހާއްސަ ލަވައެއްވެސް ކިޔާ ގޮތައް ވަނީ ހަމަޖައްސާފަ އެވެ.
ފްރާންސާއި އިނގިރޭސިވިލާތް ކުޅޭ މެޗް އޮންނާނީ އަންނަ އަންގާރަ ދުވަހުގެ ރޭ 12:00 ގަ އެވެ. އެމެޗާއި ގުޅިގެން ފަރަންސޭސިވިލާތުގެ ސަލާމަތީ ކަންކަން ވަނީ އިތުރަށް ވަރުގަދަކޮށްފަ އެވެ.