މައިލޯ ފައިވް ކޭ ރަންގެ ފުރަތަމަ ދުވުން ވަރަށް ކާމިޔާބު ކަމަށާއި ސްޕޯޓްސް ކޯޕަރޭޝަންގެ އަހަރީ ދުވަހާ ގުޅުވައިގެން އަންނަ އަހަރުވެސް އެ ދުވުން ބޭއްވުމަށް ތައްޔާރުވަމުންދާ ކަމަށް ސްޕޯޓްސް ކޯޕަރޭޝަންގެ މެނޭޖިން ޑިރެކްޓަރޔ އަބްދުއްރައްޒާގް އިބްރާހިމް ވިދާޅުވެއްޖެއެވެ.
އިއްޔެ ބޭއްވި މައިލޯ ފައިވް ކޭ ޓީމް ރަންއަށް ފަހު 'ސަން ސްޕޯޓްސް'އާ ވާހަކަދައްކަވަމުން އެމްޑީ ރައްޒާގް ވިދާޅުވީ، ފުރަތަމަ ރޭސް ވަރަށް ކާމިޔާބު ކަމަށާއި ހޮނިހިރު ދުވަހާ ދިމާކޮށް ދުވުމުގައި ބައިވެރިވާން ލިބުނު ކުރު މުއްދަތުގެ ތެރޭގައި ލިބިގެންދިޔަ ތަރުހީބާމެދު ހިތްހަމަޖެހޭ ކަމަށެވެ.
"ލިބުނު ތަރުހީބާމެދު ވަރަށް ބޮޑަށް ހިތްހަމަޖެހޭ. އަޅުގަނޑުމެން ބޭނުންވަނީ ސްޕޯޓްސް ކޯޕަރޭޝަން ވީހާވެސް ގާތުން ރައްޔިތުންނާއެކު މަސައްކަތް ކުރަން،" ރައްޒާގް ވިދާޅުވިއެވެ.
ރައްޒާގް ވިދާޅުވީ، މިފަދަ ރޭހެއް ސްޕޯޓްސް ކޯޕަރޭޝަނުން އިންތިޒާމް ކުރުމުގެ މަގްސަދަކީ ދުޅަހެޔޮ ސިއްހަތަކަށް މަގުފަހިކޮށްދިނުމާއި ދިރިއުޅުމުގެ ކަންކަން ހުންނަ ގޮތުން ދިމާވާ ބަލިތަކުން ރާއްކާތެރިވުމަށް ހޭލުންތެރިކުރުން އަދި އެކުވެރި މާހައުލެއް ގާއިމުކޮށްދިނުން ކަމަށެވެ.
ޖުމުލަ 64 ޓީމް ވާދަކުރި ޓީމް އިވެންޓް ދުވުން އަންނަ އަހަރުވެސް ބޭއްވުމަށް ނިންމަވާފައިވާ ކަން ހާމަކުރައްވަމުން ރައްޒާގް ވިދާޅުވީ، މިއަހަރު ލިބުނު ތަރުހީބަށް ބެލުމަށްފަހު އަންނަ އަހަރުވެސް ސްޕޯޓްސް ކޯޕަރޭޝަންގެ އަހަރީ ދުވަހާ ގުޅުވައިގެން ފައިވް ކޭ ޓީމް ރަންގެ އިތުރު ރޭހެއް ބޭއްވުމަށް ނިންމާފައިވާ ކަމަށެވެ.
އިއްޔެ ހުޅުމާލޭގައި ކުރިއަށް ގެންދިޔަ "މައިލޯ 5K ޓީމް ރަން"ސީނިއަރ ކެޓަގަރީގެ އެއްވަނަ، ކޭއެޗް ސްޕޯޓްސް އެކަޑަމީން ގެންދިޔައިރު، އެބައިގެ ދެވަނަ ހޯދީ ކްލަބް ކާމް ސްޕޯޓްސްގެ ޓީމެވެ. އަދި ތިން ވަނަ ހޯދީ ޓްރެކް އެންޑް ފީލްޑްސް އެސޯސިއޭޝަންގެ ޓީއެފްއޭ ރަނަރސް ޓީމެވެ.