ވޮޝިންޓަން (މެއި 10): އެމެރިކާގެ ރައީސް ޑޮނަލްޑް ޓްރަމްޕް، އެފްބީއައިގެ ޑިރެކްޓަރު ޖޭމްސް ކޯމީ މަގާމުން ވަކިކުރައްވައިފި އެވެ.
ވައިޓް ހައުސްއިން އިއުލާން ކުރި ގޮތުގައި ކޯމީ މަގާމުން ދުރުކުރީ ނިމިދިޔަ ރިޔާސީ އިންތިހާބުން ނާކާމިޔާބުވި ޑިމޮކްރެޓިކް ކެންޑިޑޭޓު ހިލަރީ ކްލިންޓަންގެ އީމެއިލްތަކާ ބެހޭ ތަހުގީގު ކުރިއަށް ގެންދިޔަ ގޮތުންނެވެ.
ނަމަވެސް އިދިކޮޅު ފަރާތްތަކުން ވަނީ ކޯމީ މަގާމުން ދުރުކުރީ ޓްރަމްޕްގެ ކެމްޕެއިނާއި ރަޝިއާއާ އޮތް ގުޅުން އެފްބީއައި އިން ތަހުގީގު ކުރަމުން ދާތީ ކަމަށް ތުހުމަތުކޮށްފަ އެވެ.
ކޯމީ މަގާމުން ދުރުކޮށްފައި ވަނީ، ހިލަރީ ސެކްރެޓަރީ އޮފް ސްޓޭޓުގެ މަގާމުގައި ހުންނެވި ދުވަސްވަރު ޕްރައިވެޓް އީމެއިލް ސާވާއެއް ބޭނުން ކުރި މައްސަލައާ ބެހޭ ގޮތުން އޭނާ ގާނޫނު ހަދާ މަޖިލީހަށް ދެއްވި މައުލޫމާތަކީ މުޅިން ސައްހަ ނޫން މައުލޫމާތުކަން ފަޅާއަރާފައި ވަނިކޮށެވެ.
އެގޮތުން، މިމަހުގެ ތިން ވަނަ ދުވަހު ސެނެޓުގެ ޖުޑިޝަރީ ކޮމިޓީއާ ވާހަކަ ދައްކަވަމުން ކޯމީ ވިދާޅުވި ގޮތުގައި ހިލަރީގެ އަރިސް ފަރާތެއް ކަމަށްވާ ހޫމާ އަބިދީން ވަނީ ސިއްރު މައުލޫމާތު ހިމެނޭ 'އެތައް ހާސް' އީމެއިލްތަކެއް އޭނާގެ ކުރީގެ ފިރިމީހާ، އެންތަނީ ވީނާއަށް ޕްރިންޓު ކުރުމަށްޓަކައި ފޮނުވާފަ އެވެ.
ނަމަވެސް މިއަދު އެފްބީއައި އިން ވަނީ އަބިދީން، ވީނާ އަށް ފޮނުވީ ސިއްރު މައުލޫމާތު ހިމެނޭ އެންމެ ދެ އީމެއިލްކަން ސެނެޓުގެ ކޮމިޓީއަށް އަންގާފަ އެވެ.
ވައިޓް ހައުސްއިން ކޯމީ އަށް ފޮނުވި ސިޓީގައިވާ ގޮތުން ގައުމުގެ ރައްޔިތުން އެފްބީއައި އަށް ކުރާ އިތުބާރު ހިފެހެއްޓުމަށްޓަކައި އެބިއުރޯއަށް އާ ލީޑަރަކު ބޭނުންވާ ކަމަށް ރައީސް ޓްރަމްޕް ގަބޫލު ކުރައްވަ އެވެ.
އަދި ކޯމީ އަށް އެމަގާމު ފުރިހަމަ ގޮތެއްގައި އަދާ ކުރެވެން ނެތް ކަމަށް އެޓާނީ ޖެނެރަލް ޖެފް ސެޝަންސް ވިދާޅުވި ވިދާޅުވުމަށް ޓްރަމްޕް ތާއިދު ކުރައްވާ ކަމަށް ވެސް އެސިޓީގައިވެ އެވެ.
ވައިޓް ހައުސް އިން ބުނާ ގޮތުގައި އެފްބީއައިއަށް އާ ޑިރެކްޓަރަކު އައްޔަން ކުރުމުގެ މަސައްކަތް ވަގުތުން ފެށޭނެ އެވެ. (ބީބީސީ)