މިދުވަސްވަރަކީ ހޫނު މޫސުމަކަށް ވާތީ އާއި މާލޭގައި ބޯފެން ލިބުން ދަތިވެފައި ވާތީ ފެން ކުންފުނީގެ "ތާޒާ" ފެން އުފައްދާ މިންވަރު އިތުރުކޮށްފި އެވެ.
އައިލެންޑް ބެވަރޭޖާސް މޯލްޑިވްސް ޕްރައިވެޓް ލިމިޓެޑުން އިއްޔެ ނެރުނު ބަޔާނެއްގައި ބުނީ ފެން އުފައްދާވަރު އިތުރު ކުރީ މި ދުވަސްވަރަކީ ހޫނު މޫސުމަށް ވާތީ އާއި އަދި ބާޒާރުގައި ފެނުގެ ޑިމާންޑް ބޮޑުވެފައިވާތީ، ފޫޅީގައި ބަންދުކޮށްފައިވާ ފެން ބޭނުން ކުރާ ވަރު އިތުރުވެފައިވާތީ ކަމަށެވެ.
އެ ކުންފުނިން ބުނީ ރައްޔިތުންނަށް ލުއިފަސޭހަ ކޮށްދިނުމުގެ ގޮތުން ތާޒާ ފެން އުފައްދާ ވަރު އިތުރުކޮށް، ބޮޓެލިން ޕްލާންޓްތައް 24 ގަޑިއިރު ހިންގަން ފަށާފައިވާ ކަމަށެވެ.
ބާޒާރުގައި ފެން ލިބުން ދަތިވި އިރު "ލައިފް" ފެން ސަޕްލައި ކުރުން ވަނީ މެދުކެނޑިފަ އެވެ.