ރާއްޖޭގައި މިހާރު ފެތުރެމުންދާ ރޯގާ ގުޅިގެން މޯލްޑިވްސް ކަރެކްޝަނަލް ސާވިސްގެ ހުރިހާ ޖަލުތަކުގައި ތިބި ގައިދީންނަށް ދެމުންގެންދާ އާއިލީ ބައްދަލުވުންތައް މެދުކަނޑާލަން ނިންމައިފި އެވެ.
ކަރެކްޝަނަލް ސާވިސް އިން މިއަދު ބުނީ، އެ ސާވިސްގެ ދަށުގައި ހުރި ޖަލުގައި ތިބި ގައިދިންނަށާއި ބަންދު މީހުންނަށް ދެމުންގެންދާ އާއިލީ އަދި އެކަހެރި ބައްދުވުންތައް މިއަދުން ފެށިގެން ވަގުތީ ގޮތުން މެދުކަނޑާލާފައިވާ ކަމަށެވެ.
ކަރެކްޝަނަލް ސާވިސްގެ ބެލުމުގެ ދަށުގައި ހުންނަ ޖަލުތަކަކީ މާލޭގައި ހުންނަ މާލޭ ޖަލާއި ކ. މާފުށީގައި ހުންނަ ޖަލުގެ އިތުރުން ހިންމަފުށީގައި ހުންނަ އައްސޭރި ޖަލެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ރޭ އާންމު ކުރި ހިސާބުތައް ދައްކާ ގޮތުން ސުވައިން ފުލޫ އަށް ޕޮސިޓިވްވާ މީހުންގެ އަދަދު ދަނީ އިތުރުވަމުންނެވެ.
އެގޮތުން އިއްޔެ އެކަނި ވެސް 2000 އަށް ވުރެ ގިނަ މީހުން ފަރުވާ އަށް އެދުނުއިރު މިހާތަނަށް 279 މީހަކު ވަނީ ސްވައިން ފުލޫ އަށް ޓެސްޓުކޮށްފަ އެވެ. އަދި އޭގެ ތެރެއިން 82 މީހަކު ވަނީ ސުވައިން ފްލޫ އަށް ޕޮޒިޓިވް ވެފަ އެވެ.
އަދި މިއަދާ ހަމައަށް އެ ބަލި ޖެހިގެން ތިން މީހަކު ވަނީ ނިޔާވެފަ އެވެ.