ވޮޝިންޓަން (މާޗް 6): ރައީސް ޑޮނަލްޑް ޓްރަމްޕް އެމެރިކާގެ ރިޔާސީ އިންތިހާބު ކާމިޔާބު ކުރެއްވުމުގެ ކުރިން އޭނާގެ ފޯނު ކޯލުތައް އަޑު އަހަން ކުރީގެ ރައީސް ބަރަކް އޮބާމާ އަމުރު ކުރެއްވި ކަމަށް ބުނެ ކުރާ ތުހުމަތުތައް ދޮގު ކުރުމަށް އެފްބީއައި އިން އެދިއްޖެ އެވެ.
އެފްބީއައިގެ ޑިރެކްޓަރު ޖޭމްސް ކޯމީ، ޖަސްޓިސް ޑިޕާޓްމަންޓްގެ ފަރާތުން އެފަދައިން އެދިފައި ވަނީ މިދިޔަ އަހަރުގެ އޮކްޓޯބަރު މަހު ރައީސް އޮބާމާ ވަނީ ޓްރަމްޕް ޓަވަރުގެ ފޯނުތައް ޓެޕް ކުރަން އަމުރު ކުރައްވާފައި ކަމަށް ޓްރަމްޕް އިއްޔެ ތުހުމަތު ކުރެއްވި ފަހުންނެވެ. އަދި އެ މައްސަލަ ކޮންގްރެސް އިން ތަހުގީގު ކުރުމަށް ވައިޓް ހައުސްއިން ގޮވާލި ފަހުންނެވެ.
އެންބީސީ އާއި ނިއު ޔޯކް ޓައިމްސްގައިވާ ގޮތުން އެތުހުމަތުތައް ދޮގު ކުރަން އެފްބީއައި އިން އެދުނީ އެމެރިކާގެ ރައްޔިތެއްގެ ފޯނު ކޯލުތައް އަޑު އެހުމަކީ ގާނޫނާ ހިލާފު ކަމަކަށް ވާނެތީ އާއި އެފަދަ ކަމެއް ކުރި ކަމަށް ސަރުކާރުގެ މައްޗަށް ތުހުމަތު ކުރުމުން އެފްބީއައި ވެސް ކުށްވެރިވާތީ އެވެ. އޮފިޝަލުންނާ ހަވާލާދީ އެމެރިކާގެ މީޑިއާތަކުގައިވާ ގޮތުން ޓްރަމްޕްގެ ތުހުމަތުތަކަށް ބާރުދޭ އެއްވެސް ހެއްކެއް ނެތް ކަމަށް ކޯމީ ގަބޫލު ކުރައްވަ އެވެ.
އެމެރިކާގެ ޖަސްޓިސް ޑިޕާޓްމެންޓުން އެކަމާ ބެހޭ ގޮތުން ވަކި އެއްޗެކޭ ބުނެފައި ނުވެ އެވެ.
އަދި މީގެ ކުރިން އޮބާމާގެ ތަރުޖަމާނު ކެވިން ލިއުވިސް ވަނީ "އެމެރިކާގެ އެއްވެސް ރައްޔިތަކަށް ޖާސޫސް ކުރުމަށް ރައީސް އޮބާމާ ވެސް އަދި ވައިޓް ހައުސްގެ އެހެން އޮފިޝަލަކު ވެސް އަމުރު ނުކުރައްވާ" ކަމަށް ވިދާޅުވެފަ އެވެ. ލިއުވިސްގެ އިތުރުން، އޮބާމާގެ ކުރީގެ ފޮރިން ޕޮލިސީ އެޑްވައިޒަރު ބެން ރޯޑްސް އާއި ކުރީގެ ޑިރެކްޓާ އޮފް ނެޝަނަލް އިންޓެލިޖެންސް ޖޭމްސް ކްލެޕާ ވެސް ވަނީ އެތުހުމަތުތައް ދޮގު ކުރައްވާފަ އެވެ. (ބީބީސީ)