ކުރީގެ ޑިފެންސް މިނިސްޓަރު، ކާނަލް ރިޓަޔާޑު މުހައްމަދު ނާޒިމް ޖަލަށް ލާފައިވަނީ ރާއްޖެއާއި ބައިނަލްއަގުވާމީ ގާނޫނުތަކާ ޚިލާފަށް ކަމަށް އދގެ ވޯކިންގް ގްރޫޕު އޮން އާބިޓްރަރީ ޑިޓެންޝަނުން ނިންމައިފިއެވެ.
ކާނަލް ނާޒިމް ދިރިއުޅުއްވި ގެއިން ހަތިޔާރު ފެނުނު މައްސަލައިގައި އޭނާގެ މައްޗަށް 11 އަހަރުގެ ޖަލު ހުކުމެއް އިއްވީ 2015 ވަނަ އަހަރުގެ ތެރޭގައެވެ.
ނާޒިމް ޖަލަށް ލާފައިވާ މައްސަލަ، އެމްނެސްޓީ އިންޓަނޭޝަނަލް މެދުވެރިކޮށް، ނާޒިމްގެ އާއިލާއިން އދގެ ވޯކިންގް ގްރޫޕަށް ހުށަހެޅީ މިދިޔަ އަހަރުގެ ތެރޭގައެވެ.
އދގެ ވޯކިންގް ގްރޫޕުން އެ މައްސަލައާ މެދު މިއަދު ގޮތް ނިންމާފައިވާ އިރު، އެ ގްރޫޕުން ބުނެފައިވަނީ ނާޒިމް ޖަލަށް ލާފައިވަނީ ރާއްޖޭގައި ހެދިފައިވާ ގާނޫނުތަކާއި، ބައިނަލްއަގުވަމީ ގާނޫނުތަކާ ވެސް ޚިލާފަށް ކަމަށެވެ.
ވޯކިންގް ގްރޫޕުން ބުނީ ނާޒިމް ވަގުތަށް ވަގުތަށް ދޫކޮށްލައި، ނާޒިމްގެ ގެއްލިފައިވާ ހައްގުތަކުގެ ބަދަލު، ބައިނަލްއަގުވާމީ ގާނޫނުތަކާ އެއްގޮތަށް ދިވެހި ސަރުކާރުން ދޭންޖެހޭ ކަމަށެވެ.
އަދި ވޯކިންގް ގްރޫޕުން ރާއްޖެއަށް ޒިޔާރަތެއް ކުުރުމަށް ދިވެހި ސަރުކާރުން ދައުވަތެއް ދިނުމަށް ވެސް އެ ގްރޫޕުން ވަނީ އެދިފައެވެ.
ވޯކިން ގްރޫޕުން ފާހަގަކޮށްފައިވާ ކަންކަން:
- ކާނަލް ނާޒިމްގެ ކޮޓަރިން ފެނުނު ހަތިޔާރާއި ވަޒަންތަކަކީ އޭނާގެ ކޮޓަރިއަށް ފުލުހުން ވަދެ އަމިއްލައަށް ޕްލާންޓުކޮށްފައިވާ ތަކެތިކަމަށާއި، އެހެން ކަމުން އެކަމުގައި ނާޒިމް ފްރޭމްކުރުމަށް މަސައްކަތްކޮށްފައިވާ ކަމަށް ބެލެވޭ ކަން.
- އެހާ ސީރިއަސް އަދި ބޮޑު ދައުވާއަކަށް ކްރިމިނަލް ކޯޓުން ދިން ފަސް ދުވަހުގެ މުއްދަތަކީ އެކަށީގެންވާ މުއްދަތެއް ނޫން ކަމާއި، ކްރިމިނަލް ކޯޓާއި ހައި ކޯޓަށް ނާޒިމްގެ ފަރާތުން ހުށަހެޅި ގިނަ ދިފާއީ ހެކިންގެ ހެކިބަސް ނުނެގުމާއި ދިފާއީ ހެކިން ހުށަހެޅުމަށް ވެސް ހުރަސްތަކެއް ކުރިމަތިކުރުން.
- ދައުލަތުން ހުށަހެޅި ހެކިންގެ މައުލޫމާތު އެކަށީގެންވާ ގޮތެއްގައި ނާޒިމަށް ދީފައިނުވާކަން.
- މައްސަލަ އިސްތިއުނާފު ކުރުމަށް ބޭނުންވާ ރިޕޯޓާއި އެހެނިހެން ލިއެކިއުންތައް އިސްތިއުނާފްގެ މުއްދަތުގެ ތެރޭގައި ކްރިމިނަލް ކޯޓުން ނާޒިމްގެ ވަކީލުންނަށް ފޯރުކޮށްދީފައި ނުވުން.
- ފެނުނު ފިސްތޯލައާއި ވަޒަންތަކަކީ ނާޒިމްގެ ތަކެތިކަން ސާބިތުކޮށްދިނުމުގެ ޒިންމާ ދައުލަތާ ހަވާލުކުރުމުގެ ބަދަލުގައި އެއީ ނާޒިމްގެ އެއްޗެއް ނޫންކަން ޝަރީއަތުގައި ނާޒިމަށް ސާބިތުކޮށްދޭން ޖެހުން.
- ހައިކޯޓުން މައްސަލަ ކުރިއަށް ގެންދިޔުމުގައި ފަސް މަސް ހޭދަކުރުމާއި މައްސަލަ އަވަސްކޮށްދޭން ސްޕްރީމް ކޯޓަށް ވެއްދި މައްސަލަ ބޭރުކޮށްލުން.
ވޯކިން ގްރޫޕުން ނިންމާފައިވާ ގޮތަށް ބަލާއިރު، ދިވެހި ދައުލަތުން ވަނީ ނާޒިމަށް ލިބިދޭ އިންސާނީ ހައްގުތަކާއި ފަރުދީ އަދި ސިޔާސީ ހައްގުތައް ނިގުޅައިގެންފައެވެ. އަދި ރާއްޖޭގެ ގާނޫނުއަސާސީންނާއި ރާއްޖޭގައި ހެދިފައި ހުރި އެހެން ގާނޫނުތަކުން އޭނާ އަށް ލިއްބައިދޭ ހައްގުތައްވެސް ދައުލަތުން ނިގުޅައިގެންފައިވާ ކަމަށް އދގެ ވޯކިން ގްރޫޕުން ބުނެފައިވެއެވެ.
މީގެ އިތުރުން އެ ގްރޫޕުން ވަނީ ނާޒިމްގެ މައްޗަށް ކޮށްފައިވާ ދައުވާއާއި ހުކުމް އަނބުރައި ގެންގޮސް، އިންސާފުވެރިކަމާ އެކު ބައިނަލްއަގުވާމީ ގާނޫނުތަކާއި ގަވާއިދުތަކާ އެއްގޮތަށް އެ މައްސަލަ އަލުން ބަލައި، އޭނާއާ މެދު އިންސާފުވެރި ޝަރީއަތެއް ކުރުމަށް ސަރުކާރަށް ގޮވާލާފައެވެ.
ކާނަލް ނާޒިމްގެ މައްޗަށް 11 އަހަރުގެ ޖަލު ހުކުމެއް ކޮށްފައިވާއިރު އޭނާ ވަނީ ކްރިމިނަލް ކޯޓުގެ އެމައްސަލަ ހައިކޯޓުގައި އިސްތިއުނާފްކޮށް މައްސަލަ އަވަސްކޮށްދިނުމަށް ސުޕްރީމްކޯޓުގައި އެދިފައެވެ. ނަމަވެސް އެކޯޓުން ކަނޑައެޅީ ހައިކޯޓުގެ ހުކުމް ރަނގަޅު ކަމަށެވެ. އެއާއެކު އެހުކުމް ސަލާމަތްވާން ހުރި ހުރިހާ ދޮރުތަކެއް ވަނީ ނާޒިމަށް ބަންދުވެފައެވެ.