މިއަހަރުގެ ޖަނަވަރީ މަހުގެ ތެރޭގައި އަލިފާން ރޯވެ އަދާ ހުލިވި ގދ. ތިނަދޫ އިންޖީނުގޭގެ ބަދަލުގައި އަލަށް ހަދާ އިންޖީނުގެއަށް ބޭނުންވާ އިންޖީނު ގަންނަން ސިންގަޕޫރުގެ ކުންފުންޏަކާ ހަވާލުކޮށްފިއެވެ.
ގާތްގަނޑަކަށް 1.3 މިލިއަން އެމެރިކާ ޑޮލަރު (20 މިލިއަން ރުފިޔާ) ހަރަދުވާ އެ ޕްރޮޖެކްޓުގެ ދަށުން ތިނަދޫ އާ އިންޖީނުގެއަށް ހަތަރު އިންޖީނު ގަންނަން ހަވާލުކުރީ ސިންގަޕޫރުގެ އެލަމް އިންޖިނިއަރިން ސަޕްލައި ލިމިޓެޑާއެވެ.
ސިންގަޕޫރުގެ ކުންފުންޏާ ހަވާލުކޮށްގެން ތިނަދޫ އާ އިންޖީނު ގެއަށް ގެންނަނީ އެކެއް މެގަވޮޓްގެ ދެ ޖަނަރޭޓަރާއި 1.5 މެގަވޮޓްގެ ދެ ޖަނަރޭޓަރެވެ.
ފެނަކަ ކޯޕަރޭޝަނުން ބުނީ، ތިން މަސް ދުވަހުގެ ތެރޭގައި އެ އިންޖީނުތައް ބަހައްޓާ ނިމޭއިރު، އިންޖީނުތައް ރާއްޖެ ގެނައުމުގެ ކުރިން އާ އިންޖީނުގޭގެ ހުރިހާ މަސައްކަތެއް ނިންމާ އިންޖީނު ބަހައްޓަން ތައްޔާރުކުރާނެ ކަމަށެވެ.
ތިނަދޫގައި ހަދާ އާ އިންޖީނުގެ ނިމޭއިރު އެ ތަން ވެގެންދާނީ ރާއްޖޭގައި ހަދާ އެންމެ ބޮޑު އިންޖީނުގެއަށް ކަމަށް ވެސް އެ ކޯޕަރޭޝަނުން ބުނެއެވެ.
މިއަހަރުގެ ޖެނުއަރީ މަހުގެ 25 ވަނަ ދުވަހުގެ ރޭ ދަންވަރުގެ ވަގުތެއްގައި ތިނަދޫ އިންޖީނުގޭގައި އަލިފާން ރޯވި އަލިފާނުގެ ހާދިސާގައި އިންޖީނުގޭގައި ހުރި ހުރިހާ އިންޖީނެއް ބޭނުން ނުކުރެވޭ ވަރަށް އަނދައިގެންދިޔަ އެވެ.
ހާދިސާގެ ސަބަބުން ތިނަދޫ އިން ހަ ދުވަހަށް ކަރަންޓް ކެނޑިގެންދިޔައިރު އެރަށަށް 24 ގަޑިއިރު ކަރަންޓް ދެމުންގެންދަނީ 1000 ކިލޯވޮޓްގެ ދެ ޖަނަރޭޓަރާއި 1020 ކިލޯވޮޓްގެ ޖަނަރޭޓަރެއްގެ އެހީގަ އެވެ.
އެރަށުގައި މިހާރު އަޅާ އާ ޒަމާނީ އިންޖީނުގެއަކީ 11 މިލިއަން ރުފިޔާ ހަރަދުކޮށްގެން މިދިޔަ ޖޫން މަހުގެ ތެރޭގައި ސްރީލަންކާގެ ކުންފުންޏެއް ކަމަށްވާ އެޑްވާންސް ސްޓީލް ސްޓްރަކްޗަރު ޕްރައިވެޓް ލިމިޓެޑާ ހަވާލުކޮށްގެން ކުރިއަށްގެންދާ މަޝްއޫރުއެކެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމުގައި މުހައްމަދު ނިމާލް ހުންނެވިއިރު، އެ މަޝްރޫއުގެ މަސައްކަތް ލަންކާގެ ކުންފުންޏާ ހަވާލުކުރީ މިއަހަރުގެ ޑިސެމްބަރު މަހުގެ ނިޔަލަށް ނިންމާ ގޮތަށެވެ.
ނަމަވެސް އެ ކުންފުންޏަށް އެޑްވާންސް ޕޭމަންޓް ދެއްކުމުގައި ދަތިތަކެއް ހުރުމުން އިންޖީނުގޭގެ މަސައްކަތް މިދިޔަ މަހުގެ ނިޔަލަށް އޮތީ ހުއްޓިފައެވެ. އަދި މަސައްކަތް ހަވާލުކުރި ކުންފުންޏާއެކު އެއްބަސްވުމަކަށް އާދެވި މިމަހުގެ ކުރީކޮޅު އެޑްވާންސް ފައިސާ ދައްކާ މިދިޔަ ހަފްތާ ތެރޭގައި އެތަނުގެ މަސައްކަތް ވަނީ ފަށާފައެވެ.
ފެނަކަ ކޯޕަރޭޝަނުން ބުނި ގޮތުގައި، އެ މަސައްކަތް ދެން ނިންމާލެވޭނީ އަންނަ އަހަރުގެ ޖުލައި މަހުގެ ތެރޭގައެވެ.
ފެނަކަ ކޯޕަރޭޝަންގައި މިއަދު ބޭއްވި ރަސްމިއްޔާތުގައި ގއ. ތިނަދޫ އަދި ހއ. ފިއްލަދޫ އިންޖީނުގޭގެ އިންޖީނުތައް އޯވަހޯލް ކުރުމަށް ބޭނުންވާ ސާމާނު ގަތުމަށްވެސް ހަވާލުކޮށްފައެވެ.
ގާތްގަނޑަކަށް 43000 އެމެރިކާ ޑޮލަރު (663،060 ދިވެހި ރުފިޔާ) ހަރަދުކުރާ އެ ޕްރޮޖެކްޓުގެ މަސައްކަތް ހަވާލުކުރީ ތިނަދޫ އިންޖީނު ގަންނަން ހަވާލުކުރި ސިންގަޕޫރުގެ އެލަމް އިންޖިނިއަރިންނާއެވެ.