ނިކަރާގުއާގެ ރިޔާސީ އިންތިޚާބުގެ ތިންވަނަ ދައުރަކަށް ނިކުމެވަޑައިގެންނެވި އެ ގައުމުގެ ރައީސް ޑެނިއެލް އޯޓޭގާ އިންތިޚާބު ކާމިޔާބު ކުރައްވައިފި އެވެ.
އޭނާ އިންތިޚާބަށް ކުރިމަތިލެއްވީ، ރަނިންގް މޭޓުގެ ގޮތުގައި އޭނާގެ އަނބިކަނބަލުން ރޮޒާރިއޯ މުރިލޯ ހަމަޖައްސައިގެންނެވެ. އޯޓޭގާ އިންތިޚާބު ކާމިޔާބު ކުރުމާ އެކު، އޭނާގެ މި ދައުރުގެ ނައިބު ރައީސަކީ އޭނާގެ އަނބިކަނބަލުންނެވެ.
މިއީ ދުނިޔޭގެ ތާރީޚުގައި ވެސް ވެސް ދެމަފިރިއަކު ގައުމުގެ އެންމެ މަތީ ދެ މަގާމަށް އެކުގައި ކުރިމަތިލައި، އިންތިޚާބު ކާމިޔާބު ކުރި ފުރަތަމަ ފަހަރެވެ.
އޯޓޭގޯއާއި އޭނާގެ އަނބިކަނބަލުން ނިކަރާގުއާގެ ރިޔާސީ އިންތިޚާބު ކާމިޔާބުކުރީ، އިންތިޚާބުގައި ވޯޓުލީ މީހުންގެ 72 ޕަސަންޓު ވޯޓާ އެކުގައެވެ.
އޯޓޭގޯއާ އެންމެ ގާތުން ވާދަކުރި ކެންޑިޑޭޓު މެކްސިމީނޯ ރޮޑްރިގޭޒްއަށް ލިބުނީ ޖުމްލަ ވޯޓުގެ 14 ޕަސަންޓެވެ.
އޯޓޭގާ ނިކަރާގުއާގައި ފަށާފައިވާ އިޖްތިމާއީ މަޝްރޫއުތަކާ ގުޅިގެން އޭނާގެ މަގުބޫލުކަން ނިކަރާގުއާގައި ވަރަށް ބޮޑަށް އޮތީ އިތުރުވެފައެވެ. އަދި އޭނާއާ މި އިންތިޚާބުގައި ވާދަކުރާނެ މާ ވަރުގަދަ ވާދަވެރިއެއް ވެސް ނެތެވެ.
އެހެން ނަމަވެސް ދުނިޔޭގެ ބައެއް ގައުމުތަކުން ދަނީ އެ އިންތިޚާބާ ގުޅޭގޮތުން ކަންބޮޑުވުން ފާޅުކޮށްފައެވެ. އެގޮތުން ނިކަރާގުއާގައި އިދިކޮޅު ފަރާތްތަކުގެ ސިޔާސީ ހަރަކާތްތަކަށް ސަރުކާރުން ހުރަސް އަޅާފައިވާ ކަމަށާއި، އިންތިޚާބު މޮނީޓަރު ކުރުމަށް ވެސް ހުރަސް އަޅާފައިވާ ކަމަށް އެކި ފަރާތްތަކުން ދަނީ ބުނަމުންނެވެ.